Dhankavi Bible
योहेजकेल 45
देसोन जागा मा परमेश्वरोन वाटु
जोत्यार तुमु चीट्ठी नाखीन देसोन जागु वाटु, तोत्यार देसोम सी एक वाटु चुखलु जानीन योहोवा काजे चोड़ावजु; तेरी नांबाय पोच्चीस होजार हात नांबी आरु चोवड़ाय दोस होजार हातो रोवे, चो वाटो आपसा च्यारु मेरोन काकोड़ लोगुन चुखलो कोवाये। हेरेम सी चुखला जागा जुगु पांच सोव हात वासुन नांबी आरु पांच सोव वासुन चोवली च्यार खुट्यु जागु रोवे आरु हेरे च्यारु मेरोन पोचास पोचास हात चोवड़ु जागु छुटलु रोवे। हेना चुखला जागाम तुमु पोच्चीस होजार वासुन नांबी आरु दोस होजार वासुन चोवड़ु जागु मापजु, आरु हेरेमा चुखलो जागो बोनावजु, जो बेसको चुखलो कोवाये। जो पुजारो चुखला जागा चाखरी कोरे आरु योहोवान चाखरी कोरने धोड़े आवे, चो तेरेत जुगु रोवे; होंया हेंदरा घोरो जुगु जागु रोवे आरु चुखला जागा जुगु चुखलु कोवाये। ओळी पोच्चीस होजार हात नांबो आरु दोस होजार हात चोवड़ो हेनु लेवीयोन ओवलीयाद जुगु होयसे जे मोंदिरोन चाखरी कोरे। यु जागु वी लेवीन ओवलीयादोन, हेंदरे रोवनेन सोहोर जुगु होयनो जुवे।
तुमु सोहोरोन पांच होजार हात चोवड़ो आरु पोच्चीस होजार हात नांबो जागु आपसु। यो चुखला जागान साहारे होयसे। यो इसराएलोन आखा घोरलीया जुगु होयसे।
डाहला जुगु जागु
डाहलान आपसो वाटो चुखलो चोड़ावलो वाटो आरु सोहोरोन खास जागु दुयो ओख्ये मोतलोब दुयो उगेवने आरु बुडेवने भेनी दुयो वाटान ओगोळ रोवे; आरु हेरी नांबाय बुडेनले ओख्ये गोथो उगेवने लोगुन हेनु दुयु वाटा मा गोथो कुदा एकान तोसो रोवे। इसराएलोन देसोन डाहलान योत आपसो जागो रोवे। मार नेवाड़ला डाहलान मार मानसो पोर ओळी वेला कोरनेन टेम नी आवे; पुन इसराएलोन घोरानान हेरा गोत्रोन ओनसारे देस जोड़े।
डाहला जुगु कायदा
परमेश्वर योहोवा ओसु कोवे; हे इसराएलोन डाहला! होतरोत कोरु, रीसवायनो, आरु मानसोन चीजोक चुरु कोरनो, छुड़ु! नियाव कोरन्या बोनु आरु वारला काम कोरु। हामरा मानसोक आपसा घोरोम सी खोयड़े जाने जुगु जुर मा कोरु! परमेश्वर योहोवान यो बुल छे।
तुमरे जु वारली टाकड़ी, वारली कांगनी आरु वारलो टाहरो रोहे।
एपा आरु बत टुयोन एकुत मापती रोवे, दुयोम होमेरोन दोसवु वाटु सोमाये; दुयोन मापती होमेरोन हिसाबे रोवे। शेकेल वीस गेरान रोवे; आरु तुमरो माना वीस, पोच्चीस, एने पोंद्रे शेकेलोन रोवनो जुवे।
जोत्यार तुमु मोंदिर मा भेट चोड़ावसु तोत्यार हेरो तुल ओसो होयनो जुवे;
गोंहोंव होरीक एक सोव कीला सी पुना दुय कीलान वाटु,
जोव गोंहोंव होरीक एक सोव कीलान वी पुना दुय कीलान वाटु।
तेलोन नोक्खी कोरलो वाटु यु होयसे
होरीक च्यार सोव ने पोचास लीटोर सी साढ़े च्यार सोव लीटोरोन वाटु।
इसराएलोन वारु वारु चारवायाम गोतो दुय दुय सोव गाडरा-बुकड़ाम गोथा एक गाडरो निते बुकड़ो आपजु। यी आखी चीजे ओननबादा, होमबली, आरु मेलबादा जुगु आपजु जेरेसी हेन्दरे जुगु पोसतावु कोरे, परमेश्वर योहोवान योत् बुल छे।
इसराएलोन डाहला जुगु देसोन आखा मानसे यी भेट आपे। तिहवारोन नोवला चांदोन दाहड़े, आरामोन दाहड़े आरु इसराएलोन घोरानान खास टेमोम होमबली, ओननबादा आरु पेयबादा आपनो डाहलान काम रोवे। इसराएलोन घोराना जुगु पोसतावो कोरने होयो पापनबादा, ओननबादा, होमनबादा, आरु मेलबादा तीयार कोरे।
तीहवार
परमेश्वर योहोवा ओसु कोवे: पेहेले मोहनेन पेहले दाहड़े तु एक वीनगुनाको गाडरो लीन चुखला जागाक चुखो कोरजी। एनी पापनबादा न लुहुय मा गोथो पुजारो थुड़ोक लीन भोवोनोन वेदिन खांबा, आरु वेदिन कुड़चीन च्यारु खुना, आरु माहायतेला आंगनान झोपला खांबा पोर लागाड़जी। तु योत काम मोहनान सातवे दाहड़े तेना मानुस जुगु कोरीस जु गोलती सी पाप कोर देदो होय, एने ओनजानिया मा कोरलो होय। ओस कोरीन तुमु मोंदिर काजे चुखो कोरजु।
पेहले मोहनेन चोवदवे दाहड़े तुमरो फसहोन तीहवार वावनो। होयो सात दाहड़ा तीहवार रोवे आरु हेरेम वीगुर खोमीरोन रुटा खानो। तेने टेमे डाहला एक बुईल आपसा जुगु एने इसराएलोन मानसो जुगु भेंट कोरसे। बुईल पापनबादा जुगु होयसे। तीहवारोन सातवे दाहड़े होये योहोवा जुगु होमबली तीयार कोरे, एने दाहड़ीन सात दात विनगुनाका गाडराक आरु सात सात गाडरा आरु दाहड़ीन एक एक बुकड़ो पापनबादा जुगु तीयार कोरु। होरीक गाडरा आरु गाडरा पुठी दोस कीला ओन आरु होरीक दोस कीला पुठी साढ़े सात लीटोर तेल तीयार कोरजु।
सातवे मोहनेन पोंदरवे दाहड़े गोथा सातवे दाहड़े लोगुन, तीहवारोन दाहड़ाम होये पापनबादा, होमबली, ओननबादा, आरु तेल इनी रीतीन ओनसारे कोर्या कोरजु।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.