गिनती 9

दिसरी वार फसहन तिहवार वाळनो

1इसराएलियान मिसर देश सी निकळनेन दिसरे सालन पेहला मोहना मा योहोवा भगवान सीनाय जंगल मा मूसा सी कयो, 2“इसराएली लोगहन फसहन तिहवार को टाकली टेम पर वाळीया करे। 3मतलब इना मयनान चवदे दाहड़ाम सानतली टेमे तुम लोगहन उना तिहवार को सब रीति भातीन आरू नियमन अनसारे वाळीया करजो।” 4तव मूसा इसराएलीया सी फसहन तिहवार वाळने करीन कयो। 5आरू त्या लोगहन पेहले मयनेन चवदवे दाहड़े गोधूलीन टेमे सीनाय नावन जंगलो मा फसहन तिहवार को वाळीया; आरू जो-जो हुकुम योहोवा भगवान मूसा को आपलो हुतो ओकात् अनसारे इसराएलीया करीया। 6पुण काहय लोगहन एक मनुसन धड़न लारे वीटोळ हुयनेन कारण उना दाहड़े फसहन तिहवार नी वाळीया; त्या उना दाहड़े मूसा आरू हारूनन पास मा जाईन कयने लागीया, 7“हामु एक मनुसन धड़न कारण सी वीटोळ छे; पुण हामु तिहवार वाळने सी काह रूकाय रीया, आरू इसराएलीयान सात मा योहोवान चढ़ावो सय टेमे काहनी चढ़ावजे?” 8मूसा उन लोगहन सी कयो, ठेर जावो, हांव परमेश्वर वात समळी लयो कि त्यो तुमरा वाराम काय हुकुम आपे।

9योहोवा भगवान मूसा सी कयो, 10“इसराएलीया सी यो कय कि चाहे तुम लोगहन चाहे तुमरी अवलीयाद माईन काय बी काहला धड़न कारण सी वीटोळ हुय जाय, या दूर देशन जात्रा पर हय, तव बी त्यो योहोवा भगवान वाटे फसहन तिहवार वाळे। 11त्या दिसरे मयनेन चवदवे दाहड़े सानतली टेमे तिहवार वाळिया; आरू फसहन बलिपशुन माद को अखमीरी रोटान आरू कड़वा सागपातन सात मा खाय। 12आरू ओका मा काहय बी सोन्दारे तक झुन मेलता, आरू नी ते ओकी काय हाड़की तोड़नो; त्या उना फसहन सारी रीतिन अनसारे वाळे। 13पुण जो मनुस वीटोळ हुय जाय आरू जात्रा पर नी हय, पुण फसहन तिहवार को नी माने त्यो जीव ओका मानसो मा सी खतम कर दियो जाय, उना मनुस क योहोवा भगवानन चढावो खरा टेम पर नी लावनेन कारण ओका पापन भार हाकलनो पड़से। 14कदाम कोय पारको तुमरे वीच मा रयीन यो चाहे कि योहोवा भगवान वाटे फसहन तिहवार वाळे ती त्यो उनी रीति सी आरू नियमन अनसारे उको वाळे; देश वाळो आरू पारको दुयन तुमरी एकत् रीति रये।”

निवासन जागा पर आगठान वादळो

(नीरगमन 40:34-38)

15जिने दाहड़े निवास जो गवाहन तम्बू बी कहवाये उको उबो करीया, उना दाहड़े उना पर वादळो छाळाय गिओयो; आरू सान्तो त्यो वादळो निवास पर आगठान सारको देखाय पड़ीयो आरू सोन्दारे तक देखाय देतो रयो। 16लोगत हसोत हुया करतो हुतो; मरलब दिसु वादळो छावलो रये, आरू राती आगठो देखायतो हुतो। 17आरू जव-जव त्यो वादळो तम्बून ऊपर सी उठ जातलो तव इसराएली लोगहन अगा जाता हुता; आरू जिना जागा पर वादळो रुकाय जातलो उना जागा पर इसराएलीया हेनका डेरा उबा करता रयतला। 18योहोवा भगवानन हुकुमन अनसारे सी त्या इसराएली लोगहन अगा जाया करता हुता, आरू योहोवा भगवानन हुकुमन अनसारे त्या डेरान को उबा करता हुता; आरू जतरा दाहड़ा तक त्यो वादळो निवास पर रयतलो हतरा दाहड़ा तक त्या डेरान डाल्ला रयतला। 19जव वादळो घणा दाहड़ा तक निवास पर छावायलो रयतलो तव बी इसराएली लोगहन योहोवा भगवानन हुकुम मानीया, आरू अगा नी जातला। 20कदी-कदी त्यो वादळो थुड़ाक दाहड़ा तक निवास पर रयतलो, आरू तव बी इसराएली लोगहन योहोवा भगवानन हुकुम सी डेरा डालीन पड़ी रयतला; आरू ओळी योहोवा भगवानन हुकुमन अनसारेत अगा जाता हुता। 21आरू कदी-कदी वादळो सान्तो ताकत रयतलो; आरू जव त्यो सन्दारे उठ जातलो तव त्या अगा जातला, आरू कदाम त्यो राती बराबर रयतलो ती जव वादळो उठ जातलो तवत् त्या अगा जातला। 22त्यो वादळोचाहे दुय दाहड़ा, चाहे एक मयनो, चाहे साल भरीन, जव तक निवास पर रयतलो तव तक इसराएली लोगहन हेनका डेरात माब रयतला आरू अगा नी जाताला; पुण जव त्यो वादळो उठ जातलो तव त्या अगा जातला। 23योहोवा भगवानन हुकुम सी त्या हेनका डेरा उबा करतला, आरू योहोवा भगवानन हुकुम सीत् अगा जाता हुता; जो हुकुम योहोवा भगवान मूसान लारे हेनको आपतो हुतो उको त्या मानता हुता।