गिनती 18

पुजारा आरू लेवीयान सेवा जवाबदारी

1तव योहोवा हारून सी कयो, चुखला जागा सी जुड़लो गुणो आरू तारे साथ तारा पुर्या एने तारा डाहला क परिवार पवित्र-जागाम सी संबंध ओधोरोम क आपसो वहन कोरसे। तू आरू तारा साथ तारा पुर्य आपना पुजारान-कामोन वाराम ओधोरोम क आपसो वहन कोरसे। 2आरू लेवीन कुळ थारा डाहडान कुळ जो थारा भाईस छे, हेनको बी थार सात मा लाया कर, आरू त्या थार मेळ जाय, आरू थारी सेवा चाखरी करिया करे, पुन गवायन चिट्ठीन तम्बू न सामने तू आरू थारा पोर्यात् आया करें। 3हुये तारी सहायता एने तम्बू क देखवाळ कोरसे। पुन हुये चुखला-जागा क पात्रो एने वेदी क धोड़े नी आवसे; नीतुए तूमू आरू हुये मोरसे। 4हुये मिळन-शिविर क सब सेवा-काम करने क लिय तुमरे साथ रोहसे आरू तम्बू क देखभाल कोरसे। जे मानसे लेवी-कुळ क नी छे, हुये तारे धोड़े नी आवसे। 5पुन तुम लोगहन पवित्र-जागाम एने वेदी क सब सेवा-काम क दायित्व सोमळसू जरेसी इसराएली समाज पोर म्हारी रीस ओळी नी भड़कसे। 6पुन हाव तुमरा लेवी भाईस्योन क इसराएली समाज क विच सी अलग करलो छे। आरू त्या मिलाप वाळा तम्बून चाखरी करने करीन तुमूक आरू योहोवा क आप दिदलो छे। हाव ओक तुमूक आपलो छे की मिळन-तम्बू क सेवा-काम क कोरे। 7पुन तू आरू तारा साथी तारा पुर्य वेदी सी सम्बन्धित एने आखरी- पट क पछळ पुजारान काम क दायित्व सोमाळसे। तुमू सेवा-काम करसे।हाव तुमक पुजारान काम दान-स्वरूप प्रदान कोरे। धोड़े आवने वाळा जो थारा कुळ बाहरला लोगहन क मोतोन-डोन आप्यो जासे।

पुजारान वाटो

8योहोवा हारून सी कयो, समळ हांव चोड़ावली भेंटो क वाचलो वाटो, इसराएली समाज क सब चुखी कोरली चिजे, हाव तुख प्रदान कोरलो छे। हाव ओक तारो वाटो आरू तारा पुर्या क जलोमको वाटो करीन कर देयो। 9यो घण चुखी चिजो मा सी वाचला, आगठा मा जलावली चीज, तारी होयसे: ओक आखा चोड़ावसे, ओक सब ओनन-भेंट, आखा पाप-बलि आरू सब दोष-बलि, ज हुये मक आपे, तारे आरू थार पोर्यान क लियण घण चुखो हुयसे। 10तूमू ओक चुखी समझीन खाजो, ओक केवल मानुस खाय सोके छे। हुयो तारे लिय चूखलो छे। 11यो वी तारो छे: इसराएली समाज मा अर्पित कोरली भेटो क वाचलो वाटो। हेको हांव तुक आरू थारा साथ थारा पोर्या आरू पुरायटा क स्थायी आपनेन-वाटो का रूप मा प्रकट कोरलो छे। तारा घर क होरिक चुखला छे त्या हेको खाय सोके। 12ताजा सर्वोत्तम तेल, ताजो सर्वोत्तम अंगूर क रस आरू ओन, ओकी पेहली उपज, ज हुये मक-योहोवा क चोड़ावतला छे, हयो हब तुख प्रदान कोरो। 13उना देश क आखो पेहलो फोव, ज हुये मक-योहोवा क पास लावे छे, तारोत होयसे। तारा घर क सब चुखला लोगहन ही ओक खाय सके। 14इसराएल मा पुरो-समर्पित सब चिजे तारीज होयसे। 15मनुस एने ढुरोन होरीक पहिलौठी सन्तान, जिनाक हुये मक-योहोवा क चिड़ावतला छे, तारोत होयसे। तू मानुस क पहिलौठा सन्तान क मूल आपीन छुटलो कोर देजी। एने रीते वीटोळ ढुरोन पहिलौठा बच्चा क वी दाम लिन छुड़ देजी। 16आरू जिनुक छुड़ावनो मानुस क छुड़ाय जाने वाळी संतान क तू रक मयनान उमोर मा निर्धारित मूल्य पोर छुड़जी। तु ओक विमोचन-मूल्य पवित्र जागा क तौल क ओनसारे पांच चांदी क शेकेल कोरजू। 17पुन तू गाय, गाडरा एने बुकड़ा क पहिलौठा क बच्चा क झुनी छुड़जी। हुये पवित्र छे। तू ओक लुहुय वेदी पोर छिड़कजी आरू ओकी चोर्बी मक-योहोवा क आगठा मा सुखद गोंदायणाय भेंटन रूप मा जळावजो। 18पुन ओक मास तारो वाटो होयसे,हालेवली छाती आरू जेवड़्या सातळा क मास तारे लिय हये। 19जे पवित्र भेंट इसराएली लोग मक-पोरबू क अर्पित कोरसे, चो हाव तुख आरू तारा साथ तारा पुर्या-पुरई क स्थायी देय-वाटा क रूप मा प्रदान कोरो।यो तारे आरू तारा साथ तारा वंशज क लिय मक-योहोवान अगळ नोनन अटल वाचा छे। 20योहोवा न हारून सी अगो कव्यो, इसराएलियो क देश मा तारा बासोन-धोन नी होयसे, आरू नी ओका सात तुख काई वाटो मिळसे। इसराएली समाज मा हाव ही थारो वाटो छे।

