गिनती 23

बिलामन पेहली भविष्यद्वाणी

1बिलाम न बालाक सी कव्यो, यां म्हारे लिय सात वेदियाँ बोनाव, आरू यां म्हारे लिय सात बुईल आरू सात गाडरा क तयारी कोर दे। 2बालाक न बिलाम क वचन क ओनसारे कोर्यो। बालाक आरू बिलाम न होरीक वेदी पोर एक बुईल एने एक गाडरो चड़ाया। 3बिलाम न राजा बालाक सी कव्यो, तू आपना आगठान-बलि क धड़ उबो रोह। हाव जाईस; कदाचित् योहोवा सी मिळने क लिय आवे। ज काहीन हुयो मक देखाड़से ओक हाव तुख बताड़ीस। बिलाम उजाड बोयड़ा पोर गयो।

4परमेश्वर बिलाम सी मिळ्यो। बिलाम न ओका सी कव्यो, हाव सात वेदियाम तियारी कोरलो छे, आरू हरीक वेदी पोर एक बुईल एने एक मेढ़ो चोड़ावलो छे। 5अत: योहोवा बिलामन मुय मा बुल डाल्यो आरू कव्यो, बालाक क पास लौटी जा। तू उना सी यो कहजी। 6बिलाम बालाक क पास लौटी आयो। बालाक आरू मोआब क आधिकारी ओक आगठान-बलि क धड़े उबो हुतो। 7बिलाम न आपनी गाथा गावनो शुरू कोर्यो। हुयो गायो:

बालाक न, मोआब क राजा न

मक सीरिया देश सी,

उगेवना बोयड़ा सी बुलायो:

आवू , म्हाते लिय याकुब क शराप आपू,

आवू, इसराएल क निंदा करू।

8हाव ओक कसो शराप आपो

जिनाक परमेश्वर न शराप नी आप्यो?

हाव ओकी कसो निंदा करो

जेरी पोरबू न निंदा नी कर्यो?

9चट्टान क चोटी पोर सी,

हाव ओक देखलो छे,

बोयड़ा सी

हाव ओक अवलोकन कोरलो छे :

देखू, मानसे अलग बोसला छे,

दिसरा देश क साथ ओकी गितनी नी कर्या!

10याकुब क असंख्य ओवलियाद क कुन गिन सकतो छे?

कुन गिनती कोर सकतो छे इसराएल क करोड़ो नू?

भलो होय की म्हारी मौत निष्कपट मानुस क जसो होय!

म्हायो आखरी उना लोगहन जसो होय!

11राजा बालाक न बिलाम सी कव्यो, यो तुमू म्हारे साथे काय कोर्या? हाव हाव तुक आपना दुसमोल क श्राप आपने क लिय लाव्यो हुतो, पुन तुमू उना पोर बोरकोत नू सालन कोर देदो! 12बिलाम न जवाब आप्यो, जे काहिन योहोवा म्हारा मुयो मा डालतलो छे काय ओक बुलने क मक धियान नी राखनो चायजे?

बिलामन दिसरी भविष्द्वाणी

13बालाक न उनासी कव्यो, आवू, म्हारे साथे दूसरा जागा क चालू जां सी तूमू ओक देख सकतो होय। यां सी तूमू निकतवर्ती लोगहन क ज देख सकता होय, उना सबको नी। तुमू होंया सी म्हारे लिय ओक शराप आपजो। 14अत: हुयो ओक सोपीम नावोन खोयड़ा मा, पिसगा की चोटि पोर ली गुयो। हुये होंया सात वेदियां बोनायो आरू होरीक वेदी पोर एक बुईल आरू एक गाडरा चोड़ायो। 15बिलाम न बालाक सी कव्यो, तू यां आपनी आगठान-बलि क धड़े उबो रोह, तब लगुन हाव पोरबू सी होंया भेंट करीस। 16योहोवा बिलाम सी मिळ्यो। त्यो ओका मुयम बुल डाल्यो आरू ओकासी कव्यो, बालाक क पास लौटी जा। तू ओकासी यो कहजी। 17बिलाम बालाक क पास आयो। बालाक आपनी आगठान-बलि क धड़े उबो हुतो। ओका साथ मोआब क आधिकारी हुतो। बालाक न उनासी पुछ्यो, योहोवा काय कयो?

18बिलाम न आपना गीत गावनो शुरू कर्यो। हुयो गायो,

ऐ बालाक उठ, आरू म्हारी वात सामळ!

ऐ सिप्पोर क पुर्या, म्हारी वात पोर कानटा लागाड़;

19परमेश्वर मनुष्‍य नी होय की हुयो झुट कोहसे,

आरू नी हुयो मानुसोन पुर्यो छे की हुयो पोसतावो कोरे!

ज हुयो कव्यो, काय हुयो ओक नी कोरे?

ज हुयो कव्ये,काय हुयो ओक पुरो नी कोरे?

20देखू, बोरकोत ही आपननेन हुकुम मक मिळ्यो:

परमेश्‍वर बोरकोत आप चुक्यो छे,

आरू हाव ओक रद्द नी कर सकतो!

21हुयो याकुब अवलियाद मा बुराई नी देख्यो,

आरू नी इसराएल मा काठो देख्यो।

उनको पोरबू परमेश्वर ओका साथ छे;

हुयो ओक राजा छे।

उनामा राजा क जय-जयकार होये छे।

22परमेश्वर नओक मिस्र देश सी बाहर निकाळ्लो छे:

उनामा जंगली बयल्या क जसो ताकोत छे।

23याकुब पोर काई मनत्र नी चाल सकतो,

इसराएल क विरुद्ध साहळान क काम नी होय सके।

हेमी याकुब क वाराम यो कव्यो जासे,

परमेश्‍वर न इसराएल मा कसो ओकाबोकी वाळो काम कोर्यो!

24देखू, इसराएली लोगहन क!

हुये सींहनी जसा उठ रोया छे।

हुये नाहार क जसा आपसा क उचा उठाय रोया।

जब तक नाहार आपना शिकार नी खाय जाय

आरू आपना अहेर क लुहूय नी पिये तब लगुन

हुयो नी लुटे।

25तव बालाक बिलाम सी कव्यो, वारू! तुमू नी ते ओक शराप आपू, आरू नी बोरकोत ही। 26पुन बिलाम न बालाक क जवाब आप्यो, काय हाव तुक यो नी कव्यो हुतो , जो काई योहोवा म्हारे सी कोहसे, चोंत हाव करीस।

बिलामन तीसरी भविष्द्वाणी

27बालाक न बिलाम सी कव्यो, आरू , हाव तुक दिसरा जागा पोर लि जाईस। हळको यो छे परमेश्वर नू निगा मा वारू लागतो होय की तुमू होंया सी म्हारे लिय ओक शराप आपू। 28तव बालाक बिलाम क पोरन कातर पर ली गुयो, जा रयीन निर्जन प्रदेश देखाय पड़े। 29बिलाम न बालाक सी कव्यो, यां म्हारे लिय सात वेदियाँ बोनायो, आरू ये म्हारे लिय सात बुईल आरू सात गाडरा क तयारी कोर। 30बालाक न बिलाम क बुलोन ओनसारे कोर्यो। हुयो होरिक वेदी पोर एक बुईल एने एक गाडरा चोड़ायो।