योहेजकेल 2

परमेश्वर नी बुलावनो

1त्यो मारती कव्यो, “हे मनख्यान ओवलीयाद, आपसा पायोन भुरसे उबो होय, आरु हांव तारसी वात कोरीस।” 2जसोज त्यो मारेसी यो कव्यो, तसोज जीव न मारेम सोमायीन मारा पायोन भुरसे उबो कोर देदो; आरु ज मारे सी वात कोरतो हुतो हांव ओकी समळ्यो। 3त्यो मारे सी कव्यो, “हे मनख्यान ओवलीयाद, हांव तुखे इसराएलीयो क पास एने लोड़ाय करनेवावा मुलुकोन क पास मुकलो, जे मारे वीरुद लोड़ाय कोरला छे; हेनका डाहडा आरु त्या वी आज क दाहड़े लगुन मारा वीरुद्ध गुनु कोरता चाल्या छे।” 4एनी पीढ़ी क लोगहन जेनका पास हांव तुखे मुकलो, त्या वीनलाज्या आरु एक होट्या छे; पोरबु योहोवा ओसु कोवे। 5आरु तु उना सी कोहजो, पोरबु योहोवा यो कोवे छे, एना सी त्या, जे लोड़ाय कोरनेवाळा घरानान छे, चाहाय त्या समळ्या नी समळ्या, ते वी त्या ओतरा जान लेसे की हामरा वीच एक कागळ्यो होयलो छे।

6ऐ मनख्यान ओवलीयाद, तु उना सी नी बीहजी; चाहाय तुके काटा, उंटकटारा आरु वीछा क वीच वी रोहनो पोड़े, ती वी हेनका बुल सी नी बीहनो; कोदाम त्या लोड़ायन्या घरल्यात होय, ती वी नी ते हेनका बुल सी बोहनो, आरु नी हेनका मुय देखीन तारो मोन काचो होय। 7एकालीय चाहेय त्या समळे एने नी समळे; ते वी तु मारा बुल उना सी कोहनो, त्या ते मोटला लोड़ाख्या छे।

8“पुन हे मनख्यान ओवलीयाद, जो हांव तारेसी कोहो, हेको तु समळी ले, उना लोड़ाख्यान घरानान जोसो तु वी लोड़ाख्या नी बोननो, जो हांव तुखे आपो, हेको मुय उघाड़ीन खाय ले।” 9तव हांव निंगा कोर्‌यो की आरु काय देख्यो, की मारे भेनी एक हात मारे भेनी छे आरु उना मा एक कीपात छे। 10हेको त्यो मारा अगळ उघाड़ीन खवळ्यो, आरु त्या दुयो ओखे लीखली हुती; आरु जे उनामा लीखलो हुतो, त्या कालापिली एने शोक आरु दुख सी भोरायला बुल हुता।