Skip to content
BibleKenya

Dhankavi Bible

यहोसु 23

योहोसुन उपदेश

ओका बैस दाहड़ाक बाद, जव योहोवा इसराएलीयाक उनाक चार तरफ शत्रु सी आराम देदा, आरु योहोसु दाडला आरु बैस दाहलो होय गया, तव योहोसु सब इसराएलीयाक, मतलब पुरानो मुखी मानुस, न्यायियो, आरु सरदारक बुलावीन कयने लाग्या, “हाव ते हिमी डाहला आरु बैस सालक होय गयु छे; आरु तुमु नी देखता छे की तुमरो परमेश्वर योहोवा तुमरे निमत्त इनी सब जातीया सी काय काय करला छे, काहकी जी तुमरी तरफ सी लड़तु आयु छे चु तुमरो परमेश्वर योहोवा छे। देखु, हाव इनी वाचली जातीयाक चीट्ठी न्हाख न्हाखिन तुमरा गोत्राज भाग कर देदा छे; आरु यरदन सी लीन दाहड़ु बुडने तरफ मोटलो दरीया तक रयनरवाळी उना सब जातीयाक भी ओसोज देदा छे, जेकाक हाव काट न्हाख्या छे। आरु तुमरो परमेश्वर योहोवा उनाक तुमरे सामने उनाक देश सी निकाळ देसे; आरु तुमु आपना परमेश्वर योहोवाक वचन क अनसारे उनाक देशक हक होय जासे। एरकरता बैस हियाव बाँधिन, जो काहय मुसान व्यवस्थाक कीपात मा लीखलो छे ओकाक पुरो करने मा चोकसी करनु, ओका सी नी ते जेवड़े वोगे फिरनु आरु नी डाखरे। या जा जातीया तुमरे वीचमा रय गया छे इनाक वीच मा नी जानु, आरु नी ओका देवताक नावक चर्चा करनु, आरु नी ओकान शपथ खावळावनु, आरु नी ओकान वीनता करनु, आरु नी ओकाक दण्डवत् करनु, पुन जोसो आजुन दाहड़े तक आपना परमेश्वर योहोवाक भक्ती मा लवलीन रयता होसे, तोसाज रया करनु। योहोवा तुमरे सामने सी मोटली मोटली आरु बलवन्त जातीया निकावळी छे; आरु तुमरे सामने आजुन दाहड़े तक कुई रुकाय नी सक्या। तुमु मा सी एक मानसक हजार मानसक डासाड़से, काहकी तुमरो परमेश्वर योहोवा आपना वचनक अनसारे तुमरी तरफ सी लड़ता छे। एरकरता आपना परमेश्वर योहोवा सी मोंग राखनेक पुरी चोकसी करनु। काहकी कदाम तुमु काहनी रीती योहोवा सी फिरीन इनी जातीयाक बाकी लोगहन सी मिवने लागे जो तुमरे वीच वाचला होया रयता छे, आरु इना सी हियाव करीन इनाक साथ समधियाना रीश्ता जुड़ो, ते नक्की जान लेवु की ओगव तुमरे परमेश्वर योहोवा इनी जातीयाक तुमरे सामने सी नी निकाळसे; आरु या तुमरे करता पाणी आरु फंदा, आरु तुमरे पांजरोक करता कोड़े, आरु तुमरी डुवा मा काटा ठरसे, आरु नास मा तुमु इनी वारली धरती पर सी जो तुमरो परमेश्वर योहोवा तुमुक आपी छे खतम होय जासे।

“सोमवु, हाव ते हिमी संसारीयाक गती पर जानेवाळो छे, आरु तुमु सब आपना आपना ह्रदय आरु मन मा जानता होसे, की जोतरी भलाईक वात आमरा परमेश्वर योहोवा आमरे वीषय मा कया उनामा सी एक भी बिना पुरी होया नी रयु; चा सबक सब तुमु घट गई छे, उनामा सी एक भी बिना पुरी होए नी रई। ते जोसो तुमरो परमेश्वर योहोवाक कयली वात सब भलाईक वात तुमु पर घटी छे; तोसोज योहोवा वीपत्तीक सब वात भी तुमु पर लागाड़से आरु तुमुक इकी वारली धरतीन उपर सी, जेका तुमरा परमेश्वर योहोवा तुमुक आप्या छे। खतम कर न्हाखसे। जव तुमु उका वाचाक, जेका तुमरे परमेश्वर योहोवा तुमुक हुकुम आपीन आपने साथे बांधाया छे, तुड़नो करीन पराया देवताक वीनता आरु उनाक दण्तत् करने लाग्या, तव योहोवाक कोप तुमु पर भड़केगा, आरु तुमु ओका वारला देश मा सी जेका ओका तुमुक आप्या छे पटकन खतम होय जासे।”

Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.