Dhankavi Bible
गिनती 13
बारे गुप्तचहरो क कनान देश जानो
(व्यवस्थाविवरण 1:19-33)
योहोवा मूसा सी कयो, कनान देश जिनाक हांव इसराएलियान क आपो हेको भेद लेन करीन अदेमड़ान मुखी क तू मोकल। कुळ आरू मूसा योहोवा न हुकुम न ओनसारे उना पारान जंगल सी पोरदेश सी मुकली दिदो, सब की सब इसराएलियान डाहला। उना नाव ये छे: रुबेन कुळ सी जक्कूर क पोर्य शम्मू; शिमोन नु कुळ सी होरी क पुर्य शापात; यहूदा नू कुळ सी योपुन्ने क पुर्य कालेब इस्साकार क कुळ सी यूसुफ क पुर्य ईगाल; एप्रैम नू कुळ सी नुन क पुर्य होशे; बिन्यामीन नू कुळ सी रापू क पुर्य पलती; जबूलून नू कुळ सी सोदी क पुर्य गद्दीएल; यूसुफ नू कुळ सी मनश्शे नू कुळ माईन सूसी न पोर्यो गद्दी; दान नू कुळ सी गमल्ली क पुर्य अम्मीएल; आशेर नू कुळ सी मिखाएल नू पुर्य सतूर; नप्ताली नू कुळ सी वोप्सीन पुर्य नह्बी; गाद नू कुळ सी माकीन पुर्य गुएल। ये उना मानसो नू नाव छे, जिना मूसा कनान देश नू भेद लेने क लिय मुकल्यो हुतो। मूसा नुन नू पुर्य होशे नू नाव यहोशू रखा।
मूसा नू उना कनान देश नू भेद लेने क लिय मुकल्यो आरू उना सी कयो, यां सी नेगेब न दक्षिण सी होईन बोयड़ा मा जावू, आरू उना देश को देखू की हुयो कोसो छे। उना निवास कोरने वाळा लोगहन छे यानी दुर्बल; हुये घोना कोम, मोतलोब की बेस। आरु जिना देश मा त्या रये, त्यो कसो छे, वारू की भुण्डो, आरू कसा शहरो मा बसला छे, ताम्बा तानी रये ता गढ़ या किला मा रये, देश समृद्ध छे एने दरिद्र? होंया झाड़-झाड़का छे एने नी? तुमू- सब साहसी बोनू! तूमू उना देश क काहीन फोव वी लावो। उना दाहड़ा पेहला पाकला अंगुरो नु दाहड़ा हुता।
गुप्तचर चाली गोया। उना सीनाय निर्जन प्रदेश सी, हमात घाटी क प्रवेश-झोपला नू धोड़े रहोब नगर लोगुन पुरा देश नू भेद ली लिदा। त्या उना नेगेब इलाका सी होईन गोया आरू हेब्रोन नगर मा प्रवेश कोर्या। उना उचां-उचा अनाक नू ओवलियाद अहीमन, शेशय आरू तलमय रोहता हुता। (हेब्रोन नगर मिस्र नू सोअन नगर सी सात साल क वोसलो हुतो।) उना एश्कोल1 नी घाटी लोगून गोया। होंया हुये अंगूरन एक गुछळो डाळ भेव तुड़्यो आरू दुयो मानसो एक लाकड़ा पोर मेकिन ली गोया। हुयो अनार आरू अंजीरन काहय फोव वी ली गोया। ज गुछळो इसराएली होयां सी काटिन ली गोया हुता, उना कारन उना जागान नाव एश्कोल नू घाटी पोड्यो।
गुप्तचर चावीस दाहड़ान वाद कनान देश नू भेद लिन आया। आरू पारान न जंगल न कादेश नावन जागा मा मूसा हारून आरू इसराएलियान सारी मण्डळी न पास पुगीयो; आरू हेनको सारी मण्डळी क खबर समळायो, आरू देश न फळ हेनको देखाड़ीया। हुये मूसा दाखलो सोमळाड़्यो। त्यो कयो, जिना देश मा तूमू हामु मुकल्यो हुतो, उना मा गोया। निस्संदेह उना दूध आरू माहळ नी नदिया उहवे छे। देखू, यी उना देश नू फोव छे। बाखुन उना देश मा रोहने वाळा मानसो बलवान छे। उना नगर सुदृढ़ आरू घोना मोटा छे। एकालिय एरेसिवा हामू होंया उचा उचा अनाक नू ओवलियाद वी देखे। अमालेक जाति नेगेब पोरदेश मा निवास कोरती छे। हित्ती, यबूसी आरू एमोरी जातिया पहाड़ी पोरदेश मा रोहे छे। कनानी जाति दोरीया तट एने यरदन नदीन किनारे निवास कोरे छे।
बाखुन कालेब न मूसान ओगळ मानसो नू हुगो कोर्यो। हुयो कयो, आवू, हामु उना देश पोर तोत्काल चढाई कोरे आरू ओक आपनो हक मा कोर ले; काहकी हामू हेनू पर जिक हात करने घा छे। पुन अदेमड़ा हेनको साथ गयला हुता, हुयो कयो, हामू उना मानसो क विरूद्ध चोढ़ाई कोरने मा असमर्थ छे; काहकी हुयो हामरे सी जादा ताकोतवाळो छे। ज मानसे कनान देश नू भैद लिन गोया हुता, उना इसराएली समाजनू उना देश क झुठो विवरण वी आप्यो। हुये ककयो, उना देश नू भेद लिन हामू गोया हुता, हुये एक ओसो देश छे ज आपना रोहने क खाय जातो छे। उन सब मानसो, जेनुम हामु देख्या, उचा ने जबार छे। त्या हामरे दानवो क वी देख्या अनाकवंशियों सी ओवलियाद, जा दानव सी निकळ्ळा छे। हुये देखिन हामू ते आपनी निगाह मा टिड़्यान जसो देखाये , आरू ओसोत ओकी निगाह मा वी
Source notes (1)
- Footnote एश्कोल अंगुरन घुड़
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.