लेवीयान दशवो भाग

21देखू, जो सेवा-काम लेवी मिलापवाला तम्बू न सेवा लेवी करे, हेको बदला मा हाव ओक इसराएल मा सब भेंटो क दशमांश बासोन-धोन क लिय प्रदान कोरलो छे। 22हेमी सी इसराएली लोगहन मिलापवाळा तम्बून क धोड़े नी आवसे। असो नी होय की हुये पाप करे कोरे आरू मोर जाय। 23पुन लेवीय लोगहन मिळन-शिविर क सेवा-काम क कोरसे, आरू आपना ओधोरोम क वी आपसो वहन कोसरे। यी तुमरी पीढ़ी सी पीढ़ी लोगुन स्थायी संविधि छे। इसराएली समाज मा ओकी वासोन धोन नी होयसे। 24काहकी इसराएली जो दशवांश योहोवा को उठाई हुई भेंट करके देंगे, ओका सी हांव लेवीयान क हेनको वाटो करीन आप देयो ज चीज दशमांश क रूप मा इसराएली समाज योहोवा क अर्पित कोरे छे, ओक हाव लेवीयो क प्रदान कोरलो छे की हुये ओकी बासोन सम्पत्ति होये। एकालिय हाव ओका सी कव्यो छे की इसराएली समाज क विच ओका बासोन सम्पत्ति नी होयसे।

लेवीयान दशमांश

25योहोवा मूसा सी कव्यो, 26तू लेवीयो सी यो कहजो: जो दशमांश योहोवा इसराएली समाज मा तुमरा बासोन वाटान क लिय प्रदान कोरलो छे, जब तू ओक इसराएली लोगहन सी लीस तब ओक काहिन अंश, यानी दशमांशन दशमांश, आपजू। 27तूमरी यी भेंट खलियान क ओन एने अंगूर क रस-कुण्डा क नोवरा दाखरस गिनाय जाय। 28अत: तूमू वी आपसा आखा दसवा वाटा मा सी, ज तूमू इसराएली समाज सी लेसू, मक-योहोवानभेंट मा अर्पित कोरजो, आरूउ म्हारी यी भेंट हारून पुजारा क आप देजो। 29जतरो दाम तूमू जोड़े हेका मा सी वारू सी वारू वाटो जो चुको रये, हेको योहोवान करता अर्पित भेंट करीन आपजो। 30एकालिय तू लेवीया सी कहजू, जब तुमू ओका सर्वोत्तम वाटो अर्पित कोर देसू तब ओक वाचलो वाटो तुमरे लिय खलियान क ओन, एने अंगूर क रस-कुण्डा क रसन जसो मान्यो जासे। 31तूमू आरू तुमरा परिवार ओका सब जागा मा खाय सके; काहकी यो मिलापवाळा तम्बून जो सेवा तुमू करसु हेको बदले योत् रये। 32जब तुमू ओक व वारू सी वारू वाटो चडावसु तब हेका कारण तुमूक गुणो नी लागे। तूमू इसराएलियान चुखी करली चीजोन क वीटोळ झुनी कोरजू; असो नी हुये की तुमू मोर जावु।