यहोसु 22

पुर्व मा बठला गोत्राक घर वापस जानेक आदेश

1उके टेमे योहोसु रुबेनिया, गादिया, आरु मनश्शेक आदा गोत्रीयाक बुलावीन कयो, 2“जी जी हुकुम तुमु मानला छे, आरु जी जी हुकुम मुसा काजे योहोवा तुमुक आपली छे उना सभाक भी तुमु मानला छे; 3तुमु आपना भाईसक ओतरा दाहड़ा मा आज क दाहड़े तक नी छुड़्या, पुन आपना परमेश्वर योहोवा क हुकुम तुमु चोकसी सी मानी छे। 4आरु हिमी तुमरो परमेश्वर योहोवा तुमरा भाईसक आपना वचनक अनसारे आराम देदा छे; एरकरता हिमी तुमु वापस फिरीन आपना आपना डेराक, आरु आपनी निजी धरती मा, जेका योहोवाक दास मुसा यरदन पार तुमुक आप्या छे, जात रयु। 5केवल ओका वात क पुरी चोकसी करनु की जी जी हुकुम आरु व्यवस्था योहोवा क दास मुसु तुमुक आपी छे ओकाह मानीन आपना परमेश्वर योहोवा सी मोंग राखु, ओका सब मार्ग पर चालु, ओकान हुकुम मानु, उकान भक्ती मा लवलीन रयु, आरु आपना सब मन आरु सब प्राण सी ओकान सेवा करु।” 6तव योहोसु हेका सय बोरकोत आपीन वाट लागाड्या आरु चा आपना आपना डेरा पर जात रया।

7मनश्शे क आदा गोत्रीयाक मुसु बासान मा भाग देदो हतो; पुन दिसरा आदा गोत्राक योहोसु ओका भाईसक वीच मा यरदनक पश्चीमक तरफ भाग देदा। ओकाह जव योहोसु सोयाव्वु कोवीन वाट लागाड़्या की आपना आपना डेरा मा जाऊ, 8तव उनाक भी सय बोरकोत आपीन कया, “बैस सी पशु, आरु चाँदी, हुनो, पीतवन, लोखंडो, आरु बैस सी छिंदरा, आरु बैस धन-सम्पत्ती लीन आपना आपना पेरा पर जात रयु; आरु आपना दुश्मनक लुटक सम्पत्ती क आपना भाईसक साथे वाट लेजु।”

9तव रुबेनी, गादि, आरु मनश्शे क आदा गोत्री इसराएलीयाक जु सी, मतलब कनान देश क शीला नगर सी, आपनी गिलाद नावन निजी धरती मा, जी मुसान द्वारा आपी गई योहोवा क हुकुमोन अनसारे उकान निजी धरती होय गई हती, जानेन वीचार सी वापस फिर गया।

यरदनक कीनारे वेदीक स्थापना

10जव रुबेनी, गादि, आरु मनश्शे क आदा गोत्री यरदनक उका तराई मा पुग्या जा कनान देश मा छे, तव हेका चा देखने योग्य एक मोटली वेदी बनाई। 11आरु ओका खबर इसराएलीयाक सोमवने मा आयो, की रुबेनियो, गादियो, आरु मनश्शेक आदा गोत्रीयोन कनान देशक सामने यरदनक तराई मा, मतलब ओकान उका पार जा इसराएलीयाक छे, एक वेदी बनाई छे।

12जव इसराएलीया यो सोमव्या, तव इसराएलीयाक सब मण्डली ओका सी लड़नेक करता चढ़ाई करनेक करता शीलो मा एकठा होया।

13तव इसराएलीया रुबेनियो, गोदिया, आरु मनश्शेक आदा गोत्रीयाक जु गिलाद देश मा एलीयाजर याजकक पोर्‍यो पीनहासक, 14आरु ओका साथे दस प्रधानोक, मतलब इसराएलक एक एक गोत्रा मा सी पुर्वजक एक एक प्रधानक मोकल्या, आरु चा इसराएलक हजारो मा आपना आपना पुर्वजक घरानाक मुखी मानुस हतो। 15चा गिलाद देश मा रुबेनिया, गादिया, आरु मनश्शेक आदा गोत्रीयाक जु जाईन कयने लाग्या, 161“योहोवा क सब मण्डली यो कयती छे, ‘तुमु इसराएलन परमेश्वर योहोवाक यो कोसो विश्वासघात कर्‌या; आज जो तुमु एक वेदी बनाव लेदा छे, ओका मा तुमु ओकान पछव चालनेक छुड़ीन ओकान वीरुद आज बलवा कर्‌या छे? 172सोमवु पोरक वीषयक ओधोरोम आमरे करता जुरुक कम हतो, यद्यापि योहोवाक मण्डलीक भारी दण्ड जोड़े तेभी आजुन दाहड़े आमु ओका ओधोरोम सी चुखा नी होया; काय चो तुमरी नजर मा एक नानी वात छे 18की आज तुमु योहोवाक त्यागीन ओकान पछव चालमनु छुड़ देन्या छे? आज तुमु योहोवा सी पछा जाता होसे, आरु काल चा इसराएलक सब मण्डली सी क्रोधित होसे। 19पुण दाम तुमरो सतान जागो वीटोळ हय ती पार आवीन भगवानन खास जागा मा जाँ सारी भगवान रये हामरे वीच मा तुमरो सतान जागो कर लेयो पुण हामरा योहोवा परमेश्वर वेदी क छुड़ीन कोय दिसरी वेदी बनावीन हेको वीरुध्द मा झुन जाता आरु नी ते हामरे वीरुद मा। 20देखु, जव जेरह क पोर्‍यो आकान अर्पण करली चीजक वीषय मा विश्वासघात कर्‌या, तव काय योहोवाक कोप इसराएलक पुरी मण्डली पर नी भड़क्यो? आरु ओका मानुसक धर्मक प्राण डोन एखलाक ओकाक नी जोड्या।’”

