गिनती 14

इसराएली लोगहन क कुड़कुड़ायनो

1तव सारी इसराएलीयान मण्डळी उची ओवाज मा बीक मा आयड़ने लागीया। लोगहन रात भरीन रड़ता रया। 2सारा इसराएली मूसा आरू हारूनन विरूद मा बक-बक करने लाग गीया। त्या मूसा आरू हारून सी कयने लागीया, हामरे वाटे वारलो ते योत् हुतो कि हामू मिसर देश मा मर जाता। 3पोरबु हामुक उना देश मा काह ली जाने हुय रीयो? काय म्हारने करीन? त्या हामरा बायरा आरू पोर्यान क हामरे सी लूट लेसे। यो हामरे वाटे वारू छे कि हामु मिसर देश मात् मर जाजे।

4त्या आखा एकु करीन कया, आवु हामु काहला एक जन को हामरे वाटे नेतो बनावजे आरू मिसर देश मा पछा जाती रयजे। 5मूसा आरू हारून सारी इसराएली मण्डळीन सामने मुयन भुरसे धरती पर पड़ीया। 6अरू नुन क पोर्या यहोशू आरू योपुन्नेन पोर्या कालेब, जो देशवाळा माईन हुता, आपसा-आपसा छिंदरा फाड़ीन, 7इसराएलीयान सारी मण्डळी सी कयने लागिया, जिना देशन पुरावो लेने करीन हामू अथान-अथा फिरीन आवला छे, त्यो घणो वारु देश छे। 8कदाम योहोवा हामरे सी घुस हय, ती हामुक उना देश मा, जिना मा दूध आरू माहळन रस उहवे, पुगीन ओको हामुक आप देसे। 9पुन सोरोत यी आहे कि तुम, पोरबु क विरुद लोड़ाय नि कोरु। तुम उना देश क मानसो नी डरनो; काहकी त्या ते हामरा लिय मात्र रुटा जसा छे आरू हामू उको आसानी सी निगळी सकतला। उना पोर सी संरक्षण नू साहळो होत चुक्यो छे आरू पोरबु हामरे सात छे। उना मानसो सी नी डोरू। 10कदाम आखी मण्डळी उना दोगड़ा सी मार नाखने क लिय आयड़ने लागे। तोत्यार सहसा पोरबु क तेज सब इसराएली समाज क मिलन-शिविर पोर देखा पोड़्यो।

लोगहन क करता मूसा न विनता

11पोरबु न मूसा सी कव्यो, ये मानसे कोत्यार लोगुन मारो तिरस्कार कोरता रोहसे? जो मोटा काम हाव इन्हा विच कोर्यो, उना देखिन वी ये कोत्यार लोगुन मख पोर विश्वास नी कोरेसे? 12हामु महामारीन लारे ओक मार नाखिस, आरू ओक डाहला सी वंचित कोरिस। पुन हाव तुख एक ओसो राष्ट्र बनाविस जो इसराएलियो सी जादा मोटो आरू ताकत वाळो हुयसे।

13पुन मूसा न पोरबु सी कोव्यो तब त मिस्री रोहन्या इसराएलियो नु विनाशन यी वात सोमळसे; काहकी तु आपनो शक्ति सी उना मासनो क मिस्र निवासियो क विच सी निकाळिन लावलो छे। 14त्या उना देश मा रोहन्या क बताड़्या। हे पोरबु! राजोन सोमळो छे कि तू इनु मानसो क विच मा छे ; काहकी तुन , हे पोरबु, इनु प्रत्तयक्ष दर्शन आपलो छे। तारो मेघ एनू उपोर ढाकायलो रोहे। तू दाहड़ा क टेम मेघ-खांबा मा, आरू रात क टेम आगठान-खांबा मा इनु ओगोळ-ओगोळ जाय छे। 15कदाम तू एनू मानसो क पुरो: मार नाखे ती जिना राष्ट्र न तारी किर्ति सोमळला छे, त्या कोहसे, 16“जिना देश क पोरदान करने क पोरबु न शपथ खादो हुतो, ओकामा उन मानसो क नी पुचाड़ सक्यो; इकालिय त्यो उन सुकला पोरदेश मा मार नाख्यो।” 17अतरान करीन, पोरबु न मोटी ताकत क देख्यो। तुन कव्यो हुतो की 18“पोरबु वारोन- रिस, जादा करुणामय, ओधोरोम आरू गुणा क माप कोरने वाळो छे। पुन त्यो गुना क काहने वी रिते विनगुनावलो नी कोरसे। त्यो डाहडा क ओधोरोम क डोन तिसरी आरू चौथी पीढी लोगुन ओकी ओवलियाद क आपतो रोहे छे।” 19गिनकोर तु आपनि मोटि दया क अनुरुप , जोसो तू इनु मिस्र देश सी लिन आज लोगुन माफी कोरतो आयो छे, तोसोन इनु मानसो क ओधोरोम क माप कोर।

