गिनती 11

इसराएलीयान कुड़कुड़ायनो, आरू ओको डण्ड भुगतनो

1ओळी त्या लोगहन आपना दु:खन कारण कुड़-कुड़ायने आरू योहोवा भगवानन समळायता बुरो कयने लाग गीया; योहोवा समळीयो, आरू ओकी रीस बड़की उठी, आरू योहोवा भगवानन आगठी हेनका विच मा धप उठी, आरू छावनीन एक किनारा सी भसम करने लागी। 2तव लोगहन मूसान पास मा आवीन आयड़ने लाग गीय; आरू मूसा योहोवा भगवान सी विनता करीयो, तव त्यो आगठो वुलवाय गीयो, 3आरू उना जागान नाव तबेरा1 पड़ गीयो, काहकी योहोवान आगठो धप उठलो हुतो।

खानान वाराम शिकायत

4ओळी जो मेळती-जुळती भीड़ हेनका सात मा हुती त्या कुहराय करने लागीया; आरू इसराएली बी ओळी पछा रड़ने आरू कयने लागीया, “हामुक खाने कुन आपसे। 5हामुक त्या माछा फोम छे जो हामु मिसर देश मा रिकामा खाया करता हुता, आरू त्या काकड़ा, आरू डांगरा, आरू सकरिया, दंगळीया, आरू लसन बी; 6पुण हाय हामरो जीव उब गयला छे, याँ ते इना मन्नाक छुड़ीन आरू काहलो भातीन खानो देखाय नी पड़तो।” 7मन्नो ते धनिया सारको हुतो, आरू ओको रंग ते रूप मोती सारकलो हुतो। 8लोहगन उको अथान-अथा जाईन एखटा करे, आरू चक्की मा दळ या उखळो मा कुटता हुता, ओळते तवला मा चड़वे, आरू ओका फुलका बनवाता हुता; आरू ओको सवाद तेल मा बनला पुआन सारको हुतो। 9आरू राती जव छावनी मा उसटो पड़तो हुतो तव ओका सात मा मन्ना बी पड़ीया करतलो। 10आरू मूसा सब घोरानान ओदेमड़ान को आपसा-आपसा डेरा र रड़तला समळीयो; आरू योहोवान रीस घण जबर भड़की, आरू मूसाक भुण्डो मालम हुयो। 11तव मूसा योहोवा भगवान सी कयो, तू थार दास सी अतरो भुण्डो काह करे? आरू काय कारण छे कि हांव थार निगाम थारी दया वाटे नी रीयो, कि तू हेनु सब लोगहन को भार म्हारे ऊपर न्हाक दीदो? 12काय या सब लोगहन म्हारात् खुळा मा पड़ला हुता? काय हांवत् पयदा करीयो काय, जो तू म्हारे सी कये, कि जसो बाप दूध पीनिया बाळा को आपसा खुळाम हाकलीन फिरे, हसोत हांव बी इनु लोगहन को खुळाम हाकलीन उना देश मा ली जाम, जिना आपनेन कसम तू हेनका डाहडा सी खादलो छे? 13मखे अतरोसवटो मास काह सी जड़से कि हांव इनु सब लोगहन को आपो? यो कयीन कि म्हारे पास रड़ी रीया, कि तू हामूक मांस खाने करीन आप दे। 14हांव एखलोत इनु सब लोगहन को भार हाकली नी सकतलो, काहकी यो म्हारी ताकत सी बाहर छे। 15आरू जो तुको म्हारे सात मा असोत् व्यवाहर करनो छे, ती म्हार पर थारी अतरी दया हुयने दे, कि तू मखे एकदम सी मारले, जिना सी हांव म्हारी हालत नी देख सको।

