गिनती 21

कनानी राजा पर जीक

1जव अरात क कनानी राजा न , ज नेगेबन दक्खिन मा रोहतो हुतो, सोमळ्यो की इसराएली अतारीम क वाट सी आय रोया, उनीत् वाट सी इसराएलियो बी आय रिया, त्यो इसराएलिया सी लड़ायो आरू ओकामा सी काहीन लोगहन क बन्दी बोनाय लिदो। 2इसराएलियो न योहोवा दी यी मानता मान्यो आरू कयो, कदाम तू एनू लोगहन क हामरे हाथ मा आप दिस, ती हामू इना नगर पुरो खतम कोर देसु। 3योहोवा न इसराएलियो क बुल सोमळ्यो। हुयो कनानियो क ओका हात मा सौंप देदो। एने इसराएलियों न ओक एने ओका नगर क पुरो नाश कोर देदा। अस करीन ओका जागान नाव होर्मा1 पोड़्यो।

पीतळन बनलो घड़सो

4हुये होर बोयड़ा सी प्रस्थान कर्यो। हुये एदोम देश क किनारे-किनारे जाने क लिय अकाबा क खाड़ी क वाट पोर चाल पोड़्यो। वाट मा चालता-चालता लोगहन घण दु:खी हुय गुयो। 5हुये परमेश्वर आरू मूसा क विरूद्ध कहने लाग्यो, तू हामूक मिस्र देश सी निकाळीन एना निर्जन-पोरदेश मा काहा लायो? काय हामूक मारने क लिय? यां नू रूटा छे आरू नी पानी। हामू एना खुटला रूटा सी, जेरेसी पेट नी भोराये, ऊब गयला छे। 6तब योहोवा न लोगहन क विच आग्नेय घड़सान क मुकल्यो ज ओक डस लेदो। एने: घोना इसराएली मोर गुया। 7लोगहन मूसा क पास आव्या। हुये कव्या, हामू योहोवा आरू तारे विरुद्ध बुलीन पाप कोरला छे। पोरबू सी विनता कोर की हुये हामरे विच सी घड़सा क नांबे कोर। मूसा न लोगहन क लिय पोरबू सी विनता कोर। 8योहोवा न मूसा सी कव्यो, एक आग्नेय घड़सान सहलाणी बन्यो आरू ओक एक खांबा पोर टांग्यो। जब घड़सा सी डसला मनुस ओक देखसे, तब हुयो वाच जासे। 9अत: मूसा न पीतळ क एक घड़सो बोनायो आरू ओक एक खांबा पोर टांग्यो दिदो। कदाम आग्नेय घड़सो कुई मानुस क काटनो हुतो ती हुयो पीतळ क घड़सा क देख्यो आरू वाच गयो।

होर सी मोआब भेणी यात्रा

10इसराएलियो न प्रस्थान कोर्या। हुये ओबोत मा पड़ाव डाल्या। 11तब ओबोत सी अगा बढ़ीन मोआब क अगळ इय्ये-अबारीम मा पड़ाव डाल्या, जो पूर्वन जंगल मा छे। 12हुये होंया सी प्रस्थान कर्यो, आरू जेरेद क घाटी मा पड़ाव डाल्यो। 13हुये होंया सी प्रस्थान कोर्यो, आरू अर्नोन नदी क उन पार पड़ाव डाल्यो। अर्नोन नदी उना निर्जन पोरदेश मा छे, जेरो फैलाव एमोरी देश क काकड़ सी शुरु होये। अर्नोन नदी मोआब आरू एमोरी राजोन विच, मोआब क सीमा छे। 14एकालिय योहोवा क युद्ध नावोन किताब मा यो कव्यो गयलो छे: “सुफा इलाका मा वाहेब नगर, एने अर्नोन नदीन घाटियाँ, 15आरू घाटियो क हुयो ढाळ ज आर नगर क अख्ये फैल्यो छे, ज मोआब क काकड़ पोर झुकली छे।”

16होंया सी हुये बीर लगुन गुया। यो एक कुवो छे, जेरे वाराम योहोवा न मूसा सी कव्यो हुतो, लोगहन क एकठो कोर! हाव ओक पानी आपीस। 17तब इसराएलियो न ये गीत गाया:

ओ कुवो, फुट पोड़!

