Dhankavi Bible
गिनती 7
वेदीन अभिषेक आरू डाहडान भेट
ओळी जव मूसा तम्बू तानियो आरू सारो समान क सात मा हेको अभिषेक करीन हेको चुखो करीयो आरू सारा समान क सात मा वेदीन बी अभिषेक करने करीन हेको चुखो करीयो, तव इसराएलीन डाहडा जो आपसा-आपसा आड़ा बुड़ान घरानान मुखी ओदेमड़ा, आरू कुळोन बी डाहडा हुयीन गिनती लेनेन काम पर नेवाड़ला हुता, त्या योहोवान सामने भेट ली आया, आरू हेनकी भेट छव ढुपा छावली गाड़ीया आरू बारेह बयलीया हुता, मतलब दूय-दूय डाहडान तरफ सी एक-एक गाड़ी, आरू एक-एक डाहडान तरफ सी एक-एक बयलीया; हेनको त्या निवासन सामने योहोवा भगवानन सात ली गीया। तव योहोवा भगवान मूसा सी कयो, “उनी चीजन को हेनका सी ली लेयो कि मिलपवाळा तम्बून सेवान काम मा आवे, हतरान करीन हेनको लेवीयान क खास सेवा न अनसारे वाट देयो।” ओळते मूसा त्या गाड़ीया आरू बयलीयान को लीन लेवीयान क आप दीदो। गेर्शोनियान को हेनकी सेवान अनसारे मूसा दूय गाड़ीया आरू च्यार बयलीया आपीयो; आरू मरारियान को हेनकी सेवान अनसारे त्यो च्यार गाड़ीया आरू आठ बयलीया आपीयो; ये सब हारून पुजारान पोर्या ईतामारन हक मा कर दियो गयो। पुण मूसा कहातियान को त्यो काहय बी नी आपीयो, काहकी हेनका वाटे चुखली चीजन यी सेवा चाखरी हुती कि त्या आपसा कान्धा पर हाकली लिया करे। ओळी जव वेदीन अभिषेक हुयो तव डाहडा हेका समर्पणन भेट वेदीन साते ली जाने लागीया। अतरान करीन की योहोवा परमेश्वर मूसा सी कयो, “वेदीन सोपने वाटे डाहडा लोगहन आपसी आपसी भेट आपसा आपसा टाकला दाहड़ा पर चढ़ावे।” हतरान करीन जो ओदेमड़ो पेहले दाहड़े आपसी भेट ली गीयो त्यो यहूदा कुळ वाळा अम्मीनादाबन पोर्यो नहशोन हुतो; ओकी भेट यी हुती, मतलब चुखला जागान शेकेलन हिसाब सी एक सोव तीस शेकेल चाँदीन एक परात, आरू सत्तर शेकेल चाँदीन एक वाटको, या सब दुयू अन्नभेंट वाटे तेल सी सेकायला मैदा सी भरायला हुता; ओळी धूफ सी भरायला दस शेकेल सोनान एक धूपदान; होमबलि वाटे एक केवड़ो, एक गाडरा, आरू एक सालोन एक गाडरीन पीलो; पापबलि वाटे एक बकड़ो; आरू मेलबलि वाटे दूय बयलीया, आरू पाच मेढा, आरू पाच बकड़ा, आरू एक सालन पाच गाडरीन पीला। अम्मीनादाबन पोर्या नहशोन न यी भेंट हुती। दिसरे दाहड़े इस्साकारन डाहडा सूआरन पोर्या नतनेल भेट ली आयो; त्यो यो हुतो, मतलब चुखला जागान शेकेलन हिसाब सी एक सोव तीस शेकेल चाँदीन एक परात, आरू सत्तर शेकेलन चाँदीन एक वाटको, या दुयू अन्नभेंट वाटे तेल सी सेकायला मैदा