योहेजकेल 3

1त्यो मारेसी कव्यो, “हे मनख्यान ओवलीयाद, जो तुखे जड़्यो छे हेको खाय ले; एने एनी कीपात क खा, ती जाईन इसराएल क घराना सी वात कोर।”

2हांव आपसो मुय उघाड़्यो, आरु त्यो मेसे खाने क लीय कीपात आप्यो। 3त्यो मारे सी कव्यो, “हे मनख्यान ओवलीयाद, यी कीपात जो हांव आपो छे ओको जीरवी ले, आरु आपसो पेट भोर ले।” एने हांव न ओको खाय लेदो; आरु मारा मुय मा त्यो भावर सारको गुळो लाग्यो।

4त्यो मारे सी ओळी कव्यो, “हे मनख्यान ओवलीयाद, तु इसराएल क घराना क पास जाईन हेको मारा बुल समळ। 5काहकी तु काहनी कोसली बुली एने काठी बुलीवाळी जाती क पास नी मुकेलतु, पुन इसराएल क घराना क पास मुकल्यो जातो छे। 6कोसली बुली एने काठी बुलीवाळी बेसकीत जाती क पास जो तारी वात समझ नी सकें, तु नी मुकलायतो। वीनभुरसे कोदी हांव तुखे ओसा क पास मुकलतो ती त्या ताती समळता। 7पुन इसराएल क घरानावाळा तारी समळने सी मोना कोरसे; त्या मारी वी समळने सी मोना कोरता छे; काहकी इसराएल क आखा घराना वीनलाज्या आरु वातड़ा मोनोन छे। 8देख, हांव तारा मुख क हेनका मुख अगळ, आरु तारा माथा क हेनान माथा क अगळ, वातड़ो मोन कोर देयो। 9हांव तारा माथा क हीरा क सारको वातड़ो कोर देयो जो चकमक दोगड़ा सी वी वातड़ो होये; एकालीय तु हेना सी नी बीहजी, आरु नी हेनका मुय देखीन तारो मोन काचो होये; काहकी त्या लोड़ायन घोराना छे।”

10ओळी त्यो मारे सी कव्यो, हे मनख्यान ओवळीयाद, जोतरा बुले हांव तारे सी कोहो, त्या आखा काळजा मा राख आरु कानटा सी समळ। 11“आरु उना केदड़ा क पास जाईन, जे तारा मुलकोन जातीन भाईस छे, उना सी वाते कोरजी आरु कोहजी, पोरबु योहोवा ओसो कोवे छे; चाहाय त्या समळे, एने नी समळे।”

12तव परमेश्वरन जीव न मेसे उठाड़्यो, आरु हांव आपसा पछळ मोटी घड़घड़ाहट क भेळ एक बुल समळ्यो हुयो कयो परमेश्वरन मोहिमा बोरकोत वावी छे। 13आरु हेनका भेळुत उना जीवधारीयो क पाखड़ान बुल, जो एक दिसरा सी लागला हुता, आरु उना भेळ क चाकटा क बुल आरु एक मोटी घड़घड़ाहट समळाय पोड़ी। 14तव जीव मेसे उठाड़ीन ली गोय, आरु हांव काठा दुख सी भोरायलो होतो आरु मोनम धपतो जाईन चाली गुयो; आरु योहोवान ताकोत मारे मा समायली हुती; 15आरु हांव उना केदड़ा क पास आया जे कोबार नोंदी क धड़े पोर तेलाबीब सोहरो मा रोहता हुता। आरु चाँ हांव सात दाहड़ा लगुन हेनका वीच दुखी होयीन बोठलु रोहु।

राखवाळीयान रुप मा योहेजकेल न नेवाड़ु

16सात दाहड़ा वीत्या ने ओळतेन पोरबु योहोवा क यो बुल मारे पास पुग्यो, 17हे मनख्या क ओवलीयाद, हांव न तुख इसराएल क घराना क लीय फेरा देन्याक नेवाड़ कोरलो छे। जव जव तु मारा मुय क बुल समळसे, तव तव हेनको मारा भेनी सी चेतावनी आपजी। 18कदाम हांव पापी सी कोहीस, तु छाचीन मोरीस, आरु कदाम यु हेनको नी चेतावनी नी आपीस, आरु नी हेनको आपसा भुंडी वाट छुड़ने क लीय चोकचोयु कोरीस की त्या चेतावनी समळीन आपसो जीव वाचाड़ लेये, ती, हे मनख्या, समळ, त्यो पापी आपसा भुडा कामो क लीदे ते मोरसेत, पुन हांव हेकी मोत क गुनु तारे सी लेखो लीस। 19पुन कदाम तु पापीक चेतावनी आपे, आरु त्यो आपसा भुंडा काम आरु भुंडी वाट सी नी फीरे, ती त्यो ते आपसा भुंडा काम मा फोसलो होईन मोर जासे; पुन तु आपसा जीव क वाचाड़ीस।

20ओवी जव धोरमी लोगहन धोरोम सी फिरीन कुटिल काम कोरने लागे, आरु हांव हेनका अगळ ठुकर राखो, ती त्यो मोर जासे, काहकी तुन जो हेको नी चेतावनी आप्यो, एकालीय त्यो आपसा पाप मा फोसलो होईन मोरसे; आरु जे धोरोम क काम त्यो कोरलो होय, हेनो फोम नी राख्यो जासे, पुन हेनका लुहुय क लेखो हांव तारेसी लीस। 21पुन कदाम तु धोरमी क असो कोवीन चेतावनी आपे, की त्यो पाप नी कोरे, आरु त्यो पाप सी वाच जाय, ती त्यो चेतावनी क मानने क कारण छाचीन जीवतलो रोहसे, आरु तु आपसो जीव क वाचाड़ीस।

योहेजकेल बुलने मा कोमजुर

22पोरबु योहोवा क ताकोत मारे पोर होयी, आरु त्यो मारे सी कव्यो, “उठीन खयड़ा मा जा; आरु चां हांव तारे सी वात कोरीस।”

23तव हांव उठीन खयड़ा मा गुयो, आरु चाँ काय देख्यो, की योहोवा क सेक जसो मेसे कोबार नदीन धोड़े, तसोज याँ वी देखा पोड़तो छे, आरु हांव मुयोन भुरसे हिट पोड़यो। 24तव जीव न मारेम सोमायीन मेसे पायोन भुरसे उबो कोर देदो; ओळी त्यो मारे सी कोहने लाग्यो, जा आपसा घर क धड़े झपला बोंद कोरीन बठलो रोव। 25हे मनख्यान ओवलीयाद, देख, त्या लोगहन तुखे दुयड़ा सी हापकीन बाँदिन राखसे, आरु तु निकळीन हेनका वीच नी जावाये। 26हांव तारी जीप तारा तालु सी लागाड़ीस; जेरेसी तु हुगु रोहिन हेनको लोड़नेवाळा नी होय, काहकी त्या लोड़ायन्या घोरानान छे। 27पुन जव जव हांव तारे सी वात कोरो, तब तब तारा मुय क उघाड़िस, आरु तु उना सी असो कोहजी, पोरबु योहोवा असो कोवे छे, तु समळतो छे त्यो समळी ले आरु नी जो नी समळतो त्यो नी समळे, त्या ते लोड़ायन घराना छेत।