Dhankavi Bible
गिनती 25
इसराएलियान व्यभिचार
जब इसराएली शित्तीम नगर मा रयता हुता, आरू त्या लोगहन मोआबी पोरायून क सात मा भुण्डलो काम करने लागीया। पुरायटा न इसराएलियो क आपनो देवताओं क बलिभोज मा नेवतो आपीया। इसराएलियों न बलि-भोज खादो आरू ओका देवता क झुकीन वंदना कोर्यो। अस करीन इसराएली बालपोर देवत क पुजा क दासत्व मा फंस गुयो। अत: पोरबुन रीस इसराएलियों क विरुद्ध भड़क उठ्यो। पोरबु न मूसा सी कव्यो, इसराएलियों क सब डाहडा क ले, आरू मक-पोरबु क अगळ ओक तोपोम लोटकाड़ देदा, जेरेसी म्हारी रीसोन आगठो इसराएल सी लौटिन नांबे होय जासे। मूसा न इसराएलियो क शासको सी कव्यो, तुमू आपना उना सब मानसो क वध करू ज बालपोर देवता क पूजा मा भेसकाय गयला छे, हेनको म्हार न्हाक।
जब इसराएली समाज मिळन-शिविर क झपला पोर शोक मनाय रयो हुतो, एक इसराएली मानुस आयो। हुयो मूसा एने सब मंडळी क डुळा क सामने आपना परिवार मा एक मिद्यानी बायोर क ली आयो। जब पुजारो हारून क पौत्र आरू एलीआजर क पुर्य पीनहास न यो देख्या, तब हुये मंडळी क विच सी उठ्यो। हुयो आपना हाथ मा एक भालो लिदो आरू हुयो इसराएली मानुस क पछळ-पछळ सुवन्या कमरा मा गुयो। होंया हुयो दुयोक, इसराएली मानुस एने मिद्यानी बायोर क डील क भाला सी बेध देदा। अस करीन महामारी, ज इसराएल समाज मा फैल गुय हुती, रुकाय गोय। ओळी वी महामारी मा मार्या गुया लोगहन क संख्या चौबीस हजार हुता।
योहोवा मूसा सी कव्यो, हारुन पुजारान क पोता एलीआजर क पोर्यो पीनहास, जिना सी इसराएली समाज पोर सी म्हारा प्रकोप क लौटिन नांबे कोरलो छे। उन लोगहन मा हुये एकुत् असो मानुस जेरेम म्हारी रीस हेनू पर सी दूर करीयो। कि हांव रीस मा आवी नास नी करो तू उनासी कहजो, देखू, जाव ओक शांती क आपनो विधान प्रदान करो। यो ओका लिय आरू ओका वाद ओका ओवळियाद क लिय स्थायी पुजारा-पद क विधान होयसे; काहकी हुये आपना परमेश्वर क लिय उत्साह देखाड़ीयो हुतो, आरू इसराएली लोगहन क लिय पोसतावो कोर्यो हुतो।
ओक वध कोर्या गुया इसराएली मानुसोन नाव जिम्री हुतो जेरो वध मिद्यानी बायोर क साथ कोर्यो गुयो हुतो। हुयो सालू क पुर्य आरू शिमोनी बासोन-कुळ क एक घोरानन डाहलो हुतो। आरू जे मिद्यानी मरली बायोर क नाव कोजबी हुतो। हुयो सूर नू पुराय हुती, ज मिद्यानी बासोन-कुळ क एक कुळ क डाहलो हुतो।
योहोवा मूसा सी कव्यो, मिद्यानी क सताळ, ओक मार; काहकी हुये पओर क वाराम मा छळ-कपट करीन तुमूक सताळ्या हुता। हुयो आपना जाति-बहिन, अर्थात् मिद्यानी क डाहलान पुराय कोजबी क वाराम छळ-कपट कोर्यो हुतो, जेरो वध पोर क पूजा क कारण फैली महामारी क दाहड़े कर्यो गुयो हुतो।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.