Dhankavi Bible
योहेजकेल 47
मोंदिर सी उहवतेलो झोर
ओळतेन होयो मेसे भोवोनन झोपला पोर मेक गोयो; आरु भोवोनोन डेवढ़ीन नेचो सी एक झोर निकळीन उगेवने भेनी उहुव रोयो होतो। भोवोनोन झोपला ते उगेवना फिरीन होता, आरु झोर भोवोनोन जेवड़्ये भेनी आरु वेदीन दोखेवरे भेनी नेचो सी निकळतो होतो। तोत्यार होयो मेसेक बोखेवरेन झोपला सी होयीन खोयड़े ली गोयो, आरु खोयड़े खोयड़े फिरावीन खोयड़े मोतलोब उगेवनेन झोपलान चा पुगाड़ देदो, आरु दोखेवरे भेनीन पानी उहुवतो होतो। जोत्यार होयो मानुस हातोम मापनेन दुर लीन उगेवनो निकळ्यो, तोत्यार होयो भोवोन सी लीन, होजार हात लोगुन हेना झोरोक माप्यो, आरु मेसेक पानीम गोथु चालाड़्यो, आरु पानी मान्डाम लोगुन होतो। होयो ओळी होजार हात मापीन मेसे पानीम गोथो चालाड़्यो, आरु पानी मांडाम लोगु होतो, ओळी होजार हात मापीन मेसे पानी गोथो चालाड़्यो, आरु पानी कोड़्याम लोगुन होतो। तोत्यार ओळी होयो एक होजार हात माप्यो, आरु ओसी नोंदी होय गोय तेनी नोंदीन नी छेकायो, काहाकी पानी जादा होयीन झेपे ओसो होतो; मोतलोब ओसी नोंदी होती जेनीक छेकीन कुदु नी जाय सोकतेलो। तोत्यार होयो मारे सी पुछ्यो, हे मानसोन ओवलीयाद, काय तु यो देखलु छे?
तोत्यार होयो मेसेक नोंदीन कातरे कातेर पोछो पुगाड़ देदो। पोछु आवीन हांव काय देख्यो, की नोंदीन दुयो कातरे बेसका झाड़े छे। तोत्यार होयो मारे सी कोयो, यो झोर उगेनला देसो भेनी उहुव रोयो, आरु ओराबा मा उतरीन दोरीया भेनी उहुवसे; आरु यो भोवोन सी निकेवलो सुदो दोरीया भेसकाय जासे आरु हेरो पानी गुळो होय जासे। जां जां यी नोंदी उहुवे, चां चां आखे भातीन बेसका आंडा मेकन्या जीवे जीवसे आरु माछा वी बेसका होय जासे; काहाकी एना झोरोन पानी होंया पुगलो छे, आरु दोरीयान पानी गुळो होय जासे; आरु जां कांखेर यी नोंदी पुगसे चां आखा जीवे जीवसे। दोरीयान कातोर पर माछल्या उबला रोवसे, आरु एनगदी सी लीन ऐनेग्लेम लोगुन चां जाळ नाखसे, आरु हेनुक मोटला दोरीयान तोसी ति भाँति भाँतिन नीगिनाये ओतरा माछा जोड़से। पुन दोरीयान धोड़े कादेवड़ु आरु खाडा छे, हेंदरो पानी गुळो नी होयसे; चो खारलोत रोवसे। नोंदीन दुयो कातरो पोर भाती भातीन खाने जोसो फोळवाळा झाड़े उगसे, जेंदरा पांटा नी चीमाये आरु हेंदरो फोळनो वी कोदी बोंद नी होयसे, काहाकी नोंदीन पानी चुखला जागा सी निकेवलो छे। हेरेम मोहना मोहना नोवला नोवला फोव लागसे। हेंदरा फोळे ते खानेन, आरु पांटा इलाजोन कामे आवसे।
देसोन काकोड़
परमेश्वर योहोवा ओसु कोवे: जीना काकोड़ोन धोड़े तुमुक इसराएल देस आपसा बारे गोत्रोन ओनसारे वाटनो पोड़से, चो यो छे: युसुफ काजे दुय वाटा जोड़े तोसे। तीनाक तुमु एक दीसरा जोसा आपसो वाटो जोड़से, काहाकी हांव वायदो कोरलो हिनाक तुमरा बासोक आपीस, कोरीन यो देस तुमरो वाटो कोवायसे।
देसोन काकोड़ यी रोवे: मोतलोब बोखेवरे भेनीन काकोड़ मोटलो दोरीये सी लागाड़िन हेतलोनोन धोड़े सोदाद जागान घाटी लोगुन पुगे, आरु हेरी काकोड़ोन धोड़े होमात बेरोता, आरु सिबरेम जो दोमिस्क आरु होमात जागान काकोड़ोन इचमा छे, आरु होसर्हत्तीकोन लोगुन, जो होरानोन काकोड़ पोर छे। यी काकोड़ दोरीया गोथो दोमिस्क जागान काकोड़ धोड़े होसरेनोन लोगु पुगे, आरु हेरा बोखेवरे भेनी होमात होये। बोखेवरेन काकोड़ यीत् होये।
उगेनली काकोड़ जेरा एक ओख्ये होरान दोमिस्क; आरु यरदनन भेनी गिलाद आरु इसराएलोन देस होये; बोखेवरे काकोड़ सी लीन उगेनला दोरीया लोगुन हेनाक मापजु। उगेनली काकोड़ ते यीत् होये।
दोखेवरे काकोड़ तामार सी लीन कादेसोन मोरीबोत नावोन झोर लोगुन मोतलोब मिसर देसोन खुदरे लोगुन, आरु मोटला दोरीया लोगुन पुगे। दोखेवरेन काकोड़े यीत् होये। बुडेवनेन काकोड़ दोखेवरेन काकोड़ सी लीन होमातोन घाटीन ओगोळ लोगुन मोटला दोरीयो होय। बुडेनली काकोड़ यीत् होये।
ओस कोरीन देसोन इसराएलन गोत्रोन ओनसारे आंबासांबा वाट लेजु। एनुक आंबासांबा आरु हेनु पारका देशो पुठी वाट लेजु, जो तुमरे इचमा रोवीन पुर्या पोयदा होया। होये तुमरी निगा मा देसोन इसराएली जोसा कोवाये, आरु तुमरा गोत्रोन इचमा आपसा आपसा वाटा जोड़े। जे पारका जीना गोत्रोन देसोन रोवता होय, तीनाक चोत वाटो आपजु, परमेश्वर योहोवान यो बुल छे।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.