सी भरायला हुता; ओळी धूप सी भरायला सद शेकेलन सोनान एक धूपदान; होमबलि वाटे एक केवड़ो , एक मेढ़ो, आरू एक सालन एक गाडरीन पीलो; पापबलि वाटे एक बकड़ो आरू मेलबलि वाटे दूय केवड़ा, आरू पाच गाडरा, आरू पाच बकड़ा, आरू एक एक सालन पाच गाडरीन पीला। सूआरन पोर्यान नतनेलन यी भेंट हुती। तीसरे दाहड़े जबूलूनियान डाहडा हेलोनन पोर्या एलीआब भेट ली आयो, मतलब चुखला जागान शेकेलन हिसाब सी एक सोव तीस शेकेलन चाँदीन एक परात, आरू सत्तर शेकेल चाँदीन एक वाटको, या दुयू अन्नभेंट वाटे तेल सी सेकायला मैदा सी भरायला हुता। ओळी धूप सी भरायला दस शेकेल सोनान एक धूपदान; होमबलि वाटे एक केवड़ो, एक गाडरा, आरू एक सालन एक गाडरीन पीलो; पापबलि वाटे एक बकड़ो; आरू मेलबलि वाटे दूय बयलीया, आरू पाच मेढ़ा, आरू पाच बकड़ा, आरू एक सालन पाच गाडरीन पीला। हेलोनन पोर्यान एलीआबन यी भेंट हुती।
चवथे दाहड़े रुबेनियान डाहडा शदेऊरन पोर्यो एलीशूर यी भेट ली आयो, मतलब चुखलाजागान शेकेलन हिसाब सी एक सोव तीस शेकेलन एक परात, आरू सत्तर शेकेलन एक चाँदी वाटको, या दुयू अन्नभेंट वाटे तेल सी सेकायला वारला पीठा सी भरायला हुता; ओळी धूप सी भरायला सद शेकेल सोनान एक धूपदान; होमबलि वाटे एक केवड़ो आरू एक मेढ़ो, आरू एक सालन एक गाडरीन पीलो; पापबलि वाटे एक बकड़ो; आरू मेलबलि वाटे दूय बयलीया, आरू पाच गाडरा, आरू पाच बकड़ा, आरू एक-एक सालन पाच गाडरीन पीला। शदेऊरन पोर्यान एलीशूरन यी भेंट हुती।
पाँचवे दाहड़े शिमोनियान डाहडा सूरीशद्देन पोर्यो शलूमीएल यी भेट ली आयो, मतलब चुखलाजागान शेकेलन हिओसाब सी एक सोव तीस शेकेल चाँदीन एक परात, आरू सत्तर शेकेल चाँदीन एक वाटको, या दुयू अन्नभेंट वाटे तेल सी सेकायला वारला पीठा सी भरायला हुता; ओळी धूप सी भरायला दस शेकेल सोनान एक धूपदान; होमबलि वाटे एक केवड़ो, आरू एक मेढ़ो, आरू एक सालन गाडरीन पीलो; पापबलि वाटे एक बकड़ो; आरू मेलबलि वाटे दूय बयलीया, आरू पाच मेढ़ा, आरू बकड़ा, आरू एक-एक सालन पाच गाडरीन पीला। सूरीशद्देन पोरयान शलूमीएलन यी भेंट हुती।
छटवे दाहड़े गादियान डाहडा दूयेलन पोर्यो एल्यासाप यी भेट ली आयो, मतलब चुखलाजागान शेकेलन हिसाब सी एक सोव तीस शेकेलन चाँदीन एक परात, आरू सत्तर शेकेलन चाँदीन एक वाटको, या दुयू अन्नभेंट वाटे तेल सी सेकायला मेदा सी भरायला हुता; ओळी धूप सी भरायला दस शेकेल सोना न एक धूपदान; होमबलि न वाटे एक केवड़ो, आरू एक मेढ़ो, आरू एक साल न एक गाडरी न