Dhankavi Bible
योहेजकेल 1
परमेश्वर क वाराम योहेजकेल क पेहलो दर्शन
ढेड़ वीस ने चोवथा मोहनान पाचवे दाहड़े, हांव बन्दियो क वीच कोबार नदीन धड़े हुतो, तव सोरोग उगड़ी गयो, आरु हांव न परमेश्वर क दोरसोन देख्यो। योहोयाकीन राजान गुलामीन पाचवे वोरीस न चोवथे मोहनेन पाचवे दाहड़ेन, कोसदियो क देस मा कोबार नोंदी क धड़े, योहोवा क बुल बुजी क पुर्या योहेजकेल पुजारान यां पुग्यो: आरु योहोवा क ताकोत उना पोर उजेन्ती हुयी।
जव हांव देखने लाग्यो, ती यो देख्यो की उत्तर भेनी आंजी उठी, आरु आगठा पुठी मोटी आँजी आवी रय, आरु उना मोटला वादळा क च्यारु मेर वीजाळो छे, जेरेसी आगठो रोह-रोह कोरीन वीजळी सारको चोमकी रोयो छे। तव् आगठा मा सी चार जीवधारीया सारका काहीन निकळ्या। हेनको रुप मानसो सारको हुतो, पुन उना मा सी होरीकोन चार चार मुय आरु चार चार पाखड़ा हुता। हेनका पाय सुदा हुता, आरु हेनका पायोन पाटल्या पाडल्यान खुर्या जोसा हुता; आरु त्या झलकायता जाईन पीतळ क जसा चमकता हुता। हेनका च्यारु मेर पाखड़ा क नेचा मानसो सारका हात हुता। हेनका चारुन मुय आरु पाखड़ा ओसा भातीन हुता: हेनका पाखड़ा एक दिसरा सी भेसकायला हुता; त्या आपसा आपसा अगळ सुदात चालता हुता, आरु वोवता नी हुता।
हेनका अगळ क मुयोन रुप मानसो सारको हुतो आरु हेनका च्यारो जेवड़्ये क मुय नाहरो सारको, डाख्र्यो क भेनी मुय बुईल सारको हुतो, आरु च्यारु क पछळ क मुय चील्ला सारको हुतो। हेनका मुय ओसाज हुता। हेनका मुय आरु पाखड़ा उपोर क भेनी ओलोग ओलोग हुता, होरीक जीवधारी क दुय दुय पाखड़ा हुता, जे एक दीसरा क पाखड़ा सी भेसकायला हुता, आरु दुय दुय पाखड़ा सी हेको डिल ढाकायलो हुतो। त्या सुदा आपसा आपसा अगळुत चालता हुता; जेंखेर जीव जानो चाहतो हुतो, त्या तेंखेरुत जाता हुता, आरु चालता टेमे ववता नी हुता।
जीवधारीया क रुप आगठा एने धपतली मशाल क सारको देखा पोड़तो हुतो, आरु त्यो आगठो जीवधारीयो क वीच एंखेर तींखेर चालतो फिरतो मोटो वीजाळो आपतो रोयो; आरु उना आगठा सी वीजळी निकळी हुती। जीवधारीयोन क चालनो फिरनो वीजळी सारको हुतो
जव हांव जीवधारीयो क देखतोत हुतो, ती देख्यो की धरती पोर हेनका पास च्यार मुयोन गिनायोन ओनसारे, एक एक चाकटा हुता। चाकटा क रुपो आरु घड़ाय ओसी हुती चे सोरोगोन सोनान मणी सारकी चोमोक रोया हुता। च्यारोन बोनावट एक जोसी हुती; बोनावट ओसी हुती, मानु एक चाकटा क धड़े दिसरो चाकटो होय। चालते टेमे त्या आपसा च्यारु मेर चाल सोकता हुता, आरु चालने मा वोवता नी हुता। उना च्यारु चाकटा क घेरवीन बेसका मोटा आरु बीहाड़े ओसा हुता, आरु हेनका घेरा मा च्यारु मेर डुळात डुळा भोरायला हुता। जोत्यार जीवधारीया चालता हुता, तव् चाकटा वी हेनका पुठी चालता हुता; आरु जव् जीवधारीया धोरती पोर सी उठतो हुता, तव चाकटा वी उठतो हुता। जेंखेर जीव जानो चाहेय, तेंखेरुत त्या जाता, आरु चाकटा जीवधारीयो क पुठी उठतो हुता; काहकी हेनको जीव चाकटा मा हुतो। जव त्या चालता हुता तव ये वी चालता हुता; आरु जव् जव् त्या उबा होयता हुता तव् ये वी उबा होयता हुता; आरु जव् त्या धोरती पोर सी उठतो हुता तव चाकटा वी हेनका पुठी उठतो हुता; काहकी जीवधारीयो क जीव चाकटा मा हुतो।
जीवधारीयो क मुनका उपोर वादळा मोंडळी सारको काहीन हुतो जो बोरोफ क सारको बीहाड़े ओसो चोमेकतो हुतो, आरु त्यो हेनका मुनका उपोर वेरवायलो हुतो। वादळामोंडळी क नेचो, हेनका पाखड़ा एक दिसरा भेनी सुदा खोरवायला हुता; आरु होरीक एक जीवधारी क दुय दुय आरु ओवी वी पाखड़ा हुता जेरेम सी डिल ढाँकायलो हुतो। हेनका चालते टेमे हेनका पाखड़ा क पाखड़ान क ओवाज मेसे घोना सोटा पानी, ओळी घोनी ताकोतवाळी बुली, ओळी सेना क हालचाल सारकी समवायतली हुती; आरु जव् त्या उबा हयतला, तव् आपसा पाखड़ा टांग देता हुता। ओळतेन हेनका मुनका उपोर जी वादळा मोंडळी हुती, हेका उपोर सी एक बुल समळाय पोड़तो हुतो; आरु जव् त्या उबा होयता हुता, तव् आपसा पाखड़ा टांग लेता हुता। जीवधारीयो क मुनका क उपोर वादळा मोंडळी हुती। हेका वादळा मोंडळी क उपोर राजगादी क सारको काहीन हुतो। यो राजगादी मानु नीलम दोगड़ा क बोनलो हुतो। राजगादी सारको एना जागा पोर कुदु बोठलो हुतो, एना पोर मानुस सारको थुड़ोक देखायतो हुतो। हेका कड़्याम सी लीन उपोर भेनी मेसे चोमकावला पितळ सारको देखा पोड़्यो, आरु हेका धड़े आरु च्यारु मेर आगठा सारको देखा पोड़तो हुतो; ओळतेन उना मानुस क कड़्याम सी लीन नेचो भेनी वी मेसे काहीन आगठा सारको देखा पोड़तो हुतो; आरु हेना च्यारु मेर वीजाळो हुतो। जसो जेठवड़ीन दाहड़ा मा बाम देखाय पोड़तलो, तसोज च्यारु मेर क वीजाळो देखा पड़तो हुतो।
योहोवा क महिमा क रुप असोत हुतो। ओको देखीन, हांव मुयोन भुरसे हिट पोड़्यो, तव् हांव एक बुल समळ्यो जसो कुदु वात कोरतो हय।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.