सभोपदेशक 12

1आपसी जुवानीन दाहड़ा मा आपसा बनावने वाळा परमेश्वर क फोम राख, इना सी पेहल की पीड़ान दाहड़ा आरु त्या साले आवे, जीनु मा तु म्हारो मन इनु मा नी लागतो। 2इना सी पेहेल की दाहड़ो आरु वीजाळो आरु तारागण आंधरा हुय जाय, आरु पानी पड़नेन वादळो पछो घेरु बनाय लेय; 3उना दाहड़ा मा तारे घोरुन राखवाळिया कापने लागसे, आरु दात खानो चावनो छुड़ देसे, आरु खिड़कीम रयीन देखने वाळा डुळा आंधळा हुय जासे, 4आरु तुमरा कानटान सोयड़ोकोन ओवाज नी सोमवाये, आरु चक्की दळनेन ओवाज धीरी हुय जासे, आरु भोळभाके चील्लान आयेड़तात् उठ जासे, आरु सब गावने वाळान बुल कम हुय जासे। 5आरु जो ऊचो रयसे वाँ चढ़ने सी तुको बीक लागसे। गाव गळी मा तु बकवादी कहवाइस आरु बादामन झाड़ फुलने लागसे, आरु टिड्या घसड़ाइन चालने लागसे, आरु भुख बढ़ने वाळो फोव पछो काम नी आवे; काहकी मानुस आपसा जलोमका घर मा जात रयसे आरु रोड़ने वाळा सयड़के-सयड़के फिरसे। 6उना टेम पर चाँदीन तार दुय टुकड़ा हुय जासे आरु सोनान वाटको टुट जासे; आरु झरोन धड़े गुळो फुट जासे, आरु कुन्डा धड़े घड़घट्‌यो टुट जासे। 7जव धुळू जसो हतो तसोत् धुळा मा भेसकाय जासे, आरु जीव परमेश्वरन पास मा पछी जात रयसे जो हेको आपलो हुतो। 8सभा उपदेशक यो कये, सब काय वायबार छे, सब काय वायबार छे।

मानुसन पुरो काम

9सभा उपदेशक जो ओकोल वाळो हुतो, त्यो लोगहन क गियान बी सिकाड़तो रयो, आरु धियान लगाड़ीन जाँची पारखीन घण सवटा सिकापन क वचन चोळदिन राखतो हुतो। 10उपदेशक मनभावे असा बुले हेरीन खरी-खरी यी छाची वात लीख दिदो। 11ओकोल वाळान बुले आर वाळी तीखली लाकड़ी सारका रये, आरु सभान डाहडान बुले गाड़ला खीळान सारका छे, काहकी एकुत् गुवाळ्या रयीन भेटे। 12ए म्हारा पोर्या इनु मा रयीन चुकसी करनो सीक। घण सवटी कीताबन लीखला काम खतम नी हुये, आरु जाडा भणन डिल काजे हरबड़ाय देय। 13सब काय समळाड़ी देदो आखरी वात यी छे की परमेश्वरन बीक मान आरु हेका हुकुम क पाळन कर; काहकी मानुसन काम योत् छे। 14काहकी परमेश्वर मानुस क सब काम आरु आखी ढाकायली वातन चाहे ची वारु हय या भुण्डी, हेको नियाव करसे।