Skip to content
BibleKenya

Cua Bible Literal Text

Rô-ma 16

Đêh vlôh, gô atăq xôq dii oh ay mư Phê-bê, dro oh ay ku 'wot, kung laa adro hơu varơuq ku Tayuup Vah aduq Xen-kơ-rê, xôq oh ay hnoq ik tiip đoonq mư đom Lôôk, tyauq kach xưngq dik dii khơl vah, ji truh waak tajưp mư đom dong varơuq leq đơu mư duh truh oh ay. Vii mư kung heq vlôh jêêk adro waak tajưp ka 'ngưng dro, jauq hloay kadih xăk gô.

Vôôch hrok Bê-rit-sin ji A-qui-la, khơl 'wơyq achung varơuq ku gô đom Lôôk Wơơt Dêh Jê-xu, nưq laa khơl adro heq hôôk kaxêêt xăk riirh vii kơq xăk riirh ku gô, leh vơ kadih gô kaam ơơn oot, đơu dêq hloay kaluh tayuup vah ku khơl tamooy daak kadrơy đnoyq, ji vôôch hrok tayuup vah aduq hnhư oot. Vôôch hrok Ê-bai-nêt, oh ay xung xiaq ku gô, đơu ay nưq laa play droyq dik ku dêh A-si ka Lôôk Wơơt Dêh. Vôôch hrok Ma-ri, adro heq dơơp varơuq thier pơơl hwơơl vii oh ay. Vôôch hrok An-trô-ni-kơ ji Ju-ni-a, adro takuul takiel ku gô, ji 'wơyq achung karuk ku gô, vaarq dro nưq laa khơl dro jah vado katul đom khơl jah rơơlh, đơu oot kung heq măn đom Lôôk Wơơt Dêh adroyq gô. Vôôch hrok Am-li-a, 'wơyq xung xiaq ku gô đom Lôôk. Vôôch hrok U-rơ-banh, 'wơyq achung varơuq ku 'wot đom Lôôk Wơơt Dêh, ji Êch-ta-chi, 'wơyq xung xiaq ku gô. Vôôch hrok A-be-lơ, adro jah tiip nhonq đom Lôôk Wơơt Dêh. Vôôch hrok khơl manih đom kôôch hnhư ku A-rich-tô-bu. Vôôch hrok Hê-rô-đi-ôn, adro takuul takiel ku gô. Vôôch hrok dro leq thuôk kôôch hnhư ku Nat-xit, laa khơl adro măn đom Lôôk. Vôôch hrok Tri-phe-nơ ji Tri-phô-sơ, khơl adro pơơl hwơơl đom Lôôk. Vôôch hrok Bet-xi-đơ xung xiaq, adro heq dơơp varơuq thier galeh galal đom Lôôk. Vôôch hrok Ru-phu, adro jah rơơlh đom Lôôk, kung miq ku ay nưq ji ku gô. Vôôch hrok A-sin-kơ-rich, Phơ-lê-gôn, Het-me, Ba-trô-ba, Het-ma, ji khơl oh ay măn dii oot. Vôôch hrok Phi-lô-lô-gơ ji Ju-li, Nê-rê ji ay kadrê ay nưq, kung Ô-lim ji dêq hloay khơl vah măn dii oot. Dayh kahnoq xuum 'yo vado mamuuyq bơơn kabiin hiip vah. Dêq hloay kaluh tayuup vah ku Lôôk Wơơt Dêh vôôch hlơq oh ay.

Panưh kadrơy, wơơy oh ay, gô ahmưk nhăk oh ay rơơt rol dii khơl adro dơơp vlôh varơuq aklah vlôh ji kơq gưlh lôp, đêh dii pato dayh đơu oh ay heq hok, ji dayh chuh xangưưy klơlh oot. Vii khơl adro đanưq leh hơu varơuq Lôôk haay, laa Lôôk Wơơt Dêh, bơh laa poop klaak ku kadih oot, ji bơyh apok langưưp xuum kung adô pa ôôh, oot aluut pa ôôh padêq khơl xuum klaak klêq hlơu. Bơyh xuum tameng tyauq ku oh ay heq pahêêr vlôh truh tôôy dro. Kơq nưq, gô hlah hlaak truh oh ay, bơh gô trôôch oh ay jah khôôt xet truh varơuq kaxay, đơu xarêh xaraat đôôyq dii varơuq xơk. Kơy Plêêk ku varơuq hrok hrol hnoq joaq raniaq Sa-tan 'laarq jôôk oh ay kach talăng dayh.

Apôôy vanong plêêk ku Lôôk haay, laa Lôôk Wơơt Dêh Jê-xu, măn dii oh ay.

Ti-mô-thê, 'wơyq achung varơuq ku gô, kung Lu-si-ut, Gia-sôn, ji Sô-xi-ba-tê, khơl adro takuul takiel ku gô, atăq apok hlơq oh ay. Gô, Tet-tiu, adro valơk hla thư neq, atăq apok vôôch hlơq oh ay đom Lôôk. Gai-ut, adro tiip đoonq gô ji hloay tayuup vah, atăq apok vôôch hlơq oh ay. Ê-ra-tu, adro jư jêêt ku theng phôq, kung dii dro oh ay Qua-tu, atăq apok vôôch hlơq oh ay. [Apôôy vanong plêêk ku Lôôk haay, laa Lôôk Wơơt Dêh Jê-xu, măn kung dêq hloay oh ay. Amen.]

Apôôy tađnah tađnaak thuôk xuq Kơy hnoq ik khienq oh ay kajưk kalh tyauq Hêêl Kaxay ku gô ji varơuq padoh taboon Lôôk Wơơt Dêh Jê-xu, tyauq varơuq kahnoq vlôh truh varơuq kadook hmưq jah jư padu đom tuôôt kawat yơơt dalơh hlê 'ngưng đơơy xanưm, Bơh neq heq jah kahnoq vlôh, kung tuôôy bơyh kaluh rahlăp hlit, tyauq tanưưl ku Kơy Plêêk đơơy đơơy, heq jah đnooy vlôh ka tôôy tamooy xôq wih truh varơuq tameng tyauq ku xuum tuôq, apôôy tađnah tađnaak thuôk xuq Kadraq, laa Kơy Plêêk khôôt xet muuyq heq, gamưh Lôôk Wơơt Dêh Jê-xu, dong truh đơơy đơơy. Amen.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.