1 Kô-rinh-tô 2

1Wơơy oh ay, tuôôy truh kung oh ay, gô kung heq be truh dii varơuq yơơt lơyq ku apok đnooy long ku varơuq khôôt xet, tuôôy đnooy vlôh ka oh ay varơuq kadook ku Kơy Plêêk. 2Vii măn đom katul oh ay, gô heq đinq be xet kajoq đêh vlôh Lôôk Wơơt Dêh Jê-xu ji Kadraq heq biq đongq đing tol gay charăk. 3Gô kung heq măn dii oh ay đom varơuq ravoch, đom xuum varaal yôq ji vadrau padrik dik. 4Apok đnooy ku gô ji varơuq padoh taboon ku gô leh bơơn kaluh apok đnooy jah xok xuum ku xuum biit khôôt kheoq, bơh laa bơơn varơuq dơơp xanưk ku Kơy Phool Hiel ji taay yaak, 5xôq xuum tuôq oh ay leh măn aduq varơuq khôôt xet ku koot manih, đơu laa aduq taay yaak ku Kơy Plêêk.

6Bơh katul khơl manih kôt, 'wot pato dayq varơuq khôôt xet, đơu leh aalq varơuq khôôt xet ku đơơy neq, kung be aalq ku khơl padrok dưk xanok đơơy neq, laa khơl adro biq hư hlơơp. 7Tađôôy muut đnư, 'wot pato dayq varơuq khôôt xet ku Kơy Plêêk đom varơuq kadook, laa varơuq hmưq jah kadook padu đơu Kơy Plêêk heq đinq 'miêh xing adroyq kaluh đơơy xanưm deng ka varơuq tađnah tađnaak ku haay, 8laa varơuq đơu leh e muuyq kơyq đom khơl adro dưk xanok ku đơơy neq hlolh ik, vii atoh oot hlolh, yôôych dik oot heq leh đongq đing Lôôk tađnah tađnaak tol gay charăk. 9Lunư, đaji e apok valơk:

“Varơuq mot koq hloq,

tôôr koq tameng,

ji koq muh vlôh đom xuum manih,

laa kaluh varơuq đơu Kơy Plêêk heq ralauq xôq 'miêh ka khơl leq xung xiaq Kadraq.”

10Vii Kơy Plêêk heq kahnoq vlôh ka 'wot gamưh Kơy Phool Hiel. Jo Kơy Phool Hiel 'yo xet tôôy varơuq, hloay dêq kaluh varơuq jaruq dik ku Kơy Plêêk. 11Vii kơyq đom katul koot manih xet ik kaluh varơuq đom muuyq adro, atoh leh aalq laa xuum klaak ku adro nưq pi'lăp kadih ni? Kung đanưq, leh kơyq 'yo xet kaluh varơuq thuôk Kơy Plêêk, đêh vlôh Kơy Phool Hiel ku Kơy Plêêk. 12Bơh 'wot heq leh nhonq xok garu xi ku dêh araak neq, đơu laa Kơy Phool Hiel truh xing Kơy Plêêk, xôq 'wot hnoq ik xet kaluh varơuq jah kahniq ăm hloh hloh xing Kơy Plêêk ăm ka haay, 13kung laa kaluh varơuq đơu 'wot pato dayq, be aalq bơơn varơuq pato dayq xing kaluh apok đnooy khôôt xet ku koot manih, bơh laa bơơn varơuq pato dayq ku Kơy Phool Hiel, tuôôy padoh hlolh kaluh varơuq danưng kooy xing kaluh apok danưng kooy. 14Khơl adro tyauq katik xăk xamơk e 'miêh yôôych leh đoonq nhonq kaluh varơuq thuôk xuq Kơy Phool Hiel ku Kơy Plêêk, vii ni laa varơuq vlô khưrq đôôyq dii adro nưq, ji adro nưq leh e paraat xôq hlolh vii ni pheq jah 'yo xet tyauq kach danưng kooy. 15Măn manih danưng kooy 'yo đinq tôôy varơuq, bơh kadih xăk yôôych leh biq kơyq 'yo đinq.

16“Vii kơyq nhonq xet xuum biit ku Lôôk — kơyq hnoq pato dăt Kadraq?”

Bơh haay yôôych e xuum biit ku Lôôk Wơơt Dêh.