Mateo 1

1Yesu Kristo nɛ ji Matsɛ David kɛ Abraham a bibimibi ɔ, e nana kasowahi ji ni nɛ ɔmɛ:

2Abraham fɔ Isak, nɛ Isak fɔ Yakob, nɛ Yakob hu fɔ Yuda kɛ e nyɛmimɛ ɔmɛ. 3Yuda yo ji Tama, nɛ a bimɛ ji Perez kɛ Zera; Perez fɔ Hezron, nɛ Hezron hu fɔ Aram; 4Aram bi ji Aminadab, nɛ Aminadab fɔ Naason, nɛ Naason hu fɔ Salmon; 5Salmon kɛ e yo Rahab fɔ Boaz, nɛ Boaz kɛ Rut fɔ Obed, nɛ Obed fɔ Isai; 6Isai fɔ Matsɛ David, nɛ David kɛ Yuria yo ɔ fɔ Salomo;

7Salomo fɔ Rehabeam, nɛ Rehabeam fɔ Abia, nɛ Abia hu fɔ Asa; 8Asa bi ji Yehosafat, nɛ Yehosafat fɔ Yoram, nɛ Yoram fɔ Uzia; 9Uzia fɔ Yotam; Yotam fɔ Ahaz, nɛ Ahaz fɔ Hezekia; 10Hezekia bi ji Manase, nɛ Manase fɔ Amon, nɛ Amon hu fɔ Yosia; 11Yosia fɔ Yekonia kɛ e nyɛmimɛ ɔmɛ be mi nɛ a ngɛ nyɔguɛ yee ngɛ Babilon ɔ. 12Ngɛ a nyɔguɛ yemi ɔ se ɔ, Yekonia fɔ Sealtiel, nɛ Sealtiel hu fɔ Zerubabel; 13Zerubabel bi ji Abiud, nɛ Abiud fɔ Eliakim, nɛ Eliakim fɔ Azor; 14Azor bi ji Zadok, nɛ Zadok fɔ Akim, nɛ Akim hu fɔ Eliud; 15Eliud fɔ Eleazar, nɛ Eleazar fɔ Matan, nɛ Matan hu fɔ Yakob; 16Yakob fɔ Yosef nɔ nɛ ngɔ Maria nɛ ji Yesu Kristo e nyɛ ɔ.

17Enɛ ɔ tsɔɔ kaa weku nyɔngma kɛ eywiɛ nɛ ngɛ kɛ je Abraham yi nɔ kɛ ba su Matsɛ David nɔ; nɛ kɛ je Matsɛ David yi nɔ kɛ ba su be mi nɛ a ngɔ mɛ nyɔguɛ kɛ ho Babilon ya a hu peeɔ weku nyɔngma kɛ eywiɛ; nɛ kɛ je benɛ a je nyɔguɛ yemi ngɛ Babilon se kɛ ba su Kristo yi nɔ hu peeɔ weku nyɔngma ke eywiɛ.

Bimwɔyo ɔ fɔmi he si womi

18Nɛ bɔ nɛ Yesu Kristo fɔmi ɔ ba ha ji, a bi Maria nɛ ji Yesu nyɛ ɔ si kɛ ha Yosef. Se Mumi Klɔuklɔu ɔ ha nɛ Maria na muklii benɛ e li nyumu. 19Sane nɛ ɔ hao Yosef saminya. Se akɛnɛ dalɔ kɛ nɔmlɔ nɛ buu e he ji lɛ he je ɔ, e pee e juɛmi kaa e maa ngmɛɛ Maria he dii bɔ nɛ pee nɛ e ko pue e hɛ mi si.

20Se benɛ Yosef hwɔɔ si nɛ e ngɛ sane nɛ ɔ he susue ɔ, e nɔ mahe mi nɛ e nla nɛ Mawu bɔfo ko ba da si ngɛ e kasa nya nɛ e de lɛ ke “Yosef, David bi, mo ko ngmɛɛ Maria he, ejakaa e bɔɛ ajuama. Mumi Klɔuklɔu ɔ nɛ ha nɛ e da si ɔ nɛ. 21E ma fɔ binyumu, nɛ o maa wo lɛ biɛ ke Yesu, e sisi ji Yiwamihelɔ, ejakaa lɛ nɛ e ma ba he nimli a yi wami kɛ je a he yayami ɔmɛ a mi.” 22Enɛ ɔ ma ha Mawu si nɛ e wo kɛ gu gbali ɔmɛ a nɔ ɔ maa ba mi ke, 23Hyɛ! Zangmayo ɔ nɛ li nyumu ɔ ma na muklii nɛ e ma fɔ Binyumu, nɛ a ma tsɛ lɛ ke, “Yimanuel”, e sisi ji, “Mawu kɛ wɔ ngɛ”. 24Benɛ Yosef te si ɔ, e ye Mawu bɔfo ɔ gbi ɔ nɔ. E ya ngɔ Maria kɛ ba e we ɔ mi nɛ e kɛ lɛ ba hi si kaa e yo. 25Se a li a he kaa nyumu kɛ yo kɛ ya si be nɛ e fɔ nɛ Yosef wo bi ɔ biɛ ke “Yesu”.