Dhankavi Bible
योहेजकेल 44
उगेनला झोपलान वापरुन
ओळी होयो मेसे चुखला जागान सी खोयड़े, उगेवनो फिरीन होता तेना झोपला पोर ली गोयो। चो बोंद होतो। तोत्यार योहोवा मारे सी कोयु, यु झोपलु बोंद रोवे आरु उगाड़नो नी; कुदु एना झोपला सी माहाय नी जानो जुवे; काहाकी इसराएलोन परमेश्वर योहोवा ऐरेसी होयीन माहाय आवलु छे; ओतरान कोरीन यो बोंद रोवे। मानसोन डाहला एना जाग पोर बोठसे जोत्यार होये मेलबादा योहोवा पुठी खासे। चो झोपला पुठी भोरान्या झोपला सी भोराया कोरसे एने तेनेत वाट सी खोयड़े जासे।
मोंदिर मा भोरायनेन नेम
तोत्यार होयो मानुस मेसे बोखेवरे भेनीन झोपला सी मोंदिरोन ओगोळ लायो। हांव निंगा कोर्यो आरु योहोवान मोहिमा काजे योहोवान मोंदिर मा भोरायतेला देख्या। हांव आपसा मुनकाक धोरती पोर टेकाड़िन वांद्यो। योहोवा मारेसी कोयो, हे मानसोन ओवलीयाद, धियान दिन आपसा डुळा सी देख, आरु जो काहिन हांव तारे सी आपसा भोवनोन आखा कायदा आरु नेमोन वाराम कोवो, चो आखो आपसा कानटा सी सोमोळ; आरु भोवोनोन भोरायने आरु चुखला जागान आखा निकोळने पोर धियान कोर। आरु हेनु इसराएलोन वीरोदियान ओवलीयाद सी, आरु इसराएलोन घोराना सी कोव, परमेश्वर योहोवा ओसु कोवे: हे इसराएलोन घोराना, आपसा आखा घाड़ायीन कामो सी छेटु होय जा। जोत्यार तुमु मारो खानो मोतलोब चोरबी आरु लुहुय चोड़ावु, तोत्यार तुमु पारका मानसोन जो मोन आरु डील दुयो सी वीगुर फातोरकाती वाळा होता, मार चुखला जागाम आवने देदला की होये मार भोवोन काजे वीटोळ कोरे; आरु होये मार वायदा काजे तुड़ देदा जेरेसी तुमरा आखा घाड़ायीन काम जादा होय गोया। तुमु मारी चुखली चीजोन गुळावी नी कोर्या, पुन तुमु आपसा मोनो सी दिसरा मानसोक मार चुखला जागाम मारी चीजोक गुळावी कोरनेवाळा कोवाड़्या।
कोरीन परमेश्वर योहोवा ओसु कोवे: इसराएलीयोन इचमा जोतरा दिसरा मानसे छे, जे मोन आरु डील सी वीगुर फातोरकाती वाळा छे, हेनुम गोथा कुदु मार चुखला जागाम नी आवनो जुवे।
लेवीय पुजारान जागा सी आंगे कोर देनो
पुन लेवीय मानसे जे तेने टेमे मारे सी छेटा होय गोयला, जोत्यार इसराएली मानसे मेसेक छुड़ीन आपसी मुरतीया पोछोळ भोटकी गोयला, होये आपसा पापन भार हुचलसे। पुन होये मार चुखला जागान चाखरीया होयीन भोवोनोन झोपलान राखवाळी कोरनीया आरु भोवोनोन चाखरीया रोवे; होये होमबली आरु मेलबादान ढुर मानसो जुगु मार्या कोरे, आरु हेंदरी चाखरी कोरने कोरीन हेंदरे ओगोळ उबा होया कोरे। काहाकी इसराएलोन घोराना चाखरी होये हेंदरी मुरतीया ओगोळ कोरता होता, आरु हेंदरे ठुकोर खाने आरु पापम फोसनेन कारण होय गोयला होता; ओस कोरीन हांव हेंदरा वाराम वायदु कोरलु छे की होये ओधोरमोन भार हुचले, परमेश्वर योहोवान यो बुल छे। होये मारे धोड़े नी आवे, आरु नी मारे जुगु पुजारान काम कोरे; आरु नी मारी काहनली चुखली चीजोक, एने काहानली बेसकी चुखली चीजोक छिमनो जुवे; होये आपसी लाजोन आरु जो घाड़ायीन काम होये कोरला, हेरो वी भार हुचले। ती वी हांव हेनुक भोवोन मा वाळी चीजोन राखवाळ्यो मेकीस; हेरेम चाखरीन जोतरो काम होय, आरु जो काहिन हेरेम कोरनो होय, हेरे जुगु कोरनेवाळात रोवे।