पीलो; पापबलिन करीन एक बकड़ो; आरू मेलबलि वाटे दूय बयलीया, आरू पाच, गाडरा, आरू पाच बकड़ा, आरू एक-एक सालन पाच गाडरीन पीला। दूयेलन पोर्यान एल्यासापन यी भेंट हुती। सातवे दाहड़े एप्रैमियान डाहडा अम्मीहूदन पोर्यो एलीशामा यी भेट ली आयो, मतलब चुखलाजागान भेंट शेकेलन हिसाब सी एक सोव तीस शेकेल चाँदीन एक परात, आरू सत्तर शेकेल चाँदीन एक वाटको, ये दुयू अन्नभेंट वाटे तेल सी सेकायला मेदा सी भरायला हुता; ओळी धूप सी भरायला दस शेकेलन सोनान एक धूपदान; होमबलि वाटे एक केवड़ो, एक मेढ़ो, आरू एक सालन गाडरीन पीलो; पापबलि वाटे एक बकड़ो; आरू मेलबलि वाटे दुय बयलीया, आरू पाच गाडरा, आरू पाच बकड़ा, आरू एक-एक सालन पाच गाडरीन पीला। अम्मीहूदन पोर्या एलीशामानन यी भेंट हुती।
आठवे दाहड़े मनश्शेइयान डाहडा पदासूरन पोर्यो गमलीएल यी भेट ली आयो, मतलब चुखलाजागान भेंट शेकेलन हिसाब सी एक सोव तीस चाँदीन शेकेलन एक परात, आरू सत्तर शेकेल चाँदीन एक वाटको, ये दुयू अन्नभेंट वाटे तेल सी सेकायला मेदा सी भरायला हुता; ओळी धूप सी भरायला दस शेकेल सोनान एक धूपदान; होमबलि वाटे एक केवड़ो, आरऊ एक मेढ़ो, आरू एक सालन एक गाडरीन पीलो; पापबलि वाटे एक बकड़ो; आरू मेलबलि वाटे दुय बयलीया, आरू पाच गाडरा, आरू पाच बकड़ा, आरू एक-एक सालन पाच गाडरीन पीला। पदासूरन पोर्या गमलीएलन यी भेंट हुती।
नवे दाहड़े बिन्यामीनियान डाहडा गिदोनीन पोर्यो अबिदान यी भेट ली आयो, मतलब चुखलाजागान भेंट शेकेलन हिसाब सी एक सोव तीसएकेल चाँदीन एक परात, आरू सत्तर शेकेल चाँदीन एक वाटको, ये दुयू अन्नभेंट वाटे तेल सी सेकायला मेदा सी भरायला हुता। ओळी धूप सी भरायला दस शेकेल सोनान एक धूपदान; होमबलि वाटे एक केवड़ो, आरू एक मेढ़ो, आरू एक सालन गाडरीन पीलो; पापबलि वाटे एक बकड़ो; आरू मेलबलि वाटे दुय केवड़ा, आरू पाच गाडरा, आरू पाच बकड़ा, आरू एक-एक सालन पाच गाडरीन पीला। गिदोनीन पोर्या अबिदानन यी भेंट हुती।
दसवा दाहड़ा मा दानियान डाहडा अम्मीशद्दैन पोर्यो अहीएजर यी भेट ली आयो, मतलब चुखला जागान भेंट शेकेलन हिसाब सी एक सोव तीसएकेल चाँदीन एक परात, आरू सत्तर शेकेल चाँदीन एक वाटको, ये दुयू अन्नभेंट वाटे तेल सी सेकायला मेदा सी भरायला हुता; ओळी धूप सी भरायला दस शेकेल सोनान एक धूपदान; होमबलि वाटे एक केवड़ो, आरू एक मेढ़ो, आरू एक सालन एक गाडरीन पीलो; पापबलि वाटे एक बकड़ो; आरू मेलबलि वाटे दुय केवड़ा, आरू पाच गाडरा, आरू पाच बकड़ा, आरू एक-एक सालन पाच गाडरीन पीला। अम्मीशद्दैन पोर्या अहीएजरन यी भेंट हुती।
