गिनती 15

बलीदानन नियम

1योहोवा मूसा सी कयो, 2इसराएली समाज सी यो कयजी; जव तुमु उना देश मा पुगी जासु, जाँ सारी तुमु रयसु,आरू जिनाक हांव आपीस, 3आरू योहोवा करता होमबलि या मेलबलि, या कोई हव्य चढ़ावु, चाहय त्या खास मानतान हय, या हाय बयल्या चाहय गाडरा बकडा न हय, जिनाम योहोवा न करता वारू गंधायने खुश करने वाळो रये। 4तव त्यो मनुस योहोवान करता भेंट ली आवे, त्यो चवथो हीन1 तेल सी सेकलो एपा न दसवो वाटो मयदा न अनाज भेट करीन चढ़ावजी चढ़ावसे। 5होमबलि न करता हर एक गाडरा न क सात मा, दो लिटर अंगूर न रस क पिनाय भेट करीन चढ़ावजो। 6आरू मेढ़ान क सात मा एक तिहाई हीन तेल लगाड़ीन एपा न दसवो भाग मेयदो अन्‍न भेंट करीन चढ़ावजो। 7आरू हेको पिनने भेट योहोवा क वारू गंधायने वाळी एक तिहाई हीन2 अंगूर क रस चोढ़ावनो। 8जब तुमू मेसे योहोवान मानता मा एने सहभागिता बलि मा ओळी आगठान-बलि केवड़ो चोड़ावजो, 9ती आपनी आगठान-बलि एने दिसरे भातिन क ढुरोन-बलि मा अर्पित उना बछड़ा क सत अढ़ाई किलो मैदा, ज साढ़े तिन लिटर तेल सी सम्‍मिश्रित होयसे , अन्न-बलि मा चोढ़ावनो, 10तुमु पिन्यो-बलि मा साढ़े तिन लिटर अंगूरन रस चोढ़ावनो। यो योहोवा आगठा मा हव्य सुखद गोंद छे।

11होरेक बछड़ा, होरिक गाडरा एने बुकड़ा एने गाडरान होरेक पुर्या क सात ओसोन कोर्यो जासे। 12तुमरा बलि पशु माईन जतरा न गिनती हय, हेनीत् गिनती न अनसारे एक के क सात असोत् करे। 13हरएक देशी मानुस योहोवा आगठा मा हव्य सुखद गोंद चोढ़ावने क लिय यो काम इने रिते सी कोरसे। 14पुन तुमरा सात कोय दिसरो मानुस रोहने कोरे एने कुई दिसरी जाती क मानुस तुमरे विच घोनी पिड़ी सी चालता आय रोयो छे आरू हुयो योहोवान क आगठा मा सुखद गोंद मा चढावो चोढ़ाय चाहे छे. ती हुयो तोसोत कोरसे, जसो तुमु कोरसु।

15तुमरी धर्मसभा मा तुमरे लिय एने तुमरा विच रोहन्या वाळा मानसो क लिय नियम रये। यी तुमरी पीढ़ी सी पीढ़ी लगुन स्थायी नियम होयसे। पोरबुन निगाय मा तुमू आरू प्रवासी दुयो एक जोसा छे। 16तुमरे लिय एने तुमरा विच रोहने वाळा क लिय प्रवासी क लिय एकज व्यवस्था आरू एक ज नियम होयसे।3

17पोरबु मूसा सी कव्यो, 18इसराएली समाज सी यो कहजो: जब तुम उना देश मा पहुचसू जा हाव तुमक लि जाय रयो, 19आरू जब तुमक उना दटेश क रूटा खवाड़िस तव योहोवान करता भेंट चढ़ावजो। 20तुम जौ क पिटा क पेहलो रुटो भेंट मा चड़ावजो। जसो तुम खलियान मा सि भेंट चड़ावसू तोंसों ओक वि चड़ावजो। 21तुमरी पीढ़ी-पीढ़ी मा तुमरा पेहला कुसनला पीठा मा सी योहोवा क हाकली भेंट कोरजू।

