Dhankavi Bible
योहेजकेल 46
डाहला आरु तीहवार
परमेश्वर योहोवा ओसु कोवे: धोड़े वाळा आंगनान उगेनलो झोपलो हापताम छोव दाहड़ा बोंद रोवसे, पुन सातवे दाहड़े मोतलोब आरामोन दाहड़े उगेड़लो रोवसे। नोवला चांदोन दाहड़े वी उगेड़लो रोवसे। डाहला खोयड़े सी झोपलान ओसारेन वाटो सी आवीन झोपलान एक खांबा धोड़े उबा होय जाय, आरु पुजारो हेरो होमबली आरु मेलबादा तीयार कोरे; आरु होयो झोपलाक डेवढ़ी पोर वांद्या कोरे; तोत्यार होयो खोयड़े जाय, आरु झोपलाक सांतो सी पेहेल बोंद नी कोरे। मानसे आरामोन दाहड़े आरु नोवला चांदोन दाहड़ाम हेना झोपलाम योहोवा ओगोळ वांद्या कोरे। आरामोन दाहड़ाम जो होमबली डाहला योहोवा जुगु चोड़ावे, चो गाडरान छोव विनगुनाका पीला आरु एक वीनगुनको मेढ़ो चोड़ावे। ओनोन बादा यी होये मोतलोबक गाडरा पुठी दोस कीलु ओन आरु गाडरान पीला पुठी, जोतरो तीनाक आपाये आप सोके। आरु होरीक दोस कीलु ओन पुठी सात लीटर जेतुनोन तेल चोढ़ावसे। नोवला चांदोन दाहड़े होयो एक विनगुनाको बछड़ो आरु गाडरान छोव गिदल्या आरु एक मेढ़ो चोड़ावे; ये आखा वीनगुनाक रोवे। बोछड़ो आरु मेढ़ो दुयो पुठी दो कीलु ओन, आरु मेमना पुठी जोतरो आपायो तोतरो ओन आरु होरीक दोस कीला पुठी सात लीटोर तेल। जोत्यार डाहला माहाय जाय तोत्यार होये झोपलान ओसारे सी होयीन जाय, आरु तेनेत वाटो सी निकळी जाय।
जोत्यार देसोम रोवन्या योहोवा सी मिळने खास तिहवार पोर आवसे ती जे मानसे बोखेवरे झोपला सी वांदता जायीन भोराया कोरसे, होये दोखेवरेन झोपला सी जासे। जे मानसे झोपला सी भोरायसे चे बोखेवरेन झोपला सी जासे। कुदु वी तेने वाट सी नी पोछो आवसे जेनासी होयो भोरायलो। होरीक मानुस सुदो ओगोत जातो रोवनो जुवे। जोत्यार मानसे माहाय जासे ती डाहला माहाय जासे। जोत्यार होये खोयड़े निकोवसे तोत्यार डाहला खोयड़े जासे।
तिहवार आरु दिसरा खास टेमोन पोर ओनोन बादा चोड़ावसे, तोत्यार हेंदरे पुठी चोड़ावनेन नेम छे होरीक बछड़ा आरु गाडरा पुठी दोस कीलो ओन, आरु मेमना पुठी जोतरो आपाये तोतरो ओन आरु होरीक दोस कीला पुठी सात लीटर जेतुनोन तेल।
जोत्यार डाहला होमबली एने मेलबादा मोरजीन बादा कोरीन योहोवा जुगु तीयार कोरे, तोत्यार उगेनला झोपलाक उगाड़ देनो, आरु होये आपसो होमबादा आरु मेलबादा तोसात तीयार कोरे जोसा होये आरामोन दाहड़े कोरे; तोत्यार होये निकळे, आरु हेंदरे निकोवनेन पोछोळ झोपलो बोंद कोर देनो।
दाहड़ीन वावी भेट
दाहड़ीन तु एक सालोन एक विनगुनाको गाडरान पिलाक योहोवान होमबली जुगु तीयार कोरजु, यो सोंदारे वेगोत तीयार कोरजु। सोंदारे वेगोत हेरे पुठी एक ओनबादा तीयार कोरनो, पुने दुय कीलो मेयदा मा भेसेकने जुगु ढाय लीटोर तेल योहोवा जुगु जोलोमोन ओननबादा दाहड़ीन नेमोन ओनसारे चोड़ावजु। ओस कोरीन दाहड़ीन सोंदारे गाडरान पीलो, ओनोन बादा आरु तेल दाहड़ीन होमबली मा चोड़ाया कोरजु।
डाहलान आरु जागान वाटु
परमेश्वर योहोवा ओसु कोवे: कोदाम डाहला काहनला पुर्याक काहिन आपे, ती चो हेरो वाटो होयीन हेरा पुर्यान पुर्याक वी जोड़े; वाटान नेमोन ओनसारे होयो हेंदरो वी आपसो धोन कोवाये। पुन कोदाम होयो आपसा वाटा मा गोथो आपसा काहानला कामकोरनीयाक काहिन आपे, ती छुट्टीन साल लोगुन ते चो हेरो बोनलो रोवे, पुन तेरे वाद डाहलाक पोछो आप देसे; आरु हेरा आपसा वाटान हेरा पुर्याक जोड़े। मानसोन ओसो काहनो वाटो डाहलो नी लेये, जो जुर कोरीन हेरी जागाक हापकी लेदो होय; आपसा पुर्यान होयो आपसात जागाम गोथो वाटो आपे; ओसो नी होये की मार मानसे आपसा आपसा वाटाम गोथो रीवन्या तीवन्या होय जाय।
मोंदिरोन रांदन्यो घोर
ओळी होयो मेसे झोपलान एक ओख्येन झोपला सी ली गोयो। होयो मेसे पुजारान बोखेवराम चुखला कोपरा भेनी ली गोयो। हांव होंया बेसके नांबे बुडेनले एक जागाक देख्यु। तोत्यार होये मारे सी कोयो, यु चु जागु छे जीनाम पुजारा मानसे गुनान बादा आरु पापनबादा न मासोक चुड़ेवसे आरु ओनबादाक चुड़ेवससे, ओसो नी होये की हेनुक खोयड़ेन आंगनाम ली जायीन आखा मानसे छिमीन पवित्र कोर देये।
तोत्यार होयो मेसे खोयड़ेन आंगना मा ली गोयो। होंया होयो मेसे आंगनान च्यारु खुनाम फिरायो आंगनान होरीक खुंनाम एक नानोस आंगनो बोनलो होतो। च्यारु खुंनाम नानला आंगना होता। होरीक एक नानला आंगा चाळीस हात नांबा आरु तीस हात चोवड़ा होता। च्यारु खुंनान मापती एक सारकी होती। धोड़े एनु नानला आंगनान च्यारु मेर इटड़ान एक भितड़ो होतो। होरीक भितड़ाम खानो चुड़ेवनेन जागो बोनलो होतो। तोत्यार होयो मारे सी कोयो, रांदनेन घोर, जां भोवोनोन चाखरीया मानसोन बादा काजे चुड़वने, चे येत छे।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.