Skip to content
BibleKenya

Dhankavi Bible

योहेजकेल 4

योरुसालेमोन घेराबोन्दी देखाड़नो

हे मनख्यान ओवलीयाद, तु एक इटड़ो चुट ले, आरु हेको आपसा अगळ मेक। ऐरे वाद, तु उना पोर योरुसालेम सोहोर क एक चीत्र खींच ले; तव हेको च्यारु मेर सी घेरवीन हेका वीरुद्ध कीलो बोनाव आरु हेका अगळ दमदमा बोंदा: आरु छावनी नाख, आरु हेका च्यारु मेर लोड़ायन तीयारी लागाड़। तव तु लुहड़ान तोवी लीन हेको लुहड़ा क भितड़ो मानीन आपसा आरु हेका सोहोर क वीच उबो कोर, तव आपसा मुय हेका अगळ कोरीन हेकी घेराबोन्दी कोर, एने रीते सी तु हेको घेरवीन राखजी। यो इसराएल क घराना क लीय सोहलानी कोवायसे।

ओळी तु डाखरे कोड़ दीन इसराएल क घराना क ओधोरोम आपसा उपोर मेक, काहकी जोतरा दाहड़ा तु उना कोड़ लुटलु रोहिस, तोतरा दाहड़ा लगुन उना लोगहन क ओधोरोम क भार वेठतो रोहीस। हांव न हेनका ओधोरोम क साल क सारका तारे लीय दाहड़ा टाकला छे, एने तीन सोव नब्बे दाहड़ा; होतरा दाहड़ा लगुन तु इसराएल क घोराना क ओधोरोम क भार वेठतो रोव। जव ओतरा दाहड़ा पुरा होय जाय, तव तु जेवड़ु कोड़ दीन योहुदा क घराना क ओधोरोम क भार वेठ लेजो; हांव हेनका लीय वी आरु तारे लीय एक सोव वरीस क बोदले एक दाहड़ु एने चाळीस दाहड़ा टाकला छे।

तु योरुसालेम क घेरवने क लीय हात उघाड़ीन आपसो मुय ओथू कोरीन हेनका वीरुद्ध भोगवानो वोगे गोथी वात कोरजी। देख, हांव तुसे दुयड़ा सी बाँदिस, आरु जव लगुन हेको घेरवनेन दाहड़ा पुरा नी होये तव तक तु कोड़ नि ली सोकीस।

तु गँहव, जोव, सेम, मसुर, बाजरा, आरु कठिया गँहव, लीन एक टाहरा मा मेकीन उनासी रुटा बनवाड़्या कोरजो। जोतरा दाहड़ा तु कोड़ पोर लुटलो रोहिस, तोतरा दाहड़ा तीन सोव नब्बे दाहड़ा लगुन हेको खाया कोरजो। जो भोजन तु खासे, हेको तुल तुलीन खाजी, एने दाहड़ीन एक पाव भोरीन खाया, आरु हेको टेम टेम पोर खानो। तु पानी वी मापीन पीजी; एने एक लीटर। तु पानी वी टाकला टेमो मा पीजी। जसो जोव क रुटा खाया जाये छे तसोज तु आपसा रुटा खाने। तु हेको मानसोन हागारोन कण्डा पोर लोगहन क डुला क अगळ सेकजो।

योहोवा न कव्यो, ओस कोरीन इसराएल उना जातीयो क वीच आपसा आपसा रुटा दुर होयला सी खाया कोरसे, जाँ हांव हेको जोबरोन पुगाड़ीस।

तव हांव न कव्यो, हाय, योहोवा परमेश्वर देख, मारो मोन कोदी वीटोळ नी हुयो, आरु नि ते मारा बचपन सी लीन हेमी लगुन आपसी मोत सी मोरीयाम एने फाड़ला ढुरोन मास खादो, आरु नी कुदा भातीन मांस मारा मुयोम कोदी गोयो छे। पोरबु मारे सी कव्यो, वारु तारी वीनता मेसे स्वीकार छे। तु मानसोन हागारोन कण्डान जागा पोर गाय क गुबर क कण्डा पोर आपसा रुटा सेकनो।

पोरबु न मारे सी यो वी कोव्यो, हे मनख्यान ओवलीयाद, देख, हांव योरुसालेम मा खानो पानीन आसरा काजे छेटो कोरीस; एकालीय चाँ क लोगहन तुल तुलीन आरु फिकुर कोर कोरीन रुटा खाया कोरसे; आरु माप मापीन आरु दुखी होईन पानी पिया कोरसे। आरु एना सी हेनका रुटा आरु पानीन घटि होयसे; आरु त्या आखा की आखा घाबरायसे, आरु आपसा ओधोरोम मा फोसलो हुया सुख जासे।

Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.