गिनती 16

कोरह, दातान आरू अबीराम क धुको

1लेवी क वंशज, कहात क पोता आरू यिसहार क पुर्य कोरह न गांडाय कर्यो। हुयो एलीआब क दुयो पुर्या दातान एने अबीराम क एने रुबेन क ओवलियाद पेलेतन पोर्यो ओन क आपना साथ लिदो 2आरू हुयो इसराएलियो क दुय सौ पचास लोगहन क साथ ज मण्डळी क डाहडा, धर्मसंसद क नेवाड़ला लोगन एने विख्यात मानसे हुता, मूसा क विरुद्ध विद्रोह कर दियो। 3हुये मूसा आरू हारून क विरोध मा एकठा हुया। हुये ओक कव्यो, बेस होय चुक्यो! हेमी बस करू! आखी मण्डळी, सब मानसे चुखला छे। ओका विच योहोवा छे। तब तुमू आपसा क पोरबून धर्मशाला क उपोर काय समझता छे? 4मूसा यो सोमळीन आपना मुयोन भुरसे हिट पोड़्यो। 5हुयो कोरह एने ओका टुळान लोगहन सी कया, सन्‍दारे योहोवा यो प्रकट कोर देसे कि कुन मानसे ओका छे आरू उन मानसे पवित्र छे। हुये ओक आपसा धड़ बुलायो हुसे। जेना लोगहन क हुयो निवाड़से, हेकोत् आपसा पास आवने देसे। 6अतरान करीन ए कोरह, तुम आपसी आपसी टुळा न क साथ मा यो करू: आपसो-आपसो धूपदान लेवो। 7आरू हेका मा आगठो राखीन योहोवान सामने धुप देजो। जिनू लोगहन क पोरबू नेवाड़से, त्यात् चुखा कहवायसे। ए लेवीया! तुमु बी मोटी मोटी वात करे! हेमी बस करू! 8ओळी मूसा न कोरह सी कव्यो, लेवीया, म्हारी सोमळो। 9काय यी वात छे की इसराएल क परमेश्वर न इसराएली टुळा सी तुमक नेवाड़ीन अलग कर्यो की तुमू धोड़े आवीन ओका रोहन्या-जागा मा सेवा-काम करे, आरू मण्डळीन क अगळ उबा होईन ओक हेकी सेवा करने करीन आपसे पास बुलाय लीदो। 10आरू योहोवा तुको आरू थारा सब लेवी भाईसन क बी आपसे पास बुलाय लिदो? तेबी तुमु पुजारान पद हेरो? 11एकालिय , तूमू आरू तुम्हारो टुळा क सब लोगहन न हारुन क विरुद्ध नी, योहोवान क विरुद्ध विद्रोह कोरला छे। हारून काय छे की तुम ओका विरुद्ध बक-बक कोरतला?

12मूसा न एलीआब न पोर्यो दातान आरू अबीराम क बुलावने क लिय कुदाक हेको पास मुकल्यो। पुन त्या कया, हामू थारे पास नी आवजे! 13काय यी नानी वात छे कि तू हामूक दूध आरू माहळ क नदियों क देश सी एकालिय बाहर निकाळ लायो कि हामू जंगलो मा मार नाखे! हेमी काय तू शासक बनीन हामरे पोर शासन वी कोरनो चाहतलो छे? 14ती तू हामूक असा देश मा जाँ दूध आरू माहळन धार उहळे वाँ नी पुगाड़ीयो, आरू नी हामूक खेतन आरू दाख न वाड़ीया न आदिकारी बनायो। काय तू इनू लोगहन न डुळा मा धुलो न्‍हाकीस? हामू ते नी आवजे!

