गिनती 22

राजा बालाकन लारे बिलाम क मोकलनो

1तव इसराएलिया अगा चालीया, आरू यरीहो न पास यरदन नदी न इने पार मोआब न अराबा मा पड़ाव डाल्या। 2सिप्पोर न पोर्यो बालाक देखियो कि इसराएल एमोरीया सी काय काय करिया। 3अतरान करीन मोआब यो जानीन की इसराएली घण सवटा छे, हेनू लोगहन सी घणा बीह गिया; याँ तक कि मोआब इसराएलीयान कारण घण घबराय गियो। 4तव मोआहुये मिद्यानी क धर्मन डाहडा सी कव्यो, हेमी यो टुळो हामरे आस-पास क सब लोगहन क असो खाय जासे जसो बयल्यो खोयड़ा क घास खाय जातलो छे! तेने टेमे सिप्पोर क पुर्य बालाक मोआबन राजा हुतो। 5हुयो बोर क पुर्य बिलाम क बुलावने क लिय ओका पास पतोर नगर क दुत मुकल्यो, ज फरात नदि क धोड़े, अमाव देश मा छे। हुयो कव्यो, देखु, ये मानसे मिस्र देश सी आवला छे। ये धरतीन सतह क ढाक लेदा छे, आरू हेमी ये म्हारा देश क अगळूत बोस गयला छे। 6हेमी गिनकोर, तुमू जावु आरू म्हारे लिय एनू लोगहन क शराप आप; काहकी ये म्हारे जादा ताकोतवाळा छे। तब कदाम हाव उना पराजित कोर सको, आरू आपना देश सी बाहर निकाळ सको। यो हाव जानो,जेना मानुस क तुमू बोरकोत आपता होय, हुये बोरकोत सी भरायला होय जातलो छे, आरू जेना मानुस क श्राप आपता होय , हुयो श्रापित होये।

7मोआब आरू मिद्यानी डाहडा अगलो सार देखने करीन भेंट लिन चालीया। आरू बिलाम न पास मा पुगीन बालाकन यी वात समळाड़ीयो। 8त्यो हेनको कयो, यां आज रात ठहरू। जसो योहोवा म्हारे सी कहसे तसो हाव तुख जवाब आपीस। अत: मोआब क आधिकारी बिलाम क पास ठहर गुयो। 9परमेश्वर बिलाम क पास आयो। त्यो पुछ्यो, तारा साथ ये मानुस कुण छे? 10बिलाम न परमेश्वर सी कव्यो, मोआब क राजा, सिप्पोर क पुर्य बालाक न म्हारे पास यो खोबोर मुकल्यो छे: 11देखू , ये लोगहन मिस्र देश सी आवला छे। हुये धरती क सतह क ढाक लेदला चे। हेमी गिन कोर आवू; आरू म्हारे लिय एनू लोगहन क‍ शराप आप; तब कदाम हाव एनू सी युद्ध कोर सकीस, आरू आपना देश सी बाहर निकळी सकीस। 12परमेश्वर न बिलाम सी कव्यो, तू बालाक क लोगहन क साथ नी जासे, आरू उना लोगहन क शराप नी आपे; काहकी हुये म्हारी बोरकोत पावला लोगहन छे,

13बिलाम संदारे उठ्यो। हुयो बालाक क आधिकारियों सि कव्यो, तुमू आपना देश लौटी जावू, काहकी पोरबु म्हारे साथ जानेन छुट आप दे। 14मोआब क आधिकारी उठिन चाली गुयो। हुये बालाक क पास आव्या। त्या कव्या, बिलाम न हामरे साते आवनो मोना कर देदो।

15बालाक न ओळी: आधिकारी क मुकल्यो,ज पहले अधिकारियों सी जादा नावसादिया आरू संख्या मा सवटा हुता। 16हुये बिलाम क पास आव्या। हुये ओकासी कव्यो, सिप्पोर क पुर्य राजा बालाक यो कोहे छे कि म्हारे पास आवनो अस्वीकार झुणी कोरू। 17हाव तुमरो घनोजादा विजुत करीस। ज काहिन तुमू म्हारे सी कवसू, हाव चोंत करिस। गिनकर आवू आरू म्हारे लिय एनू लोगहन क शराप आपू। 18बिलाम न बालाक क सेवको सी कव्यो, चाहे बालाक सोनो-चांदी सी भरलो आपनो घर मक प्रदान करे, ती वी हाव आपना पोरबू परमेश्वर क हुकूम क तुड़नो नी कोर सकतो। उकासी जादा एने कोम नी कोर सकतलो। 19पुन तू आज नू रात वी ठहर जेरेसी हाव जान सको की योहोवा म्हारे सी आरू काय कोहसे। 20परमेश्वर बिलाम क पास रात मा आयो। त्यो उना सी कव्यो, कदाम ये मानसे तुक बुलावने क लिय आवे ती उठ, आरू ओका साथ जा। पुन ज वात हाव तारे सी कोहिस, तू ओकज ओनसारे कोरजी।

