Dhankavi Bible
गिनती 20
चट्टान सी पानी क निकळनो
(नीरगमन 17:1-7)
पेहला मयना मा इसराएली समाज, आखा इसराएली मंडळी, सीन क निर्जन पोरदेश मा पंहुची। हुये मानसे कादेश मरूद्यान मा ठहर गुया। होंया मिर्याम क मौत हुय गुय; आरू ओक व्हान हेको गाड़ दिदा।
होंया इसराएली मंडळी क लिय जळ उपलब्ध नी हुतो। एने हुये मूसा आरू हारून क विरुद्ध एकठा हुय गुया। हुये मूसा सी विवाद कोरने लाग्या। त्या कया, भलो होयतो की हामू तेने टेमे मोर गुया हुता जब योहोवा क अगळ हामरा भाई-बहिन क जीव निकळ्यो हुतो। तू काहा योहोवा क मण्डली क एना निर्जन जंगल मा ली आयो? काय एकालिय की हामू आरू हामरा ढुरे यां मोर जाय? तू काहा हामूक मिस्र देश सी निकाळ्यो? काय एना भुन्डा जागा मा लावने क लिय? यो जागो ओन, अंजीर, दाखरस आरू अनार क जागो नी छे। यां पीने क लिय पानी वी उपलब्ध नी होय। अत: मूसा आरू हारून धर्मसभा क अगळ सी निकळीन मिळन-तम्बू क झपला पोर आया। हुये आपना मुयोन भुरसे पोड़्यो। तब हुये योहोवान महिमा देखाय पोड़ी। योहोवा मूसा सी कव्यो, लाकूड़ ले! तू आपना साथ आपसो भाई हारून एने इसराएली मंडळी क एकठा कोर, आरू ओका डुळा क सामने चट्टान क हुकूम आप की हुयो जळ प्रदान कोरे। इने रीते तू उना लिय चट्टान सी जळ बाहर निकाळजी, आरू मंडळी क जनसमुदाय एने ओका ढुरो क पानी पाळसे। मूसा न योहोवान क अगळ सी लाकूड़ चुट्यो, जसो हुकूम पोरबू न ओक आप्यो हुतो।
मूसा आरू हारून न चट्टान क सामने मण्डळी क एकठा कोर्या, आरू मूसा न कव्यो, ए दंगा करने वाळा, म्हारी वात सामळो! काय हामू एना चट्टान सी तुमरे लिय पानी बाहर निकाळजे? मूसा न आपसो हाथ उपोर उठायो आरू आपसी लाकुड़ सी दुय वार चट्टान पोर देदो। तब घोनो जळ फुटिन निकळी पोड़्यो! इसराएली मण्डळीन आरू ओका ढुरे पानी पीदा। पुन योहोवा न मूसा आरू हारून सी कव्यो, तुमू दुयू न म्हारे पोर भुरसो नी कोर्या! मक इसराएली समाज नू निगाह मा चुखो सिद्ध नी कोर्या एकालिय तुमू एनी मण्डळी क उना देश मा नी ली जाय सकू ज हाव ओक आपलो छे। उना झरोन नाव मरीबा पड़ियो, जां इसराएली समाज न योहोवा सी विवाद कोर्या हुता, आरू योहोवा न ओका विच आपसा क चुखो सिद्ध कोर्यो हुतो।
एदोमीयान राजा लारे वाट नी आपनो
मूसा कादेश सी एदोम न राजा क पास दूत मोकल्यो, थारो भाई इसराएल यो कये: हामरे पर जो जो पीड़ा पड़ली छे , त्यो तू जानतो हसे। हामरा डाहडा मिस्र देश गुया, आरू हामु उना देश मा घोनाटेमे लगुन रोया कोर्या। पुन मिस्र देश क रोहन्या न हामरा डाहडा एने हामरे साथ भुंडो वेवहार करिया। तब हामू योहोवान दुहाई आप्या, आरू हुयो हामरी पुकार सामळ्यो। हुयो एक दूत मुकल्यो आरू हामुक मिस्र देश सी बाहर निकाळ लायो।हेमी देख, हामू कादेश नगर मा छे, ज तारा राज-इलाकान काकड़ पोर छे। हांय हामुक थारा देश मा सी हुईन जाने दे। हामू काहला बी खेतोन अंगूरन वाड़ी मा सी हुईन नी जाजे, आरू नी तारा कुवा क पानी ही पीसू। हामू केवल राजवाट्ये पोर जासु। जब लगुन हामू तारा राज्य-क्षेत्र क पार नी कोर लेजे, तब लगुन नी जेवड़्या हातो भेनी वोळसू आरू नी डाखर्ये हातो भेनी। पुन एदोमियो न उना सी कयो, तुमू हामरा देश सी होईन झुणी जाजु। असो नी होये की हामू तारा विरुद्ध तलवार लिन खोयड़े निकळे। इसराएली समाज न ओकासी कव्यो, हामू राजवाट पोर सी ही जासु। कदाम हामू आरू हामरा ढुरे तारो पानी पीसे, ती हामू ओक मूल्य चुकाड़ देसे। हामू काई मोटी वात नी मांग रोया।हामू केवल पायेत निकळ जाने दे। पुन त्यो कयो, तू नी आय सके। आरू एदोम एक मोटा टुळान क लीन ताकत क सात हेको सामनो करने करीन निकळी आयो। इने रीतिये एदोमियों न इसराएलियो क आपा राज्य-क्षेत्र सी होईन जानेन छुट नी आप्या। अत: इसराएली उना भेनी सी वोळीन दिसरे वाट्ये सी चाली गुया।
हारून नू मौत
इसराएलियों न कादेश मरूद्यान सी प्रस्थान कोर्या। सब इसराएली मण्डळी होर बोयड़ा क धोड़े आया। एदोम देश नू सीमा होर बोयड़ा पोर योहोवा मूसा आरू हारून सी कव्यो, हारून आपसा लोगहन मा जाईन मिळ जासे। हुयो उना देश मा प्रवेश नी करसे, जेनाक हाव इसराएली समाज क प्रदान कोरलो छे, काहकी तुमू लोगहन न मरीबा क जळ-स्त्रोत पोर म्हारा हुकूम क प्रति दंगो करला हुता। तू हारून आरू ओका पुर्या एलीआजर क लिन होर बोयड़ा पोर ली चहड़ जा। आरू हारूनन छिंदरा निकाळीन हेका पोर्या एलीआजर क पेहराया; तव हारून वाँत् मरीन आपसा लोगहन मा जाय मिळसे आरू हुयो ओका पुर्या एलआजर क पहराय देजो। हारून आपना मोरला डाहडा मा जाईन मिळ जासे, होंया ओकी मौत होय जासे। योहोवान हुकूम नू ओनसारे मूसा न असोज कर्यो। हुये मण्डली क देखता-देखता होर बोयड़ा पोर चोहोड़ गयो। मूसा न हारून क लुगड़ा उतार लेदो आरू ओक पुर्य एलीआजर क पहनाय देदो। तब हुयो बोयड़ा क चोटी पोर हारून नू मौत हुय गय। मूसा आरू एलआजर बोयड़ा सी नीचो उतर आयो। जव इसराएलीन सब मण्डळी देख्या की हारून क मौत हुय गुयय तब सब इसराएली परिवार न ओका लिय तीस दाहड़ा लगुन शोक मनाया।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.