15मूसा क जादा रिस आव्यी। हुयो योहोवा सी कव्यो, हेनकी भेंट क भेणी झुण भाळे । मक घूस मा ओकासी एक गदड़ो वी नी लिदो आरू नी उनामा सी काई क अनिष्ट हिय कर्यो। 16ओळी मूसा न कोरह सी कव्यो, तूमू, तुम्हारा टुळा क सब लोगहन आरू हारून क सात मा योहोवा क अगळ उपस्थित हुयो। 17तुमरे मासी हरएक लोगहन आपसा धूपदान लेरे आरू ओका पोर धूप राखे। ओळतेन सब लोगहन आपसो-आपसो धूपदान, एने दुय सौ पचास धूपदान, योहोवा क अगळ प्रस्तुत कोरे। तूमु वी आरू हारुन वी आपनो-आपनो धूपदान लीन जाजी 18अतरान करीन त्या आपसो-आपसो धूपदान लेदो। हुयो उनामा आगठो राखयो, आरू उना पोर धूप नाख्यो। ओळतेन हुये मूसा आरू हारून क साथ मिलापवाळा तम्बून क झपला पोर उबा होय गुया। 19कोरह न सब टुळान क मूसा एने हारून क विरुद्ध मिळनन तम्बू क झपला पोर एकठा कोर लिदा। तब योहोवान क महिमा आखी मंडळी क देखाय देदो।

20योहोवा मूसा आरू हारून सी कव्यो, 21तुमू टुळान क विच सी अलग होय जावू ताकि हाव एने टेमे भर मा भस्म कोर दोम। 22तव त्या आपना मुयोन भुरसे पोड़िन पोरबू सी कोहने लाग्यो हे परमेश्वर , आखा जीव आत्माओ न ईश्वर! एक मनुसन पाप करने पोर काय तू आखी टुळा पोर रीस करीस? 23तब योहोवा मूसा सी कव्यो, 24तू मण्डळी न लोगहन सी कय की कोरह, दातान आरू अबीराम क रोहन्या-जागा क च्यारू अख्ये सी हट जाय।

25तव मूसा उठ्यो। हुयो दातान आरू अबीराम क पास गयो। हेको पछळ-पछळ इसराएल क धोरमोन डाहला वी गुया। 26मूसा हेना टुळा सी कव्यो, तूमू एनू दुर्जनो क तुम्बुओ क पास सी दुर होय जावू। एंदू काई चिज क छिमनो वी झुणी करू; नीते ओका पाप कारण तुमरो वी सर्वनाश होय जासे। 27यो समळीन त्या कोरह, दातान आरू अबीराम क रोहन्या-जागा क च्यारू अख्ये सी हट गुया। दातन आरू अबीराम वी खयड़े निकळि आया। हुये आपनी लाड़ी, पुर्या एने बाळान क सात तम्बुओं क झपला पोर उबा हुय गुया। 28मूसा न कव्यो, योहोवात् मखे सब कामो क करने क लिय मुकल्लो छे, आरू हाव आपसी मोरजी सी यो कोरतु। तुमू यी वात एने रीते जानसू: 29कदाम दिसरो मनुस क मौत क जसो एनू लोगहन क स्वाभाविक मौत होयसे, कदाम दिसरा लोगहन क जसा एनूक वी डोन आप्यो जासे, ती समझनो की योहोवा न मक मुकल्लो नी हय। 30पुन कदाम योहोवा काई विनछेळाय ताकत उजेन्‍ती करे, कदाम धरती आपसो मुय खुले आरू एनू लोगहन क ओकी आपनी आखी चिजो क साथ निगळ जाय आरू ये जिवतलात अधोलोक मा उतरी जाय , ती तुमू जान लेजो की एनू लोगहन न पोरबू क तिरस्कार कोरला छे।

31जसोज मूसा न यी वाते कोहनो सार्यो, उना लोगहन क नेची कळ फाट गयी। 32कोळ आपसो मुय खुली, आरू हुयी ओक, ओका परिवार क , उना सब लोगहन क, जो कोरह क हुता, आरू ओकी आखी धन क , गिळ गयी। 33हुये आपनी आखी चिजो क साथ जिवतलो अधोलोक मा उतरी गुया! कळ न ओक ढाक लेदी! ओस करीन हुये मण्डळीन क विच सी नाश हुय गुया। 34जे इसराएली लोगहन ओका च्यारू अख्ये हुता, हुये ओकी चिल्लाहट सोमळीन ढास गुया। हुये कहता हुता, असो नी हुये की कळ हामुक वी निगळी जाय। 35तब योहोवान क पास सी आगठो निकळ्यो आरू हुयो धूप चोड़ावने वाला दुय सौ पचास लोगहन क भस्म कोर दिदो।

