Cua Bible Literal Text
1 Kô-rinh-tô 1
Phao-lô, jah taayh tawooyh dơơp khơl jah rơơlh ku Lôôk Wơơt Dêh Jê-xu xing iq trôôch ku Kơy Plêêk, ji manih oh ay Sôt-then, atăq ka tayuup vah ku Kơy Plêêk măn aduq Kô-rinh-tô, laa khơl manih heq jah pa xarêh đom Lôôk Wơơt Dêh Jê-xu, 'ngưq laa khơl xatyauq jah taayh tawooyh, kung dii tôôy adro măn loch aduq xadrook apôôy yal Lôôk haay, laa Lôôk Wơơt Dêh Jê-xu, laa Lôôk ku oot ji ku haay. Apôôy vôôch vanong plêêk ji varơuq hrok hrol xing Kơy Plêêk, laa Vaq haay, ji xing Lôôk, laa Lôôk Wơơt Dêh Jê-xu, măn dii oh ay.
Gô hloay kuh kway Kơy Plêêk ku gô truh oh ay vii kơq vanong plêêk ku Kadraq, laa varơuq heq jah kahniq ka oh ay đom Lôôk Wơơt Dêh Jê-xu. Vii đom tôôy varơuq oh ay heq jah dơơp ka karoh e đom Kadraq, đom tôôy apok đnooy ji tôôy varơuq hlolh xet, dang đaji apok xanưk truh Lôôk Wơơt Dêh heq jah 'yo nhonq kajưk dik đom katul oh ay, pheq đnooy oh ay be thiuq ka paq kê vanong leq, tuôôy talăng jăk takôô varơuq kahnoq vlôh ku Lôôk haay, laa Lôôk Wơơt Dêh Jê-xu, laa Kơy kung hnoq dơơp oh ay dưk kajưk dong truh lôôch dik, ka leh e aduq đnooy ik đom hngơy ku Lôôk haay, laa Lôôk Wơơt Dêh Jê-xu. Kơy Plêêk laa jư apok, bơyh Kadraq đơu oh ay heq jah taayh tawooyh muut đom varơuq athêêk tajauq dii Koot ku Kadraq, laa Lôôk Wơơt Dêh Jê-xu, Lôôk haay.
Bơh wơơy oh ay, gô ahmưk nhăk oh ay xing yal ku Lôôk haay, laa Lôôk Wơơt Dêh Jê-xu, đaneq dêq hloay oh ay duh e achung apok đnooy, ji te liq e kaluh varơuq aklah đêh katul oh ay, đơu oh ay duh jah anguk dii mamuuyq đom kung xuum biit ji đom kung muuyq varơuq. Vii, wơơy oh ay ku gô, gamưh khơl hnhư ku Kơ-lô-ê, dong varơuq truh oh ay heq jah kahnoq ro ka gô, đaneq e kaluh bing ja tachơơl takhăk đom katul oh ay. Gô e iq đaji luneq, nưq laa tôôy adro đom oh ay đnooy đaneq: “Gô thuôk xuq Phao-lô,” long “Gô thuôk xuq A-bô-lô,” long “Gô thuôk xuq Sê-pha,” long “Gô thuôk xuq Lôôk Wơơt Dêh.” Lôôk Wơơt Dêh heq biq aklah goch ih? Be aleq Phao-lô heq biq đongq đing tol gay charăk thay ka oh ay? Long oh ay heq chiuq bap-tem taayh yal Phao-lô? Gô kuh kway Kơy Plêêk vii gô heq be dơơp bap-tem ka kơyq đom oh ay, đêh vlôh Kơ-rit-bu ji Gai-ut, xôq leh e manih leq hnoq ik đnooy đaneq oh ay heq taayh yal gô chiuq bap-tem. (Gô kung heq dơơp bap-tem ka hnhư Sê-pha-na. Đêh vlôh, gô leh xet gô e be heq dơơp bap-tem ka kơyq đnoyq.) Vii Lôôk Wơơt Dêh heq be patăk gô hooy dơơp bap-tem, đơu laa padoh taboon Hêêl Kaxay — leh aalq bơơn apok đnooy khôôt xet, xôq ka gay charăk ku Lôôk Wơơt Dêh leh biq 'yo laa leh ik xung liq.