गियारवे दाहड़े आशेरियान डाहडा ओक्रानन पोर्यो पगीयेल यी भेट ली आयो, मतलब चुखला जागान भेंट शेकेलन हिसाब सी एक सोव तीस शेकेलन चाँदीन एक परात, आरू सत्तर शेकेलन चाँदीन वाटको, या दुयू अन्नभेंट वाटे तेल सी सेकायला मेदा सी भरायला हुता; ओळी धूप सी भरायला दस शेकेल सोनान एक धूपदान; होमबलि वाटे एक केवड़ो, आरू एक मेढ़ो, आरू एक सालन एक गाडरीन पीलो; पापबलि वाटे एक बकड़ो; आरू मेलबलि वाटे दुय केवड़ा, आरू पाच गाडरा, आरू पाच बकड़ा, आरू एक-एक सालन पाच गाडरीन पीला। ओक्रानन पोर्या पगीयेलन यी भेंट हुती।
बारवे दाहड़े नप्तालियान डाहडा एनानन पोर्यो अहीरा यी भेट ली आयो, मतलब चुखलाजागान भेंट शेकेलन हिसाब सी एक सोव तीस शेकेल चाँदीन एक परात, आरू सत्तर शेकेल चाँदीन एक वाटको, ये दुयू अन्नभेंट वाटे तेल सी सेकायला मेदा सी भरायला हुता; ओळी धूप सी भरायला दस शेकेल सोनान एक धूपदान; होमबलि वाटे एक केवड़ो, आरू एक मेढ़ो, आरू एक सालन एक गाडरीन पीलो; पापबलि वाटे एक बकड़ो; आरू मेलबलि वाटे दुय केवड़ा, आरू पाच गाडरा, आरू पाच बकड़ा, आरू एक-एक सालन पाच गाडरीन पीला। एनान पोर्या अहीरान यी भेंट हुती।
वेदीन अभिषेकन टेमे इसराएलन डाहडान तरफ सी रीतिन भेंट यी हुयी, मतलब चाँदीन बारेह परात, चाँदीन बारेह वाटका, आरू सोनान बारेह धूपदान। एक-एक चाँदीन परात एक सोव तीस शेकेलन, आरू एक-एक चाँदीन वाटका सत्तर शेकेलन हुता; आरू चुखला जागान शेकेलन हिसाब सी ये चाँदीन ठीकरा दुय हजार च्यार सोव शेकेलन हुता। ओळी धूप सी भरायला सोनान बारेह धूपदान जो चुखलाजागान शेकेलन हिसाब सी दस-दस शेकेलन हुता, त्या सब धूपदान एक सोव वीस शेकेल सोनान हुता। ओळी होमबलि वाटे सब मेळीन बारेह केवड़ा, बारेह गाडरा, आरू एक-एक सालन बारेह गाडरीन पीला, आपसी-आपसी अन्नभेंट को सात मा हुता; ओळी पापबलिन सब बकड़ा बारेह हुता; आरू मेलबलि वाटे सब मेळावीन चोवीस केवड़ा, आरू साहठ गाडरा, आरू साहठ बकड़ा, आरू एक-एक सालन साहठ गाडरीन पीला हुता। वेदीन अभिषेक हुयनेन बाद मा रीतिन भेंट यीत् हुयी। आरू जव मूसा योहोवा सी वात करने करीन मिलापवाळा तम्बू मा गियो, तव त्यो पछतावान ढाकना पर सी, जो गवाहन पत्रीन पेटारीन ऊपर हुतो, दुयू करूबन विच मा सी ओकी आवाज समळीयो जो ओका सी वात करी रीयो हुतो; आरू योहोवा भगवान ओका सी वात करीयो।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.