Dhankavi Bible
गिनती 8
दिवलीयान को धपाड़नो
ओळी योहोवा भगवान मुसा सी कयो, “ हारून को समझाड़ीन यो कय कि जव-जव तू दिवलीयान को धपाड़े तव-तव सातु दीवान विजाळो दीवटन सामने रये।” हतरान करीन हारून हसोत् करीयो, मतलब जो हुकुम योहोवा भगवान मूसा को आपलो हुतो ओकात् अनसारे त्यो दीवान को धपाड़ीयो कि त्यो दीवट सामने विजाळो आपे। आरू दीवटन बनावट असी हुती, मतलब यो पाया सी लगाड़ीन फुलो तक घड़ायला सोनान बनला हुता; जो नमूना योहोवा भगवान मूसा को देखाड़लो हुतो ओकात् अनसारे त्यो दीवट को बनायो।
लेवीयान चुखो हुयनो आरू अर्पण
ओळी योहोवा भगवान मूसा सी कयो, इसराएलीयान वीच मा सी लेवीयान को अलग ली जायीन चुखो कर। हेनको चुखो करने वाटे तू असो कर कि चुखो करने वाळो पानी हेनू पर छिड़की दे, ओळी त्या पूरा डीलन झटा बुड़ावे, आरू छिंदरा धुवे, आरू आपसान को चुखा करे। तव त्या तेल सी सेकायला आटोन अन्नभेंट क सात मा एक केवड़ो ली लेय, आरू तू पापबलि वाटे एक दिसरा केवडो क लेजी। आरू तू लेवीयान क मिलापवाळा तम्बू न सामने पुगाड़जी, आरू इसराएलीयान सारी मण्डळीक एखटी करजी। तव तू लेवीयान को योहोवा भगवानन ओगळ साते ली आवजी, आरू इसराएली आपसा-आपसा हात हेनु पर मेले, तव हारून लेवीयान को योहोवा भगवानन सामने इसराएलीया तरप सी हालवेली भेट करीन अर्पण करे कि त्या योहोवा भगवान सेवा चाखरी करने वाळा बने। तव लेवीया आपसा-आपसा हात हिनु वाछड़ान मुनका पर मेले; आरू तू लेवीयान वाटे पापढाकने करीन एक केवड़ो पापबलि आरू दिसराक होमबलि करीन योहोवा वाटे चढ़ावजी। आरू लेवीयान को हारून आरू ओका पोर्यान सामने उबो करजी, आरू हेनको हालवनेन भेट वाटे योहोवा भगवान को अर्पण करजी।
इनीये रीतिये सी लेवीयान क इसराएलीया मा सी अलग करजी, आरू लेवी मारात् मानसे कवासे। आरू जव तू लेवीयान को चुखो करीन हालवली भेट वाटे अर्पण कर देय, ओका बाद मा त्या मिलापवाळा तम्बू सी सम्बन्धित सेवा चाखरी करने करीन माहय आया करे। काहकी त्या इसराएलीया मा सी मखे पूरी रीति सी अर्पण करला छे; हांव हेनु सबन को इसराएलीया मा सी एक-एक बायरन पेहल खुळीयान बदले आपसो कर लीदलो छे। इसराएलीया पेहल खुळीया, चाहे मनुस हय चाहे जनवार हय, सब म्हारा चे; काहकी हांव हेनको उना टेम मा म्हारे वाटे चुखा बनायो जव हांव मिसर देशन सब पेहल खुळीयान को मार न्हाकीयो। आरू हांव इसराएलीयान सब पेहल खुळीयान बदले लेवीयान को ली लेदलो छे। हेनको लीन हांव हारून आरू ओका पोर्यान को इसराएलीया मा सी दान करीन लेवीयाक आप दीदलो छे, कि त्यो मिलापवाळा तम्बू मा इसराएलीयान वाटे सेवा चाखरीन काम आरू पछतावो करीया करे, कदाम असो नी हुय जाय कि त्या इसराएली चुखला जागान साते आवे तव हेनु पर काहय बी मोटी पीड़ा आय पड़े।
लेवीयान वारा मा योहोवा भगवानन यो हुकुम मानीन मूसा आरू हारून आरू इसराएलीयान सारी मण्डळी हेनको सात मा हसात करीया। लेवीया ते आपसान को पाप सी चुखा करीया, आरू आपसा छिंदरान को बी धुय दीदा; आरू हारून हेनको योहोवा भगवानन सामने हालेवली भेटन अनसारे अर्पण करीयो आरू हेनको चुखो करने करीन हेनु वाटे पछतावो बी करीयो। आरू ओका बाद मा लेवीया हारून आरू ओका पोर्यान सामने मिलापवाळा तम्बू मा आपसो-आपसो काम करने गीया; आरू जो हुकुम योहोवा भगवान मूसाक लेवीयान वारा मा नापलो हुतो ओकात् अनसारे त्या हेनु सी करीया। ओळी योहोवा भगवान मूसा सी कयो, जो लेवीयान कुन करनो छे त्यो यो चे, कि पच्चीस सालन उमर सी लगाड़ीन हेका सी जादान उमर मा त्या मिलापवाळा तम्बू सी सम्बन्धी सेवा करे; आरू जव पचास सालन हय ती ओळी उनी सेवान काम करने करीन नी आवे आरू नी काम करे; पुण त्या आपसा भाय बेटान सात मा मिलापवाळा तम्बून पास मा राखवाळीन काम करीया करे, पुन त्या आपसा सेवा न काम नी करे। लेवीयान क जो काम आपे हेनका वारा मा तू हेनु सी हसोत करजी।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.