धुपदान

36तव योहोवा मूसा सी कयो, 37पुजारो हारून क पुर्य एलीआजर सी कहजी की हुयो ज्वाला मा सी धूपदानो क निकाळ ले आरू आगठा क हतान् छितराय दे; काहकी या चुखला छे। 38काहकी ये धूपदान, एनू पापियों क धूपदान, ओक जीवन-विनाश सी पवित्र हुय गुयला छे। अने: वेदी क आवरण क लिय ओका ठोंक-ठाकीन ओका पतरा क ठुकीन बनावे। उन लोगहन न ओक मक-योहोवान क अगळ प्रस्तुत कोरला हुता। एकालिय हुये चुख हुय गुया। हुये इसराएली समाज क लिय एक सोहलानी होयसे। 39तब पुजारो एलीआजर न पीतळ क उना धूपदानो क निकाळ्यो,जेरेम आगठा मा भस्म होयने वाळा मानुस न तियार कर्यो हुतो । वेदी क ढाळने करीन हेको ठुक-ठाकीन पत्तर बनवाड़ी दिदो। 40इसराएलियान क यी वात फाम रये की कोय दिसरो न रये, योहोवा लिय स्मारक-सोहाली बोने, जेरेसी कुई अपुरोहित मानुस, ज हारून क वंश नू नीय छे, धूप चड़ावने क कामन सी पोरबू क अगळ नी आवे, आरू कोरह एने ओका टुळ क जसा नाश नी होये, जसो पोरबू न मूसा क लारे हेको हुकुम आपलो हुतो।

हारूनन लोगहन क वाचाड़नो

41दिसरे दाहड़े आखा इसराएली मंडळी मूसा आरू हारून क विरुद्ध बक-बक कोरने लाग्या। हुयो कव्यो, तूमू योहोवान क लोगहन क मार नाख्या। 42जव मण्डळी मूसा आरू हारून क विरोध एकठा हुय रोया हुता, तब दुयो ने मेलमिलाप वाळा तम्बू क अख्ये मुख कोर्या। हुये देख्या कि वादळा मा ओक आच्छित कर लेदो छे, आरू योहोवान क तेज देखाय रोयो छे। 43मूसा आरू हारुन मेलमिलाप क सामने आव्या। 44तब योहोवा मूसा सी कव्यो, 45मंडळी क हेनू लोगहन सी अलग होय जावु, ताकी हाव एने टेमे भर मा भस्म कोर दोम। पुन मूसा आरू हारुन मुयोन भुरसे हिट पोरड़्या। 46मूसा न हारून सी कव्यो, तू धूपदान ले, आरू वेदी क आगठा पोर मेक , आरू तब धूप डाल। ओक लिन तोतकाळ जन-समुदाय क पास जा, आरू उना लिय पोसतावो कोर, काहकी योहोवा क रिस ओका अगळ सी चाल पोड़ली छे। महामारी फेलने लागली छे। 47मूसान हुकूमन अनसारे हारुन न धूपदान लिदो आरू हुयो दौड़िन धर्मशाला क विच पंहुच्यो। लोगहन मा छाचिन महामारी शुरू होय चुकली हुती। हारून न धूप चड़ायो आरू ओका लिय पछतावो कर्यो। 48हुयो मोरला आरू जिवतला क विच उबो हुय गुयो। तब महामारी रुकाय गुय। 49जे मानसे कोरह-काण्ड मा मोर चुक्या हुता। ओका अतिरिक्त एनी महामारी मा मोरने वाळा नू संख्या चोवदे हजार सात सौ हुतली। 50जब महामारी रुकाय गुय तब हारून मूसा क पास मिळन-शिविरक झपला पोर लौटी आयो।