पुजारा
आखा पुजारा लेवी घोरानान टुळाम गोथा छे। पुन जोत्यार इसराएलोन मानसे मारे वीरुद् मारेसी छेटा गोया तोत्यार आगला सादोकोन घोरानो पुजारा मार चुखला जागान राखवाळी कोर्या। आगला सादोकोन ओवलीयाद मेसे भेट चोड़ाया। होये मारे ओगोळ उबा होयसे आरु आपसो बादा चोड़ाया जोवनारोन चोरबी आरु लुहुय मेसे भेंट कोरसे। परमेश्वर योहोवान यो बुल छे। होये मार चुखला जागाम भोरायसे। होये मारी मेजोन धोड़े मारी चाखरी कोरने आवसे। होये हेनु चीजोन राखवाळी कोरसे जेनुक हांव हेनुक आप्यु। जोत्यार होये माहायतेला आंगनान झोपला सी होयीन जाया कोरे, तोत्यार सोनोन छिंदरा पेहरीन जाय, आरु जोत्यार होये माहातेला आंगनाम एने हेरे माहाय चाखरी कोरे, तोत्यार गाडरान झोटान छिंदरा नी पेहरे। होये मुनका पोर सोनोन घाटाळी टुपी पेहरे आरु कोड़्याम सोनोन जांघिया बांदे; होये ओसो काहिन नी पेहेरसे जेरेसी पेसोव आवे। जोत्यार होये खोयड़ेन आंगनाम मानसोन चा निकळे, तोत्यार जे छिंदरा पेहेरला होये चाखरी कोरता होता, हेनुक निकाळीन आरु चुखला कोपरा मा मेकीन दिसरा छिंदरा पेहरे, जेरेसी मानसे हेंदरा छिंदरान लारे चुखला नी कोवाये।
नी ते होये मुनको बुड़ावे, आरु नी झोटा नांबा होयने देये; होये आगला आपसा झोटा काटाड़े। माहायतेला आंगनाम जानेन टेमे कुदु पुजारो मोंद नी पीये। होये रोंडायली आरु छुटली बायोर सी इयाव नी कोरे; आगला इसराएलोन घोराना ओवलीयाद मा गोथी छोल्ली एने ओसी रोंडायली सी इयाव कोरे जी कुदा पुजारान धेन्यारी होय।
होये मार मानसोक चुखो ने वीटोळोन फोरोक सिकाड़्या कोरे, आरु चुखलो आरु वीटोळोन फाटकु कोया कोरे। जोत्यार काहीन झोगड़ान नियाव कोरने वी होयेत बोसे, आरु मार नेमोन ओनसारे नियाव कोरे। मार आखा टेमोन तिहवारोन वाराम वी होये मारी वेवोस्थान आरु कायदान पाळनी कोरे, आरु मार आरामोन दाहड़ाक चुखलो माने।
होये कुदा मानसोन धोड़ो धोड़े नी जाय की वीटोळ होय जाय; आगला आसी- बासा, पुर्या-पोरायटा, भाईस आरु ओसी बोहनीसोन धोड़ोन लारे जेरो इयाव नी होयलो होय होये आपसाक वीटोळ कोर सोकतेला। जोत्यार होये वीटोळ होय जाय, तोत्यार हेंदरे जुगु सात दाहड़ा गिननो आरु तोत्यार होये चुखला कोवाये, आरु जेने दाहड़े होये चुखला जागाम, माहातेला आंगनाम चाखरी कोरने ओळी भोराया कोरे, तेने दाहड़े आपसा जुगु पापनबादा चोड़ावे, परमेश्वर योहोवान यो बुल छे।
हेंदरो एक आपसोत वाटो होयसे, हेंदरो वाटो हांव छे; तुमु हेनुक इसराएलोन इचमा काहीन ओसी जागु नी आपजु जु हेंदरुत होय; हेंदरु आपसु वाटु हांव छे। होये ओननबादा, पापनबादा आरु गुनानबादा खाया कोरे; आरु इसराएल मा जो चीज चोड़ावे, चो हेनुक जोड़्या कोरे। आखे भातीन आखासी पेहेली मेर आरु आखे भातीन चुटली चीज जो तुमु चुटीन चोड़ावु, पुजाराक जोड़्या ओरे; आरु नोवलो ओनोन पेहलो कुसेनलु पिठु वी पुजाराक आपजु, जेरेसि तुमु मानसोन घोरोम बोरकोत रोवे। जो काहिन आपसाम मोरे एने फाड़े, चाहाय चील्लो एने ढुर हेरो मांस पुजारो नी खाय।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.