21तव रुबेनिया, गादियो, आरु मनश्शेक आदा गोत्रीया इसराएलक हजारोक मुखी लोगहनक यो जवाब देदो, 22“योहोवा परमेश्वर आखा सी जुर भरीयो ताकत वाळो छे, त्यो भगवानुत जाने, आरु इसराएली भी ओका जान लेसे की कदाम योहोवा सी फिरके या ओकान विश्वासघात करीन आमु यो काम कर्‌या होसे, ते तु आज आमुक जीवतु नी छुड़े, 23कदाम आज क दाहड़े आमु नी वेदीक एरकरता बनाया होसे की योहोवाक पछव चालनु छुड़ देजे, या एरकरता की ओका पर होमबली, अन्नबली, या मेलबली चढ़ाया, ते योहोवा आप हेरो हिसाब लेसे; 24पुन आमु ओका वीचार आरु मनसा सी यो कर्‌या छे के भवीष्य मा तुमरी सन्तान आमरी सन्तान सी यो नी कयने लागे, ‘तुमुक इसराएलक परमेश्वर योहोवा सी काय काम? 25काहकी, हे रुबेनियो, हे गादियो, योहोवा जो आमरे आरु तुमरे वीच मा यरदनक सीमा ठराय देदो छे, एरकरता योहोवा मा तुमरा एक भी भाग नी छे।’ ओसो कोईन तुमरी सन्तान आमरी सन्तान मा सी योहोवाक बीक छुड़ाय देसे। 26एरकरता आमु कया, ‘आवु, आमु आपने करता एक वेदी बनाव लेवु, चा होमबली या मेलबलीन बादा न करता नी, 27पुन एरकरता की आमरा आरु तुमरा, आरु आमरा बाद आमरा आरु तुमरा ओवलीयादक वीच मा साक्षीन काम आप; एरकरता की आमु होमबली, मेलबली, आरु बादा चढ़ावीन योहोवाक सामने ओकान उपासना करे; आरु भवीष्य मा तुमरी सन्तान आमरी सी यो नी कयनु जुवे, की योहोवा मा तुमरो कुई भाग नी।’ 28एरकरता आमु कया, ‘जव चा लोगहन भवीष्य मा आमु सी या आमरा ओवलीयाद सी यो कयने लाग्या, तव आमु उना सी कयसु, की योहोवाक वेदीक नमुना पर बवनी होई ओका वेदीक देखु, जेका आमरा डाहला होमबली या मेलबलीक बादा न करता नी बनाया; पुन एरकरता बनाया हता की आमरे आरु तुमरे वीच मा साक्षीक काम आप।’ 29यो आमु सी छेठा रया की योहोवा सी फिरीन आज ओकान पछव चालनु छुड़ दे, आरु आपनु परमेश्वर योहोवाक ओका वेदीक छुड़ावीन जो ओकान निवासक सामने छे होमबलि, आरु अन्नबलि, या मेलबलिन बादान करता दिसरी वेदी बनाया।”

30रुबेनियो, गादियो, आरु मनश्शेक आदा गोत्रीयाक इनी वातक सोमवीन पीनहास याजक आरु ओकान साथे मण्डलीक प्रधान, जो इसराएलक हजारो मुखी मानसे हता, चा बैस खुश होया। 31आरु एलीयाजर याजकक पोर्‍यो पीनहास रुबेनियो, गादियो, आरु मनश्शेइयो सी कया, “तुमु जो योहोवाक ओसो विश्वासघात नी कर्‌या, ओका सी आज आमु यो जान लेदा की योहोवा आमरे वीच मा छे: तुमु लोगहन इसराएलीयाक योहोवाक हाथ सी वाचाड्या छे।” 32तव एलीयाजर याजकक पोर्‍यो पीनहास प्रधान समेत रुबेनियो, आरु गादियोक, जु सी गिलाद होयता कनान देश मा इसराएलीयाक जु वापस गया: आरु यो वृतान्त उनाक कय सोमवाड्या। 33तव इसराएली खुश होया: आरु परमेश्वरक सोयाव्वु कया, आरु रुबेनियो, आरु गादियो, सी लड़ने आरु उनाक रयनेक देश उजाड़नेक करता चढ़ाई करनेक चर्चा पछी नी करी। 34आरु रुबेनियो, आरु गादियो, यो कोईन, “यी वेदी आमरे आरु उनाक वीचमा ओका वातक साक्षी ठरी छे, की योहोवाज परमेश्वर छे;” ओकी वेदीक नाव एद मेक्या।