बिलाम आरू हेकी गदड़ी

21बिलाम संदारे उठ्यो। हुयो आपना गदड़ीन क काठी कस्यो, आरू मोआब क आधिकारीयान क साथ गुयो। 22बिलाम क जाने क कारण परमेश्वर क रिस भड़की उठ्यो। योहोवा क दूत ओक विरोध करने क लिय वाट मा अड़िन उबो हुय गुयो। बिलाम आपासी गदड़ी पोर सवार हुतो, आरू ओका दुय सेवक ओका साथ हुता। 23गदड़ी न देखी की योहोवान क दूत वाट क विच मा आपना हाथ मा तलवार लीन उबो हुतो। अत: गोदड़ा वाट सी हटिन खोयड़ा मा चाली गुय। बिलाम न गोदड़ा क वाट पोर लौटाड़ने क लिय कुट्यो। 24तब योहोवान दूत अंगूय क वाड़ी क विच तंग गली मा, जेरा दुय अख्ये बाड़ा क भितड़ो हुतो, उबो हुयो गुयो। 25जब गदड़ी न योहोवा क दूत क देख्यो, तब हुयो भितड़ा सी चिपकी गुय आरू हुयी बिलाम क पाय भितड़ा सी दबाय देदो। अत: हुयो ओका ओळी मार्यो। 26योहोवा क दूत ओळी: अगो बढ़िन असो तंग जागा मा उबो हुय गुयो, जां नी जेवड़्ये अख्ये वाट हुती, आरू नी डाखर्ये अख्ये। 27जब गदड़ी न योहोवा क दूत क देख्यो तब गदड़ी बिलाम क लिन नेचो बस गयो। बिलामन रीस भोड़की उठ्यो। हुयी लाकुड़ सी गोदड़ी क कुट्यो। 28तब योहोवा न गदड़ी क मुय खुल देदो। हुयो बिलाम सी कव्यो, हाव तारे साथ काय कोरलो छे की तीन वार देदो? 29बिलाम न गदड़ी सी कव्यो, तुन मक हांसीन पात्र बनलो छे। कदाम म्हारा हाथ मा तलवार रोहती ती हाव हेमी लगुन तुख मार देतो। 30गोदड़ी न बिलाम सी पुछी, काय हाव तारी त्यात् गदड़ी नी हय, जेरे पर तू थारा बाळपना सी आज लगुन बठतो आवलो छे? काय हाव तारे साथ असो वेवहार कोरनेन टेळ छे? हुयो कव्यो, नी!

31तब योहोवा न बिलाम क डुळा उखाड़ देदो। हुयो देख्यो की पोरबू क दूत वाट क वीच मा आपना हाथ मा तलवार लिन उबो छे। अत: हुयो झुक गुयो। हुयो मुयोन भुरसे पोड़िक ओक नमस्कार कर्यो। 32योहोवान दूत न हेका सी कयो, तुन काहा आपसी गदड़ी क तीन वार देदो? देख, तारो विरोध करने क लिय हांव आवलो छे; काहकी म्हारे अगळ तारी वाट उलटी होयली छे। 33गदड़ी मुक देखिन तीन वार म्हारे अगळ सी हट गुय। कदाम हुयी म्हारे अगळ सी नी छेटी हुयती ती छाचिन तारो वध कोर नाखतो, पुन ओक जीवतलो छुड़ देदो। 34बिलाम न योहोवा क दूत सी कव्यो, हाव पाप कोर्‌यो। हाव नी जानतो हुतो की तू म्हारो सामनो करने क लिय वाट क विच उबो छे। हेमी, कदाम यी तारी निगा मा भुंडो छे ती हाव पछो जात रयो। 35योहोवा क दूत न बिलाम सी कव्यो, तू एना मानुस क साथ जा; पुन ज बुल हाव तारे सी कोहीस, तू हंयोत कोहजी। अत: बिल्हाम बालाक क आधिकारीयों क साथ चाली गुयो।

राजा बालाकन लारे बिलामन आव भाव

36राजा बालाक न सोमळ्यो की बिलाम आवने बाज रयो। एकालिय हुयो ओका सी भेंट करने क लिय मोआब क उना नगर क गुयो ज अर्नोन नदि क काकड़ पोर छे ने ज देश क सीमान्त पोर स्थित छे। 37राजा बालाक न बिलाम सी कव्यो, काय हाव तुक बुलावने क लिय दुत नी मुकल्यो हुतो? तब तु म्हारे पास काहा नी आयो, काय हतू सुचतो होय की वारू विजुत नी आप सकतो? 38बिलाम न बालाक सी कव्यो, देख, हाव तारे पास आय गुयो। पुन हेमी हाव काय कोय सकतलो? जे बुले परमेश्वर म्हारा मुय मा डालसे, ओकज हाव कहीस। 39एरे वाद बिलाम राजा बालाक क साथ गुयो। हुये किर्यत-हसोत नगर गुया। 40बालाक बयल्यो आरू गाडरा बकड़ान बलि चोड़ायो आरू बिलाम एने आधिकारीयों क , ज ओका साथ हुता, बलि क मांस मुकल्या।

41दिसरे दाहड़े संदारे बालाक बिलाम क लिन बामोतबाल पोर चोहड़्या जां सी हुये निकटवर्ती इसराएली लोगहन क देख सकता हुता।