गिनती 10

चाँदीन दुय भीरा

1ओळी योहोवा भगवान मूसा सी कयो, 2“चाँदीन दुय भरा ढाळीन बनायो; तू हेनको मण्डळीन बुलावने, आरू डेरान क अगा बढ़नेन काम मा लावजो। 3आरू जव त्या दुयू भीरा फुक्या जाय, तव सारी मण्डळी मिलापवाळा तम्बून झोपला पर थारे पा सेख्टी हुय जाय। 4पुण कदाम एकुत् भीरो फुकाये, ती डाहडा लोगहन जो इसराएलन हजारोन मुखी ओदेमड़ा छे तारे पास मा एखटा हुय जाय। 5जव तुम लोगहन साँस बाँधीन भीराक फुको, ती दखवरो फिरीन डेरानक अगा बढावजो। 6आरू जव तुमू दिसरी वार साँस बाँधीन फूको, ती बुडेवना फिरीन छावनीया मा भरायजो। हेनको भरायने वाटे त्या सास बाँधीन फूकीया। 7आरू जव लोगहन एखटा करीन सभा करनो हय तव बी भीराक फूकजो, पुण सास बाँधीन नी। 8आरू हारूनन पोर्या जो पुजारा छे त्या उना भीराक फुकीया करे। यी वात तुमरी पीढी-पीढी वाटे जोलम रये। 9आरू जव तुमु तुमरा देश मा कोय सतावने वाळा वेरी सी लड़ायने निकळो, तव भीराक को सास बाधीन फूकजो, तव तुमरो योहोवा परमेश्वर को फोम आवसे, तव तुमुक तमरा वेरी सी वाचाड़से। 10तुमरा खुशीन दाहड़ा मा, आरू तुमरा सय टेमेन तिहवारम, आरू मोहनान शुरु मा, तमरा होमबलिया आरू मेलबलियान सात उना भीराक फूकजो; इना सी तमरा परमेश्वर योहोवा तुमरो फोम आवसे; हांव योहोवा तुमरो परमेश्वर छे।”

इसराएलीयान सीनाय जंगल सी निकळीन जानो

11दिसरे सालन दिसरे मयनेन वीसवे दाहड़े वादळो गवाहन ताम्बा पर सी उठ गीयो, 12तव इसराएली लोगहन सीनाय बयड़े सी जाने करीन निकळीया; आरू वादळो पारान नावन जंगलो मा ठेहर गीयो। 13हेनको निकळनो योहोवा भगवानन हुकुमन अनसारे जो त्यो मूसा को आपलो हुतो शुरु हुयो। 14आरू आखा सी पेहले यहूदीयान छावनीन झंडान यात्रा शुरू हय, आरू त्या टुळु बनावीन चालिया; आरू हयेनको सेनापति अम्मीनादाबन पोर्यो नहशोन हुतो। 15आरू इस्साकारीयान कुळन सेनापति सूआरन पोर्यो नतनेल हुतो। 16आरू जबूलूनियान कुळन मुखी डाहलो हेलोनन पोर्यो एलीआब हुतो। 17तव निवास को उतार लीदा; आरू गेर्शोनिया आरू मरारिया जो निवास को हाकलता हुता चालनो शुरु करीया। 18ओळी रुबेनन छावनीन झन्‍डा थुड़ाक अगा हुया, आरू त्या बी टुळु बनावीन चालीया; आरू हेनको सेनापति शदेऊरन पोर्यो एलीशूर हुतो। 19आरू शिमोनियान कुळन सेनापति सूरीशद्देन पोर्यो शलूमीएल हुतो। 20आरू गादियान कुळ पोर्यो सेनापति दूयेलन पोरयो एल्यासाप हुतो। 21तव कहातियान कुळ चुखली चीजोन को हाकलीन चालनो शुरु करीया, आरू हेनको पुगने तक गेर्शोनिया आरू मरारिया निवास को उबा कर दीदा। 22ओळी एप्रैमियान टुळान झण्डा थुड़ाक अगा हुया, आरू त्या बी टुळु बनावीन चालीया; आरू हेनको सेनापति अम्मीहूदन पोर्यो एलीशामा हुतो। 23आरू मनश्शेयान जातीन सेनापति पदासूरन पोर्यो गमलीएल हुतो। 24आरू बिन्यामीनियान कुळन सेनापति गिदोनीन पोर्यो अबिदान हुतो। 25ओळी दानिया न छावनी जो सब छावनीयान पछळ हुती, हेका झण्डो अगो जानो शुरु हुया, आरू त्या बी टुळु बनावीन चालीया; आरू हेनको सेनापति अम्मीशद्दैन पोर्यो अहीएजेर हुतो। 26आरू आशेरियान कुळन सेनापति ओक्रानन पोर्यो पगीयेल हुतो। 27आरू नप्तालियान कुळन सेनापति एनान पोर्यो अहीरा हुतो। 28इसराएली इनीये रीतिये पासा-आपसा टुळान अनसारे चालनो शुरु करीया, आरू अगा जाता रयतला। 29मूसा ओका सेसरा रुयेल मिद्यानीयान पोर्या होबाब सी कयो, “हामु उना जागान यात्रा करजे जिनान वारा मा योहोवा भगवान कयलो छे कि हांव उना जागाक तुमको आपीस; हतरान करीन तू बी हामरे साते चाल, आरू हामु थारी भलाय करसु काहकी यहोवसा भगवान इसराएलन वारा मा वारूब हये असो कयलो छे।” 30होबाब जवाब दीदो, “हांव नी जाव; हांव म्हारा देश आरू म्हारा जाती वाळाम पछो जाती रयीस।” 31ओळी मूसा कयो, “हामुक मत छोड़े, काहकी हामुक जंगलो मा काह-काह डेरा उबा करनो जुळे यो तुकत् पतु छे, तू हामरे वाटे अगवाय करजी। 32आरू कदाम तू हामरे साते आवे, ती छाचो जो भलाय योहोवा भगवान हामरे साते करसे ओकात् अनसारे हामु बी थार सी करसु।”

लोगहन को चालीन जानो

33ओळी इसराएलीया योहोवा भगवान बयड़ा सी अगा आवीन तीन दाहड़ान यात्रा करीया; आरू उना तीनु दाहड़ा मा वाटीये योहोवान वाचान पेटारी हेनका वाटे आरामन जागो हेरतो जाईन हेनको अगळ-अगळ चालतो रीयो। 34आरू जव त्या छावनीन जागा सी अगा चालता हुता तव दाहड़ो भरीन योहोवा भगवानन वादळो हेनको ऊपर साहळो करतो रयतो हुतो। 35आरू जव-जव पेटारी लीन अगो चालनो रयतलो तव-तव मूसा यो कयतो रयतलो, “ए योहोवा, उठ, आरू थारा वेरी तितर-वितर हुय जाय, आरू थारा वेरी थारे सामने रयीन डास जाय।” 36आरू जव-जव त्यो ठेहर जातलो तव-तव मूसा कयतो रयतलो, “ए योहोवा, हजारो–हजार इसराएलीया मा पछो फिरीन आय जा।”