Dhankavi Bible
यहोसु 24
शकेम मा योहोसुक आखरी आदेश
पछा योहोसु इसराएलक सब गोत्राक शकेम देस मा इकट्ठा कर्या, आरु इसराएलक डाहला लोगहन आरु मुखी लोगहन, आरु न्यायियो, आरु सरदारक बुलवाया; आरु चा परमेश्वरन सामने हजर होया। 1तव योहोसु उना सब लोगहन सी कया, “इसराएलक परमेश्वर योहोवा ओका प्रकार कयता छे, ‘प्राचीन काल मा अब्राहम आरु नाहोरक बास तेरह आदि, तुमरा पुरखा परात महानदक ओका पर रयता रयता दिसरा देवताक वीनता करता हता। 2आरु हाव तुमरे खास अबराहम महानदक उका पार सी ली आवीन कनान देशक सब स्थान मा फिराया, आरु ओकान ओवलीयाद बढ़ाया। आरु ओका इसहाको आप्या; 3पछा हाव इसहाको याकुब आरु एसावक आप्या। आरु एसावक हाव सेईर नावन पहाड़ी देश आप्या के चा ओकान होक होसे, पुन याकुब बेटो-नातन्यो समेत मिसरक गया। 4पछा हाव मुसा आरु हारुन मुकलीन उना सब कामोक द्वारा जो हाव मिसर मा कर्या, उका देशक मारा; आरु ओकान बाद तुमुक निकाळ लाया। 5आरु हाव तुमरे डाहलाक मिसर मा सी निकाळ लाया, आरु तुमु दोरीयाक पुग्या; आरु मिसरीया रथ आरु सवारोक साथे लीन लाल दरीया तक तुमरा पीछा कर्या। आरु जव तुमु योहोवाक दोहाई आपी तव ओकान तुमरे आरु मिसरीयाक वीच मा अन्धियारा कर देदा, आरु उना पर दरीयाक वयाडीन उनाक डुबाड़ देदा; आरु जो काहय हाव मिसर मा कर्या उका तुमु बैस लोगहन आपनी डुवा सी देख्या; पछा तुमु बैस दाहड़े जंगल मा रया। 6तव हाव तुमुक उना एमोरीयाक देश मा ली आया, जो यरदन उका पार बठला हता; आरु चा तुमु सी लड़े, आरु हाव हेके तुमरे ओवलीयाद मा कर देदा, आरु तुमु उनाक देशक आधिकारी होय गया, आरु हाव उनाक तुमु सामने सी सत्यानाश कर न्हाख्या। 7पछा मोआबक राजा सिप्पोरक पोर्याक बालाक उठावीन इसराएल सी लड़ा; आरु तुमुक शाप देनेक करता बोर क पोर्या बिलामक बुलावने मुकल्यो, पुन हाव बिलामक नी सोमव्यु; चा तुमुक बोरकोत आपता गया; ओका प्रकार हाव तुमुक ओकान हाथ सी वाचाड्या। तव तुमु यरदन पार होईन योरीहोक जु आया, आरु जव योरीहोक मानुसे, आरु एमोरी, परीज्जी, कनानी, हित्ती, गिर्गाशी, हिब्बी, आरु यबुसी तुमु सी लड्या, तव हाव हेका तुमरा वश मा कर देदा। 8आरु हाव तुमरे ओगव गेंडरा क मुकल्या, आरु हेकान एमोरीयान दुयु राजा तुमरे सामने सी डास्या; देखु, यी तुमरी तलवार या धोंदलीक काम नी होयो। 9पछा हाव तुमुक ओसा देश आप्या जेका हाव तुमु मेहनत नी कर्या हता, आरु ओसो नगर भी देदा छे जेका तुमु नी बठाड्या हता, आरु तुमु ओकामा बठला होसे; आरु जीन दाखरस आरु जेतुनन वाड़ीन फोवक फोव तुमु खाता होसे हेका तुमु नी लागाड्या हता।’
“एरकरता हिमी योहोवा परमेश्वरन बीक मानीन ओकान सेवा छाचाय आरु सच्चाई सी करु; आरु जीन देवताक सेवा तुमरा पुरखा महानदक उका पार आरु मिसर मा करता हता, हेका छेठा करीन योहोवाक सेवा करु। आरु कदाम योहोवा परमेश्वरन सेवा करनु तुमुक बुरो लागे, ते आज नेवाळ लेवु कुनीन सेवा कर हत, चाहे उना देवताक जीनाक सेवा तुमरा पोरखा महानदक उका पार करता हता, आरु चाहे एमोरीयाक देवतान सेवा करु जीनाक देश मा तुमु रयता होसे; पुन हाव ते आपना घराना समेत योहोवान सेवा नित करीस।”