Vii apok pato ku gay charăk ju laa varơuq vlô khưrq đôôyq dii khơl adro hư hlơơp, bơh đôôyq dii haay, khơl adro jah wơơt, nưq laa taay yaak ku Kơy Plêêk. Vii e apok valơk:
“Gô hnoq pahyaak ka'lăk varơuq khôôt xet ku khơl adro khôôt xet;
ji Gô hnoq dơơp hư varơuq hlolh xet ku khơl adro hlolh xet.”
Adro khôôt xet măn ka'leq? Adro hok xet măn ka'leq? Adro tagêh apok ku đơơy neq măn ka'leq? Be aalq Kơy Plêêk heq dơơp varơuq khôôt xet ku dêh araak jêêk varơuq vlô apoop yôôch long ih? Vii hlolh hloq đaneq, đom varơuq khôôt xet ku Kơy Plêêk, dêh araak heq leh nhonq xet Kơy Plêêk bơơn varơuq khôôt xet nưq, lunưq Kơy Plêêk heq hlah xuum, gamưh hlê varơuq padoh taboon vlô khưrq, xôq wơơt khơl leq tuôq. Vii kơq manih Jo Thaiq yôôych đooy vôôch kaluh hlêêl akêh, măn manih Hi Lap yôôych axek akhiim varơuq khôôt xet. Măn 'wot yôôych padoh taboon Lôôk Wơơt Dêh biq đongq đing tol gay charăk, ju laa kuk phơu xatôôlh jôôk đôôyq dii manih Jo Thaiq, bơh laa varơuq vlô khưrq đôôyq dii kaluh tamooy daak kadrơy. Panưh kadrơy, đôôyq dii oot, laa khơl adro jah taayh tawooyh, dêq Jo Thaiq hloay Hi Lap, Lôôk Wơơt Dêh laa taay yaak ku Kơy Plêêk ji varơuq khôôt xet ku Kơy Plêêk. Vii varơuq vlô khưrq ku Kơy Plêêk laa khôôt xet iaq koot manih, ji varơuq ravoch ku Kơy Plêêk yôôych kalh paraat iaq koot manih.
Wơơy oh ay, varơuq dik laa oh ay 'yo hlê varơuq taayh tawooyh ku oh ay, hloq đaneq leh 'ngưng adro khôôt xet tyauq xăk xamơk, leh 'ngưng khơl padrok e qwuyen, kung be 'ngưng khơl adro jah pa iir adrơơk karoh e. Lunư, Kơy Plêêk heq rơơlh kaluh varơuq vlô khưrq ku dêh araak xôq Kadraq hnoq ik dơơp ka khơl adro khôôt xet vlôh kamưưl, Kơy Plêêk heq rơơlh kaluh varơuq ravoch ku dêh araak xôq Kadraq hnoq ik dơơp ka khơl adro paraat kalh kamưưl, ji Kơy Plêêk heq rơơlh kaluh kajoq tarôôy dik, kung kaluh thưq biq 'yo leh ra kajoq đom dêh araak, kaluh varơuq leh e, xôq Kadraq hnoq ik khienq kaluh varơuq e jêêk vlôh leh e, xôq ka tôôy xăk xamơk be ik pa ưưt akhwoak kajoq kangưưr Kơy Plêêk. Bơh gamưh Kadraq, oh ay măn đom Lôôk Wơơt Dêh Jê-xu, laa Kơy jah jêêk vlôh varơuq khôôt xet truh xing Kơy Plêêk, vơơ hloay laa varơuq hyioh jăk hloay ka varơuq jêêk vah, kung varơuq wơơt xok deng ka haay, xôq ka, đaji e apok valơk: “Kơyq pa ưưt xăk, dayh pa ưưt xăk đom Lôôk.”
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.