22पुन कदाम तुमु विसरू जाऊ, आरू एना हुकुम क पाळन नी करू ज मक- पोरबु न मूसा सी कव्यो छे, 23उन सब हुकुम क समळाड़ने लागियो, ज योहोवा मूसा क लारे आपलो छे, जिन दाहड़े हाव तुमक हुकुम आप्यो उन दाहड़े सि लिन पीढ़ी सी पीढ़ी लगुन- 24ते कदाम उनामा सि कुई हुकुम क पाळन अनजान्या मा होय जाय आरू ओक परो मण्डळी क नी होय, ती आखी मण्डळी आगठान-बली मा एक बयल्यो चड़ावसे। यो पोरबु क लिय वारू सुखद होयसे। मण्डळी ओक सात हुकुमनलारे अन-बलि आरू पिन्यो-बलि चड़ावसे, आरू पाप-बलि मा एक बुकड़ो वी। 25पुजारा आखा इसराएली मण्डळी क लिय पोसतावो कोरसे, काहकी यो अनजान्या मा कोरलि भुल हुती। त्या पोरबु क आगठा मा अर्पित करने क लिय चढावो लाया। हुये आपनी भुल क लिय मक-पोरबु क अगळ पाप-बलि चोड़ायो। 26अतएव आखा इसराएली मण्डळी एने ओक विच रोहने वाळा सब प्रवासी मानसे माफी जोड़से, काहकी सब मानसे एनी विसोर मा भेळा हुता।

27कदाम कुई मानुस अनजाना मा पाप कोरे छे ती हुयो पा-बलि मा एक-साल बुकड़ो चोड़ावसे। 28पुजारो उना मानुस क लिय ज पाप ढापा करसे, ज अनजान्या मा पाप कोर्यो छे, योहोवान सामने पोसतावो कोरसे, आरू ओक माफी जोड़से। 29अनजाना मा भुल करने वाला मानुस क लिय, इसराएल क देशी एने दिसरा विच रोहने वाळा प्रवासी क लिय तुम एकज नियम राखजो। 30कदाम कुई मानुस, चाहे हुयो देशी होय एने पारको, जानु-बुजिन पाप कोरे छे, ति हुयो मक-पोरबु क निन्दा कोरे छे। हुयो आपना मानसो मा सी नाश कोर्यो जासे। 31हुयो मक-पोरबु क बुल क वचन क तिरस्कार कोर्यो छे, उन मारा कायदा क नी मानलो छे। ओसो मनुस आपसो मानसो मा सि छाचिन नाश कोर्यो जासे। ओक ओधोरोम उना पोर होयसे।

आरामोन-दाहड़ा क नी मानेन डोण्ड

32जब इसराएली निर्जन परदेश मा हुता उनक एक मानुस आरामोन-दाहड़ा पोर लाकड़ा चुटता मिळ्यो। 33जेनू मानसो न ओका लाकड़ा चुटता धोर्या हुता, त्या उन मूसा, हारून आरू आखा इसराएली मण्डळी क पास लाव्या। 34त्या हेको धरीन लिदा; काहकी यी वात उजेन्‍ती नी हुयी कि ओक सात काय कोरनो चाहजे। 35पोरबु न मूसा सी कव्यो, एना मानुस क मोतोन-डोन आप्यो जासे। आखा मण्डळी पड़ाव क खोयड़े दोगड़ा दीन ओक मार देसे। 36अत: आखी मण्डळी ओक पड़ाव क खोयड़े लि गोय, आरू दोगड़ा दि-दिन ओक मार नाख्या; जसो हुकुम पोरबु न मूसा क आप्यो हुतो।

झालर न वारा मा नियम

37ओळी योहोवा न मूसा सी कयो, 38इसराएली समाज सी कय; कि तुमरी पीड़ी-पीड़ी मा तुमरा छिंदरा न कुर पर झालर लगाड़ीया करजो, आरू एक एक कुना न झालर पर एक निळ्ळो लेस लगाड़ीया करजो। 39यो तुमरे लिय ओसो फुंदने बोनसे, जेको देखीन तुम मक-पोरबु क कायदा क फौम राखसू एने ओक पाळन कोर सोकसो। तब तुम आपना काळ्जा आरू डुळा क अनुसरण करिन व्याभिचारिणी क जसा धुखू नी कोरसु, जसो तुम हेमी लगुन कोरता आया होय। 40पुन तुमू योहोवा न सारा हुकुम क फोम करीन हेको पाळन करो, आरू तुमरा परमेश्वर न करता चुखा बनो। 41हाव पोरबु, तुमरो परमेश्वर, छे। हाव तुमक मिस्र देश सी खोयड़े निकळो छे की तुमरो परमेश्वर होयो। हाव पोरबू, तुमरो परमेश्वर छे।