Dhankavi Bible
गिनती 19
शुद्धीकरण न नियम
योहोवा मूसा आरू हारून सी कव्यो, नियमन यी रीत छे, हेको पाळन क हुकूम हाव-पोरबु न आपलो छे: तू इसराएलिया सी कय कि म्हारे पा सेक रातली पावरदी केवड़ी ली आवो, जेरेम काई खुट नी हय, आरू ज जुड़ा मा कोदी जुपायलो नी होय। तू हेको एलीआजर पुजाराक आप देजी। ओळतेन हुयो पड़ाव क बाहर लाव्यी जासे, आरू पुरोहित क अगळ ओक भेंट चढ़ावे। एलीआजर पुजारो आपनी आंगळी मा ओक थुड़ोक लुहुय लेसे, आरू ओक मिळन-तम्बू क अगळ अख्ये सात वार छिड़क देसे। तब उनी केवड़ीन। ओका चमड़ा, मांस, लुहूय आरू धपाड़्यो जासे। पुजारो देवदारून लाकड़ा, जूफा आरू लोहित रंग क लुगड़ा लेसे, उना आग्ठा मा जिनाम केवड़ी धपती हय न्हाक देय। ओका वास पुजारो आपना लुगड़ा धुवसे आरू जळ सी उंगळसे। तब हुयो पड़ाव मा आवसे, पुन हुयो सांते टेमे लगुन वीटोळ रोहसे। आरू जो मनुस हेको धपाड़े त्यो वी पानी सी आपसा छिंदरान क धुळसे आरू उंगळसे। त्यो वी सांते टेमे लगुन वीटोळ रोहसे। एक चुखलो मानुस उनी केवड़ीन क रुखड़ा क एखठा कोरसे, आरू ओक पड़ावन क बाहर चुखला जागा मा मेले। आरू त्यो रूखड़ो इसराएली मण्डली क वीटोळ सी छुड़ावने वाळो पानी क लिय मेकी जासे त्यो पापबलि रये। आरू जो मनुस केवड़ी न रूखड़ो करनेवाळो मानुस वी लुगड़ा धुळसे। हुयो वी सांतो लगुन वीटोळ रोहसे। ये इसराएली समाज एने ओका विच रोहनेवाळा प्रवासी क लिय स्थायी संविधि होयसे।
धड़ छिमने सी विटुळ
कोय वी मानुस क धड़ क छिमनेवाळो मानुस सात दाहड़ा लगुन वीटोळ रोहसे। असो मनुस तीसरे दाहड़े आरू सातवे दाहड़े जळ सी आपसा क चुख कोरसे। आरू सातवे दाहड़े चुखो रये, पुन कदाम हुयो तीसरे दाहड़े आरू सातवे दाहड़े आपसा क चुखो नी कोरसे ती हुयो चुखो नी होयसे। मोरला मानुस क, कोय वी मानुस क धड़ क छिमने वाळो मानुस ज आपसाक चुखो नी कोरतो, योहोवा क रोहन्या-जागा क वीटोळ कोरे छे। असो मानुस इसराएली समाज मा सी नष्ट कोर्यो जासे। ओका पोर विशुद्धीकरण क जळ नी छिड़की गयो गुयो, एकालिय हुयो वीटोळ छे, ओकी वीटोळ हेमी लगुन ओका मा छे।
जब कोय मानुस क मौत तम्बू मा होये, तब ओकी यी वेवसता छे: उना तम्बू मा प्रवेश करने वाला मानुस एने हुये सब मानसे ज तम्बू क धोड़े छे, सात दाहड़ा लगुन वीटोळ रोहसे। हरएक खुला पात्र, जेरे पोर ढाकनो नी लागलो होयसे, वीटोळ जासे। जो कोय खोयड़ा मा तलवार सी मार्या गुया एने आपसुत् मौत सी मोरला मनुसन क हाड़का, एने कबर क छिमसे, हुयो सात दाहड़ा वीटोळ रोहसे। असो वीटोळ मनुस क लिय आगठान-पाप-बलि नू रुखड़ो लेजी आरू पात्र मा झरोन पानी न्हाकीन हेको मिळाय देजी।
तब कुई वीटोळ मनुस जूफा लेसे आरू ओक जळ मा डुबिन तम्बू पोर, ओकी सब चीजो पोर आरू उना लोगहन पोर जे होंया हुता, जळ छिड़क देसे। हुयो उना लोगहन पोर वी जळ छिड़की देसे, ज मोरलान अस्थि क, तलवार सी मार्या गया एने स्वाभाविक मौत सी मोरला लोगहन क एने कबर क छिमलाने वाळा पर छिड़की देय। हुयो चुखलो मानुस तिसरे दाहड़े आरू सातवे दाहड़े वीटोळ मानुस पोर जळ छिड़कसे। अस कोरिन हुयो ओक सातवे दाहड़े चुखो कोरसे। हुयो आपना लुगड़ा धुवसे आरू जळ सी उंगळसे।ती हुयो सांतो लगुन चुखो होय जासे।
पुन जु मनुस वीटोळ छे, कदाम हुयो आपसा क चुखो नी कोरसे ती असो मानुस धर्मसभा क विच नी नष्ट कोर्यो जासे,काहकी हुयो योहोवा क चुखला-जागा क वीटोळ कोरलो छे। ओका पोर विशुद्धीकरण क जळ नी छिड़क्यो गुयो, एकालियो हुयो वीटोळ छे। यो ओका लिय स्थायी संविधि होयसे। ज मानुस विशुद्धीकरण क जळ छिड़के, हुयो आपसा लुगड़ा धुवसे। विशुद्धीकरण-जळ क छिमनेवाळो मानुस सांतो लगुन वीटोळ रोहसे। जेना-जेना चीज क हुयो वीटोळ मानुस छुमसे, हुये वी वीटोळ होय जासे। जे जीव ओका मानुस क छिमसे हये वी सांता लगुन वीटोळ रोहसे।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.