तब लोगहन जवाब देदा, “योहोवा परमेश्वर क त्यागीन दिसरा देवतान सेवा करनु आमु सी छेठा रयु; काहकी आमरु परमेश्वर योहोवा चा छे जु आमुक आरु आमरे पुरखाक दासत्वक घर, मतलब मिसर देश सी निकाळ ली आया, आरु आमरा देखता देखता मोटला मोटला वीछेळीयो काम कर्या, आरु जेकी वाट पर आरु जोतरी जातीयाक वीच मा सी आमु चालीन आवता हता ओका सी आमरी रक्षा; आरु आमरे सामने सी ओका देश मा रयनेवाळा एमोरी कदाम सब जातीयाक निकाळ देदा छे; एरकरता आमु भी योहोवाक सेवा करसु, काहकी आमरो परमेश्वर चो छे।”
योहोसु लोगहन सी कयो, “तुमु सी योहोवाक सेवा नी होय सकती; काहकी चो पवित्र परमेश्वर छे; चो जलन राखनेवाळो ईश्वर छे; चो तुमरो आपराध आरु पाप सोमा नी करसे। कदाम तुमु योहोवाक त्यागिन देवतान सेवा करने लागसे, ते यद्यपि चा तुमरो भलो करता आयो छे तेभी चा फिरीन तुमरो नुकसान करसे, आरु तुमरो नास भी कर न्हाखसे।” लोगहन योहोसु सी कया, “नी; आमु योहोवान सेवा करसु।” योहोसु लोगहन सी कयो, “तुमु आपसुज आपना साक्षी होयु की तुमु योहोवान सेवा करनु नेवाळ लेदा छे।” हेका कया, “होव, आमु साक्षी छे।” योहोसु कयो, “आपने वीच मा सी पराया देवताक छेठा करीन आपना आपना मन इसराएलक परमेश्वर योहोवाक तरफ लागाडु।” लोगहन योहोसु सी कया, “आमु ते आपना परमेश्वर योहोवाक सेवा करसु, आरु ओकान वात मानसु।” तव योहोसु उके दाहड़े उना लोगहन सी वाचा बांधाड्या, आरु शकेम मा ओकान करता वीधि आरु नियम ठराया।
यो सब वृतान्त योहोसु परमेश्वरक व्यवस्थाक कीपात मा लीख देदा; आरु एक मोटलो दगडो नेवाळीन चा ओका बांज झाड़कान नेड़ो उबो कर्यो, जो योहोवान पवीत्रस्थान मा हतो। तव योहोसु सब लोगहन सी कयो, “सोमवु, यो दगड़ु आमु लोगहनक साक्षी रवसु, काहकी जोतरा वचन योहोवा आमु सी कया छे हेका यो सोमव्यो छे; एरकरता यो तुमरा साक्षी रवसे, ओसो नी होए की तुमु आपना परमेश्वर सी मुकर जावु।” तव योहोसु लोगहनक आपना आपना निज भाग पर जानेम करता वाग लागाड्या।
योहोसु आरु एलीआजारक मोत
इनी वातन बाद योहोवाक दास, नुनन पोर्यो योहोसु, एक सोव दस सालन होईन मर गयो। आरु ओकाह तिम्नत्सेरह मा, जु एपरेम क पहाड़ी देश मा गाश नावन पहाड़क उत्तर मा छे, उकान भाग मा धुवो आप गया।
योहोसु क जीवन भर, आरु जा डाहला लोगहनक योहोसुक मरनेक बाद जीवीता रया आरु जानता हता की योहोवा इसराएलक करता कोसा कोसा काम कर्या हता, ओकान भी जीवन इसराएली योहोवाक सेवा करता रया।
पछु युसुफन हाड़का जेका इसराएली मिसर सी ली आया हता चा शकेमक धरतीक ओका भाग मा गाड़ी गई, जेका याकुब शकेमक बास हमोर पोर्या सी एक सोव चांदीक सिक्का मा मोल लेदा हता; एरकरता चु युसुफन सन्तानक निज भाग होय गयो। हारुनक पोर्यो एलीयाजर भी मर गयो; आरु ओकान एपरेमक पहाड़ी देश मा ओका पहाड़ी पर धुवो आपी गई, जी ओकान पीनहासक नाव पर गिबत्पीनहास कयाड़ती छे आरु ओकाक आपी गई हती।
Source notes (9)
- Cross-reference उत्पत्ति 11:27
- Cross-reference उत्पत्ति 12:1-9
- Cross-reference उत्पत्ति 25:24-26; 36:8; व्यवस्थाविवरण 2:5; उत्पत्ति 46:1-7
- Cross-reference नीरगमन 3:1-12
- Cross-reference नीरगमन 14:1-31
- Cross-reference गिनती 21:21-35
- Cross-reference गिनती 22:24-25
- Cross-reference नीरगमन 23:28; व्यवस्थाविवरण 7:20
- Cross-reference व्यवस्थाविवरण 6:10-11
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.