मनवा! उना कुवा क गीत गावू,

18जेरेसी आधिकारियो न खुंदो हुतो,

ओक लोगहन क मातभरियान आपना-आपना

राजडोनड सी,

आपना-आपना सोंटी सी खुंदो हुतो।

ओळतेन हुये निर्जन पोरदेश सी मत्ताना गुया, 19मत्ताना सी नहलीएल, आरू नहलीएल सी बामोत। 20हुये बामोत सी उन घाटी क अख्ये गुया, ज मोआब क क्षेत्र मा छे, आरू ज पिसगा क उन चोटी क अख्ये छे ज मरुस्थल क अख्ये झुकाड़्यो।

सीहोन आरू ओग राजान पराजित करनो

(व्यवस्थाविवरण 2:26–03:11)

21इसराएलियो न एमोरी राजा सीहोन क पास दूत मुकल्यो आरू कव्यो, 22हामूक तारा देश सी होईन जाने दे। हामू तारा खेत आरू अंगूर वाड़ी क अख्ये नी देखसू। तारा कुवा क पानी वी नी पीसू। जब लगुन हामू तारा काकड़ सी पार नी होय जासु, तव लगून हामूक राजवाट पोर चालता जासु। 23पुन सीहोन न इसराएलियो क आपनी काकड़ सी होईन जानेन छुट नी आप्यो, पुन हयो आपनी प्रजा क लोगहन क एकठा कर्यो,आरू इसराएलियो क सामना करने क लिय जंगल मा निकळी आया। त्या यहस मा आया आरू त्या इसराएलिया सी लड़ाय करिया। 24इसराएलियो न तलवार क नोक सी ओक बेध देदा आरू उना देश पोर, अर्नोन नदी सी यब्बोक नदी लगुन, अम्मोनियो क काकड़ हुती, हेका देशन होकदारीया हुय गिया। अम्मोनियो काकड़ वातड़ी हुती। 25इसराएलियो न एना सब नगरों पोर होक कोर लिदो। हुये एमोरीयो क सब नगरो मा, हेश्बोन आरू ओका गाँव मा, बस गुया। 26हेश्बोन एमोरीयो क राजा सीहोन क नगर हुतो। यो हुयो सीहोन हुतो, ज मोआब क पेहला राजा सी युद्ध करीन ओका हाथ सी ओक आखो देश, अर्नोन नदी लगुन, हापकी लेदा हुता। 27ओतरान कहवाड़ो कयने वाळा:

हेश्बोन मा आवू!

राजा सीहोन क नगर बसे,

हुयो स्‍थापित कर्यो जाय!

28काहकी हेश्बोन सी आगठो निकळ्यो,

राजा सीहोन क नगर सी ज्वाळा निकळी!

हुयो मोआब क आर नगर क भस्म कर दिदो,

अर्नोन क बोयड़ा चोटो क पुजा घर क

निगळी लिदा।

29ओ मोआब, धिक्कार छे तुक!

ओ कमोश देवता क मानसे, तुमू मोर-मिटे!

हुयो आपना पुर्या क ढ़ासने वाळा,

आरू पुरायटा क एमोरी राजा सीहोन क

बन्‍दिनी बनाय दिदो।

30हेशबोन हेका पोर्या दीबोन लगुन,

ओका बायरा क नोपा लगुन,

ओका लोगहन क मेदबा लगुन मार डाल्यो।

31अस करीन इसराएली एमोरीयो क देश मा बस गुया। 32मूसा न याजेर क भेद लेने क लिय दुत मुकल्यो। इसराएलियो न ओका गाँव पोर हक कोर लिदा, आरू ज एमोरी हयां रोहता हुता, हुये निकाळ दिदा।

बाशान क राजा ओगळ क पराजित करनो

33ओळतेन हुये ओगा बोड़्या बाशान क वाट क अख्ये गुया। बाशान क राजा ओगळ ओक सामनो करने निकळ्या। हुये एद्रेई मा उनासि युद्ध करने क लिय आव्या। 34योहोवा न मूसा सी कव्यो, ओकासी झूणी बिहये! हाव ओक, ओका सब प्रजा क एने ओका देश क तारे हातो मा सौंप दिदलो छे। जसो तून एमोरीयो क राजा सीहोन क साथ , ज हेश्बोन मा रोहतो हुतो, कोर्यो हुतो, तसोज ओका साथ करजो। 35अत: इसराएलियों न ओक, ओका पुर्या एने ओका लोगहन क अस करीन वध कर्यो की ओक एक वी मानुस जिवतलो नी बच्यो। हुये ओका देश पोर होक कोर लिदा।