20योहोवा कयो, तारा निवेदन नू ओनसारे, हाव उना माफ कोरो। 21यो छाचो छे कि हाव जोवतलो छे, आरू आखी कळ मक-पोरबुन महिमा सी परिपुरण होसे। 22अत: त्यो सब मानसो जे मारी महिमा क दर्शन कोर्यो, म्हारा - उना मोटा कामोक देख्या जिनुक हाव मिस्र देश आरू निर्जन पोरदेश मा कर्यो , ओळी वी ज दस वार मक कसौटी पोर कस्यो आरू मारी वाणी नी सोमळ्या, 23त्या उना देश क नी देख सकसे ज आपने क शपथ हाव डाहडा सी खादो हुतो, म्हारो तिरस्कार कोरने वाळा कुई वी मानुस उना देश क नी देख सकसे । 24पुन हाव आपना से वक कालेब क, जेरेम भिन्न आत्मा छे आरू जेरेम पुरो: म्हारो अनुसरण कोर्यो छे, उना देश मा लि जाईस, जा त्यो गयो हुतो। ओकी ओवलियाद उना देश पोर होक कोरसे जेरी घाटियो मा 25अमालेकी आरू कनानी जाति रोहे छे। पुन तुमू काल पोछा जावु आरू अकाबा क खाड़ीन वाटे सी निर्जन पोरदेश क भेनी जाजो।

कुड़कुड़ायने न डण्ड

26पोरबु मूसा आरू हारुन सि कव्यो, 27कव तक भुण्डली मण्डळी मारे विरुद्ध बक-बक करती रोहसे? इसराएली समाज नु बक-बक , ओको म्हारे विरुद्ध बक-बक कोरनो, हाव सोमळ्यो छे। 28उना यो कहजो: पोरबु कोहे छे: म्हारो जीवन न आन! जी वात तुमन मक सोमवाड़्या छे, हुये हाव तुमरे साते करिस। 29तुम्हरा धोड़ इना निर्जन पोरदेश मा पोड़ला रोहसे। तुमरा त्या सब मानसोन गिनती होयली; ज बीस साल क एने एरेसी जादा उमोर छे; आरू ज म्हारे विरुद्ध बक-बक कोर्या छे; 30उना मा सी योपुन्ने क पुर्य कालेब एने नुन क पुर्य यहोशू क छुड़िन कुई वी मानुस उना देश मा प्रवेश नी कोरसे, जेरेम तुमूक बसाने क हाव शपथ खादो छे। 31तुम्हरा पुर्या क जिना वाराम कव्यो हुतो लुट लिदा जसे, हाव उना देश मा लावीस। त्या उना देश क जानसे, जेरे तुमन तिरस्कार कोर्या छे। 32पुन तुम्हरा धोड़ इनाहा निर्जन पोरदेश मा पोड़ रोहसे। 33जोत्यार लोगुन तुम्हरा धोड़ निर्जन पोरदेश मा पुरो: धुळा मा नी मिळ जासे ति लोगुन, चाळिस साल लगुन , तुम्हरा पुर्या निर्जन पोरदेश मा चरवाहा बोनला रोहसे आरू तुम्हरा भुरसुतुड़नो क डोन भुगतसे। 34जोतरा दाहड़ा लोगुन तुमन उना देश क भैद लिदा, अर्थात् चाळिस दाहड़ा लोगुन, उनक आकड़ान ओनसारे, दाहड़ा पोछोळ एक साल, तुम चाळिस साल लोगुन आपना ओधोरोम क भार हुचल्या कोरता रोहसे। ओस करिन तुम मारु अप्रसन्नता क जानसू। 35हाव-योहोवा यो कयलो छे! हाव एनी दुष्ट मण्डळी क सात, ज मारे विरोध मा एकठा हुयला छे, छाचिन ओसो त कोरिस। इना निर्जन पोरदेश मा उना आखो विनाष होयसे। येत मोर मिटसे।

36जिनू गुप्तचरो क मूसा न कनान देश क भैद लेने क लिय मुकल्यो हुतो, आरू जे उना देश क झुटी खोबोर कविन इसराएली मण्डळी क मूसा क विरुद्ध भोड़काया हुता, 37त्या मानसे, कनान देश क बुराई कोरिन, झुटो खबर लाव्या हुता। अत: त्या पोरबु क अगळ महामारी सी मोर गोया। 38पुन कनान देश क भेद लेने क लिय गोया होता गुप्तचर मा सी यहोशू बेन-नुन आरू कालेब बेन-योपुन्ने जिवतला रोया।

उना देश पर हमलो करनो

(व्यवस्थाविवरण 1:41-46)

39जब मुसा न यी वात इसराएली मानसो सी कव्यो, ती हुये घोना शोक मनाया। 40त्या सोंदारे उठ्या आरू आक्रमण क उद्देश्य सी बोयड़ा इलाका क उचा जागा पोर चोड़ गोया। त्या कोहता हुता, हामू तियार छे। हामू उना जागा पोर आक्रमण कोरसु, जेरे वाराम पोरबु न कव्यो छे। हामू मानजे की हामु पाप कोर्या छे। 41पुन मुसा न कव्यो, तुमू पोरबुन हुकुम क नि मानता काहा? यो अभियान सफल नी होयसे। 42तुमु मा चोहड़ु! ओसो नी होये की तुमु आपसा दुसमोल क अगळ हार जावु; काहकी पोरबु तुमरे विच नी छे। 43अमालेकी आरू कनानी जाति तुमरे सामने छे, आरू तुम तलवार सी मोतोन घाट उतरी जासु तुमन पोरबु क अनुसरण कोरने सी मुय मुड़ाय लेदा छे अत: पोरबु तुमरे साते नी होयसे। 44कदाम पोरबुन विधान क मोन आरू मूसा पड़ाव सी नी छेटु होये, ती वी त्यो आक्रमण क उद्देश्य सी बोयड़ा इलाका क उचा जागा पोर चोढ़नेन वारू नी कोर्या। 45तब उना बोयड़ान इलाका मा रोहने वाला अमालेकी आरू कनानी मानसे न उना पोर आक्रमण कोर दिदा। उना इसराएलियों क हाराय देदा आरू होर्मा नगर लोगुन ओको पोछोल पोड़्या।