गिनती 17

हारून न लाकूड़

1योहोवा ने मूसा सी कयो, 2तू इसराएलिया सी बात करीन हेनको डाहडा न परिवार न अनसारे हेनका सब मुखीया न पास एक एक लाकड़ी लेजी आरू हेनु माई बारे लाकड़ी मा सी एक एक पर डाहला नाव रयसे। 3हारून न नाव लेवी न लाकूड़ पोर लिखजी। ओका डाहडान होरिक परिवार क डाहडा क पास एक-एक लाकूड़ होयसे। 4तू हेनी लाकड़ीक मेळ भेटन तम्बू मा, गोवान पट्टियों क अगळ, जाँ हाव तुमू लोगहन सी मिळो छे, एकठा कोर देजी। 5जेना मानुस हाव नेवाड़िस, ओक लाकुड़ मा अंकुर निकळी पड़से। आरू इसराएली जे तुमरे पर बक-बक करता रये, हांव बक बक करनो म्हार पर रयीन दूर करीस। 6मूसा इसराएली सी यी वात कयो। हेका मुखिया न आपसे-आपसे वाटे, आपसा आपसा डाहडा न घराना न अनसारे, एक एक लाकड़ी हेको आपीयो, इनीये रीतिये बारे लाकड़ी हुयी, आरू हेनकी लाकड़ी मा हारून न बी लाकड़ी हुती। 7मूसा न उना लाकूड़ क गोवान क तम्बू मा योहोवान सामने मेल दीदो।

8दिसरे दाहड़े मूसा गोवा क तम्बू मा आयो। हुये देख्या की हारून क लाकुड़ मा ज लेवी-परिवार क लिय हुती, अंकुर निकळ आयो। ओकामा कलियाँ खिली,फूल फूले आरू पाकला बादाम वी लाग गुया। 9मूसा सब लाकुड़ क योहोवा क अगळ चुटिन इसराएलियो क पास ली गुयो। हुये देख्या आरू आपसी-आपसी लाकुड़ उळखीन ली लेदा। 10योहोवा न मूसा सी कयो, तू हारुन न लाकुड़ को गोवान पट्टियान अगळ ओळी मेक दे ताकी हुयो लड़ाय क लिय सोहलानी जूगू सुरक्षित रोहे, आरू तू म्हारे विरुद्ध ओकी बक-बक क समाप्त कर दे; असो नी होये की हुये मोर जाय। 11आरू मूसा योहोवान हुकुमन लारे असोज कर्यो।

12इसराएली लोगहन न मूसा सी कव्या, देख,हामरो जीव निकळ रयो छे। हामू मोर रोया छे। हामू-सब नाश होय रोया छे। 13योहोवान क रोहन्या-जागन धोड़े आवने वाळा लोगहन नू मौत हय जाय। काय हामू आखा मर जासु?