योहेजकेल 5

झटा बुड़ीन योरुसालेम क नास क देखाड़नो

1हे मनख्यान ओवलीयाद, एक निसानली तलवार ले, आरु हेको नावटान सारको पावड़ान काम मा लावीन आपसा मुनका आरु दाड़ी क झटा बुड़ नाख, तव तुलनेन काटो लीन छटान वाटो पाड़। 2जव सोहोर क घेरवनेन दाहड़ा पुरा होये, तव सोहोर क धड़े एक तीहाई आगठा मा नाखिन धपाड़जी, आरु एक तीहाई क वाहवा मा उड़ावजी, आरु हांव तलवार हापकीन ओका पछळ चालाड़ीस। 3तव इना मा सी इतराकसा झटा लीन आपसा छिंदरान कुरे बांदजी। 4ओळी एनु मा सी इतराक सा लीन आगठा क वीचमा नाखजी की त्या आगठा मा धप जाय, तव ओकाज मा सी एक भपकु भड़कीन इसराएल क आखा घराना मा जात रोहसे।

5हे पोरबु योहोवा ओसो कोवे छे: योरुसालेम ओसोज छे; हांव न हेको दिस रादेसोन क वीच मा मेकलो, आरु त्या च्यारु धड़े देसो सी घिरायला छे। 6त्यो मारा कायदा क वीरुद काम कोरीन दिसरा मुलको सी जादा पाप कोर्या, आरु मारा कायदा क वीरुद च्यारु धड़े क देसो क लोगहन सी जादा गुनु कोरला छे; काहकी त्या मारा कायदा क तुच्छ जान्या, आरु त्या मारी वीधियो पोर नी चाल्या। 7ओतरा कोरीन पोरबु योहोवा ओसो कोवे छे: तुमु लोगहन जे आपसा च्यारु धड़ेन जातीयो सी जादा हुल्लड़ कोरे, आरु नी मारी वीधियो पोर चालता, नी मारा कायदा क मानता आरु आपसा‍ च्यारु धड़ेन जातीयो क कायदान ओनसारे वी नी कोर्या, 8ओस कोरीन पोरबु योहोवा ओसो कोवे छे: देख, हांव आपसोज तारे वीरुद्ध छे; आरु दिसरी जातीयो क देखता हांव तारे वीच नियाय क काम कोरीस। 9तारा आखा भुंडला कामो न कोरता हांव तारे वी ओसो कोरीस, जसो हेमी लगुन नी कोर्‌यो, आरु नी ओगो ओळी कोरीस। 10एकालीय तारा वीच पुर्या आपसा आपसा बास क, आरु बास आपसा आपसा पुर्यान मांस खासे; आरु हांव तुखेक डोन आपीस, ओवी जे मानसे वाच जासे, तीनुक हांव च्यारु मेर रीवन्या तीवन्या कोर दिस।

11आरु पोरबु योहोवा न यो बुल छे, की मारा जीवन नु कोसोम, एकालीय की तु न मारा चुखला जागा क आपसा आखा भुंडली मुरती आरु आखा भुनला कामो सी वीटोळ कोरलो छे, हांव तुख घोटाड़ीस, आरु तारे पोर दोयान निंगा नी कोरीस, आरु तारे पोर काहिन वी गीन नी कोरीस। 12तारी एक तीहाई ते मोरली सी मोरसे, आरु तारा वीच भुख सी मोर मिटसे; एक तीहाई तारे आड़े धड़े तलवार सी मार्या जासे; आरु एक तीहाई क हांव च्यारु मेर तीतर बितर कोरीस आरु तलवार हापकीन हेनका पछळ चालाड़ीस।

13ओस कोरीन मारी रीस कोम होयसे, आरु आपसी रीस उना पोर आखी भड़कावीन मेसे शांती जोड़से; आरु जव हांव आपसी जलजलाहट उना पोर पुरी रीती सी भोड़की पोड़ीस, तव त्या जान लेसे की हांव योहोवात न जलन मा आवीन यो कोवलु छे। 14हांव तुख च्यारु धड़ेन मुलुकोन वीच, आखा आवने जाने वाळा देखतात उजाड़ीस, आरु तारी नावधराई कोरावीस।

15“ओतरान कोरीन जव हांव तुसे रीस आरु रीसवाईन आरु बेसका तीखा रीसो भेळ डोन आपीस, तव तारा च्यारु मेर क जाती क अगळ नावधराई, ठट्ठा, भनाय, आरु भंगलाय होयसे, काहकी हांव योहोवा न यो कोहलो छे। 16यो उना टेम मा होयसे, जव हांव उना लोगहन क नास कोरने क लीय तुमरे पोर बेसको तीखा तीर चालाड़ीस, तुमरे वीच काळ वोदाड़ीस, आरु तुमरा ओनोन काळ एने खाने काय नी जोड़से। 17हांव तुमरा वीच काळ आरु जोंगली जोनवारे मुकलीस जे तुमुक वीन ओवलीयाद कोरसे; आरु मरी आरु लुहुय तुमरा वीच चालतो रोहसे; आरु हांव तुमरे पोर तलवार चालाड़ माँगीस, मेसे योहोवा न ओसो कोयो छे।”