नीरगमन 15

मुसान गीत

1तव मुसा आरु इसराएलीया योहोवा भगवान क लीये यो गीत गाया। त्या कया,

"हांव योहोवान गीत गावीस, काहकी त्यो आखा सी मोटो छे;

त्यो घुल्‌लान क सात मा घुल्‌ला सवार को त्यो दरीया मा उहवाड़ दीदो।1

2योहोवा परमेश्वर म्हारी ताकत आरु भजनन दाखुलु छे,

आरु‍ त्योत् म्हारो छुड़ावने वाळो बी बनीयो;

म्हारो योहोवा भगवान त्योत् छे, हांव उकोत् गीत गावीन भक्ती करीस,

हांव योहोवा भगवान क लीये रयनेन जागो बनावी, म्हारा वेगला डाहडान योहोवा भगवान त्योत् छे,

हांव उकोत् भाळतो रयीस।2

3योहोवा लड़ाय मा जीतनियो छे;

उको नाव योहोवा छे।

4त्यो फिरोनन घुड़सवार आरु सेना को दरीया मा न्हाक दीदो;

आरु उका वारु सी वारली घुड़सवारी आरु आधिकारी रातला दरीया मा डूब गीया।

5उण्डो पानी हेनको ढाक लीदो;

त्या दगड़ा सारका उण्डला जागाम डूब गीया।

6ए योहोवा, थारो जेवड़ीयो हात ताकोत मा मोटो हुयो ए योहोवा,

थारो जेवड़ीयो हात जोम वेरी को झीनो कर देय।

7तु थारा वीरुधियान को थारी मोटी ताकत सी पाड़ देय;

तु थारी रीस को भड़कावे, आरु त्या झीनला झीकटन सारका भसम हुय जाय।

8थारा नाकन दोम सी पानी एखटो हुय गीयो, पानीन धार ठेळान तसी एक जागे उबी हुय गय;

दरीयान वीच मा उण्डो पानी जम गीयो।

9वेरी जोम कयो, हांव जाईन धरीस,

हांव लुटलो माल को वाट लीस,

उका सी म्हारो जीव भराय जासे।

हांव म्हारी तरवार हापकीन म्हार हात सी हेनको नाश कर दीस।

10तु थारी दोमोन वाहळ्ळी चलाड़ीयो, तव दरीयो न हेनको ढाक लीदो;

त्या दरीया मा लुहड़ान तसा डूब गीया।

11“ए यहोवा, देवता मा थारे सारको कुन छे?

तुते चुखापन मा मोटो छे,

आरु थारी बढ़ाय करने वाळान मन मा बीक राखने जुगु छे,

आरु वीनछेळ्यो काम मोटो काम करे।

12तु थारो डाखरीयो हात बढायो,

आरु धरती उको गीळ गय।

13थारी दया सी तु थारी छुड़ावली परजान अगवाय करीयो,

थारी ताकत सी उको थारा चुखला जागा मा लीन गयो।

14देम–देशन लोगहन यो समळीन काप उठसे;

पिलीश्तीयान मा रोहने वाळान पोखड़ायनेन पीड़ा सारकी पीड़ा होयसे।

15एदोमन डाहडा घबराय जासे;

मोआबन ताकत वाळा कापने लाग जासे;

सब कनान मा रयने वाळान मन निचळो हुय जासे।

16उन लोगहन मा बीक आरु घबरायनो समाय जासे;

थारा खुळान ताकत सी त्या दगड़ान तसा वीन मुया हुय जासे,

जव तक ए योहोवा, थारी परजान लोगहन जीनुक तु मोल लेदलो छे पार नी छेक जाय।

17तु उन लोगहन को पुगाड़ीन थार आपसा हकन वाटा पर बठाड़ीस, यो‍ त्योत् जागो छे,

ए योहोवा जीनाक तु थारा रयनेन जागा जुगु बनायो,

आरु त्योत् चुखलो जागो छे जीनाक,

ए पोरबु, तु आपसुत् उबो करलो छे।

18योहोवा जलोमको राज करतो रयसे।”

मिरीयमन गीत

19यो गीत गावनेन कारण यो छे, की फिरोनन घुड़सवारी आरु सवारन सात मा दरीयान वीच मा जात रीया, आरु योहोवा हेनको उपर दरीयान पानी पछो ली आयो; पुण इसराएली दरीयान वीच मा धरतीन जागा परुत् चालीन छेक गीया।

20तव हारुनन बयनी मरीयममन नावन कागळीयो हात मा ढुलगो लीदो; आरु सब बायरा ढपली लीन नाचता जाईन उका पछोळ चाल पड़ीया। 21आरु मरीयम हेनको सात मा यो गीत गावता गीया की;

योहोवान गीत गावो, काहकी त्यो मोटो ताकत वाळो बनीयो;

घुल्‌लान को सात मा त्यो सवार करने वाळान को दरीया मा न्हाक दीदो।

माराह आरु एलीमन पानी

22तव मुसा इसराएलीयान को रातला दरीया सी अगो लीन गयो, आरु त्या शुर नावन जंगलो मा आया; आरु जंगल मा जाता जाईन तीन दाहड़ा लगुन पानीन झर नी जड़ीयो। 23ओळते मारा नावन एक जागा पर पुगीया, वाँ वाळो पानी कड़वो हुतो, आरु त्या उको पी नी सकीया; इना कारण सी उना जागान नावन मारा3 पड़ गीयो। 24तव त्या यो कयीन मुसान वीरुद मा कुड़कुड़ायने लागीया, “हामु काय पीजे?” 25तव मुसा योहोवा सी वीनता करीयो, आरु योहोवा भगवान उको एक झाड़ देखाड़ीयो, जीना सी जव उको पानी न्हाकीयो, तव त्यो पानी गुळो हुय गीयो। वाँत् योहोवा हेनका लीये एक नियम बनायो, आरु वाँत् त्यो यो कयीन हेनकी पारख करीयो, 26“कदाम तु थारा योहोवा भगवानन वचन तन मन सी समळे, आरु जो ओकी नजर मा वारु छे त्योत् करे, आरु ओको हुकुम पर कानटा लगाड़े आरु उना सब नियम को माने, ती जतरी बिमारी हांव मिसरीया पर मकलीयो, उका माईन एक बी थारे पर नी मकलो; काहकी हांव तुमरो आरगाय आपने वाळो योहोवा छे।” 27तव त्या एलीम मा आया, जाँ सारी पानीन बारे झोरे आरु तीन कोम आठ वीस खजुरन झाड़ हुता; आरु वाँ त्या पानीन पास मा तम्बु करीया।