मूसान लारे सत्तर अगळवानीयान क नेवाड़नो

16योहोवा भगवान मूसा सी कयो, “इसराएली वेगला डाहडा माईन सत्तर असा ओदेमड़ा म्हारे पास एखटा कर जिनुक तू जाने कि त्या परजान पुडारीया आरू हेनका सरदार छे; आरू मिलापवाळा तम्बून पास ली आवे कि त्या थारे सात मा ञ्या उबा रये। 17तव हांव उतरीन थार सी वात करीस; आरू जो आत्मा थारे मा चे ओका मा सी लीन थुड़ीक हांव हेनुमा समाड़ीस; आरू त्या इनु लोगहन को भार थारे सात हाकलसे, आरू तुको उको एख्लोत् नी हाकेलनो पड़े। 18आरू लोगहन सी कय, वाहने वाटे आपसा-आपसा को चुखा करे, तव तुमको मास खाने जड़से; काहकी तुमु योहोवान समळता यो कयीन रड़ीया, कि हामुक मास खाने कुन आपसे? हामु मिसर मात् वारला हुता। अतरान करीन योहोवा तमको खाने करीन आपसे, आरू तमु खाजो। 19ओळी तमु एक दाहड़ु, या दुय, या पाच, या दस, या वीस दाहड़ात् नी , 20पुण मयनो भरीन उको खाता रयसो, जव तक त्यो तमरा नाको सी नी निकळे आरू तमुक उको सी घीन हुय जासे, काहकी तम लोगहन योहोवा को जो तुमरे वीच मा छे ओको रीकामो जानीया, आरू ओका सामने यो कयीन रड़ीया कि हामु मिसर देश मा सी काह निकळीन आया?” 21ओळी मूसा कयो, जिन लोगहनन वीच मा हांव छे ओका माईन छव लाख ते पीयादा छे; आरू तू यो कयो कि हांव हेनको अतरो मास आपो कि त्या मयनो भरीन खाया करे। 22काय त्या सब गाडरा-बकड़ा, गाय–बयलीया हेनको वाटे मारो कि हेनको मास जड़े? या काय दोरीयान सब माछला हेनको वाटे एख्टी करो, कि हेनको मास जड़े 23योहोवा भगवान मूसा सी कयो, “ काय योहोवान हात नानो हुय गीयो? हाय तू देखीस कि म्हारो वचन जो हांव थार सी कयलो छे त्यो पूरो हुये किनी हुये।” 24तव मूसा बाहर जाईन परजान लोगहन को योहोवा भगवाण वात कयीन समळाड़ीयो; आरू हेनका डाहडा माईन सत्तर ओदेमड़ान को एखटा करीन तम्बून च्यारो मेर उबा करीया। 25तव योहोवा भगवान वादळा मा हयीन उतरीयो आरू त्यो मूसा सी वात करीयो, आरू जो आत्मा मूसा मा हुती ओका मा सी लीन उना सत्तर पुरनिया मा समाड़ दीदो; आरू जव त्या आत्मा ओका हेनका़ जीव मा आवी तव त्या भविष्यद्वाणी करने लागीया। पुण ओळते पचा कदी नी करीया। 26पुण दूय मनुस छावनी मात् रय गीया हुता, जिनुमा सी एकन नाव एलदाद आरू दिसरा को नाव मेदाद हुतो, उनामा वी आत्मा आयो; यी वी ओकज मा सी हुती जेरो नाव लिख्यो लियो गयो हुतो, बाखिन तम्बू क पास नी गयो हुतो,आरू हुये छावनी त मा नबूवत कोरने लाग्या। 27तव काहनो जुवान न दौड़िन मूसा क बतलायो, की एलदाद आरू मेदाद छावनी मा नबूवत कोरने वाज रोया। 28तब नुन क पुर्य यहोशू, ज मूसस क सेवक आरू ओका नेवाड़ला वीरों मासी हुतो, हुयो मूसा सी कयो, “हे मारा स्वामी मूसा, हेनूक रूक दे।” 29मूसा न हेरेसी कोयो, “काय तू मारे कारण हेनू पर रिस राखे? भलो होयतो की योहोवा क आखी प्रजा क मानसे नबी होयता, आरू योहोवा आपना आत्मा हेनू सब मा सोमवाड़ देतो!” 30तब ओळी मूसा इसराएल क पुरनियों भैळ छावनी मा चाली गोयो।

योहोवा क भीनी सी लावरा

31तब योहोवा क भेनी सी एक मोटी आँधी आवी, आरू हुयो दोरीया सी बटेरे उड़ावीन छावनी पोर आरू ओका च्यारू मेर ओतरी ली आवी, की हुये ओथान-ओथा एक दाहड़ा क वाट लोगुन भुमी पोर दुय हात क लगभग उचे लोगुन छाय गोय। 32आरू मानसे उठिन तेने दाहड़ू भोरिन आरू रात भोरीन , आरू दिसरे दाहड़े वी दाहड़ू भोरिन लावरान क एकठा कोरता रोया; जे कोम सी कोम एकठा ओक हुयो दस होमेर एकठा कोर्या; आरू हुये हेनुक छावनी क च्यारू मेर फैलाय देदा। 33मांस ओका मुयो मा त हुतो, आरू हुये हेनाक खाय नी पाया हुता की योहोवा क कोप हेनु पोर भोड़की उठ्‌यो, आरू हुयो ओको घोनी मोटी महामारी सी मार्यो। 34आरू ओका जागा क नाव किब्रोथत्तावा पोड़्यो, काहकी जेनू मानसो न लालुच हुती ओको होंया धुळू आप्या। 35ओळी इसराएली किब्रोथत्तावा सी प्रस्थान कोरिन हसेरोत मा पुग्या, आरू होयात रोया।