योहेजकेल 43

भोवोन मा परमेश्वरोन रीस

1चो मानुस मेसे झोपलान चा ली गोयो, जु झोपलु उगेवनु फेरीन उगेड़तेलु। 2तोत्यार इसराएलोन परमेश्वरोन महिमा उगेनले ओख्ये गोथी आवी; आरु हेरी ओवाज बेसका पानीन तोसो सोसोनती आवी; आरु हेरी मोहिमा सी धोरती चोमकी पोड़ी। 3हेमी हांव एक दोरसोन देख्यु। यो तेना दोरसोन जोसो होतो जो हांव तेन टेमे देख्यु होतु जोत्यार परमेश्वरोन सेक सोहोरोन नास कोरने आवलो होतो। यो दोरसोन कोबार नोदीन कातरे देखला दोरसोन सारको होतो यो दोरसोन देखीन हांव वीनता आरु भोक्ती सी मुयोन भुरसे हीट पोड़्‌यु। 4योहोवान मोहिमा, मोंदिरोन तेने झोपले गोथी आवी जु उगेवनु फिरीन उगेड़े। 5तोत्यार जीव आत्मा मेसेक उठाड़ीन माहातेला आंगनाम पुगाड़ी; आरु योहोवान महिमा भोवोन मा भोराय गोयली।

6तोत्यार हांव एक जोनान बुल सोमयु, जो भोवोन मा गोथो मारेसी कोय रोयो होतो, आरु होयो मानुस मारें चा उबो होतो। 7चो मारे सी कोयो, हे मानसोन ओवलीयाद, योहोवान यो बुल छे: यी ते मारी राजगादीन जागु आरु मारो पाय मेकनेन जागु छे, जां हांव इसराएलोन इचमा जोलोम रोवीस। नी ते इसराएलोन घोरानाम, आरु नी हेंदरा राजा आपसा वेववीचार सी, एने आपसा उचा जागाम आपसा राजान धोड़ोन लारे मारे चुखलो नाव ओळी वीटोळ कोवाड़यसे। 8होये आपसी डेवढ़ी मारी डेवढ़ी धोड़े, आरु आपसा झोपलान खांबा मार झोपलान खांबा धोड़े बोनावता होता, आरु मार आरु हेंदरे इचमा भीतड़ो ओतरोत होतो, आरु होये आपसा भुंनला कामो सी मार चुखला नावोक वीटोळ कोवाड़ला; कोरीन हांव रीस कोरीन हेनुक नास कोरलु। 9हेमी होये आपसा वेववीचार आरु आपसा राजान धोड़ मारे ओगोळ सी छेटा कोर दे, तोत्यार हांव हेंदरे इचमा जोलोम रोवीस।

10हे मानसोन ओवलीयाद, तु इसराएलोन घोरानान एना भोवोनोन नमुनो देखाड़ की होये आपसा पापन कामो सी लाजे पोड़ीन हेना नमुनाक मापे। 11कोदाम होये आपसा आखा कामो सी लाजे पोड़े, ती हेनुक एना भोवोनोन रुपोम आरु स्वोरुप, आरु ऐरे खोयड़े माहाय आवने जानेन वाट, आरु ऐरा आखो रुपोम आरु कायदा आरु नेम देखाड़जी, आरु हेंदरे ओगोळ लीखीन मेकजी; जेरेसी होये एरो आखो रुपोम आरु एरा आखा कायदा फोम कोरीन हेरेत ओनसारे कोरे। 12भोवोनोन नेम ये छे की बोयड़ान चोटीन च्यारु मेरोन आखो वाटो बेसको चुखलो छे। देख, भोवोनोन नेम योत छे।

वेदीन मापती

13वेदीन मापती ओसी रोवसे: हातोन मापतीन ओनसारे वेदी ओसी रोवसे हात भोरीन उची आरु हात भोरीन चोवड़ी रोवसे, आदो मिटर। हेरे च्यारु मेरोन कातोर पोच्चीस सेंटीमिटोरोन रोवसे। 14धोरतीन नेहड़े कातरे लोगुन, कुड़चीन मापती दुय छे। यी एक हात चोवड़ी होती। नानली कातोर सी मोटली कातोर लोगुन ऐरी मापती च्यार हात चोवड़ी होती। 15वेदी पोर आगठान जागु च्यार हात उचो होतो। वेदीन च्यारु खुंना सिंगड़ान तोसा होता। 16वेदी पोर आगठान जागु बारे हात नांबु आरु बारे हात चोवड़ु होतु। 17नेहड़ली कुड़ची चोवदे हात नांबी आरु चोवदेहात चोवड़ी होय, आरु हेरा च्यारु मेरोन पाटड़ी आदा हातोन रोवे, आरु हेरो वीजुत च्यारु मेरोन हात भोरीन रोवे। हेरा पांछ्या हेरा उगेनले ओख्ये रोवे।

वेदिन चोड़ावो

18तोत्यार होयो मानुस मारेसी कोयो, हे मानसोन ओवलीयाद, परमेश्वर योहोवा ओसु कोवे, वेदि जुगु ये नेम छे। जेने दाहड़े होमबली चोड़ावे आरु ऐरे पोर लुहुय छाटनो पोड़से:

19लेवीय पुजारा मानसे, जे सादोकोन ओवलीयाद छे, आरु मारी चाखरी कोरनेम मारे धोड़े रोवे, हेनुक तु पापनबादा जुगु एक गाडरो आपजी, परमेश्वर योहोवान यो बयल्या छे। 20तोत्यार तु हेरा लुहुय मा गोथो थुड़ोक लीन वेदीन च्यारु सिंगड़ा आरु कुड़चीन च्यारु खुना आरु च्यारु पाटड़ी पोर लागाड़जी; ओस कोरीन हेरे जुगु पछतावो कोरनेन लारे हेनाक चुखो कोरजी। 21तोत्यार पापनबादा न गाडराक लीन, भोवोनोन चुखला जागान खोयड़े वाळा जागाम धोपाड़ देजी। 22दिसरे दाहड़े एक विनगुनाकु बुकड़ो पापनबादा कोरीन चोड़ावजी; आरु जोसो गाडरान लारे वेदी चुखी कोरे, तोसोत होयो एना बुकड़ान लारे वी चुखो होय जासे। 23जोत्यार तु हेनाक चुखो कोर देये, तोत्यार एक विनगुनाको गाडरो आरु एक वीनगुनाको मेढ़ो चोड़ावजी। 24तु हेनुक योहोवा ओगोळ ली आवजी, आरु पुजारा मानसे हेनु पोर नोन नाखीन हेनुक योहोवान होमबली कोरन चोड़ावे। 25सात दाहड़ा लोगुन तु दाहड़ीन पापनबादा जुगु एक बुकड़ो तीयार कोरजी, आरु विनगुनाको गाडरो आरु वीनगुनाका गाडराम गोथो मेढ़ो वी तीयार कोरजी। 26सात दाहड़ा लोगुन पुजारा मानसे वेदी जुगु पछतावो कोरीन हेनाक चुखो कोरता रोवे; ऐने रीते हेरो रीत होयसे। 27जोत्यार होये दाहड़ा पुरा होय जाय, तोत्यार आठवे दाहड़ा वाद सी पुजारा मानसे तुमरा होमबली आरु मेलबादा वेदी पोर चोड़ाय कोरे; तोत्यार हांव तुमरे सी खुश होयिस, परमेश्वर योहोवान यो बुल छे।