Rô-ma 15

1Bơh haay, laa manih kalh paraat, pheq gengq hlôôy kaluh ravoch ku adro leh kalh, ji be dơơp nhăp xuum haay. 2Tôôy adro đom haay dayh dơơp nhăp xuum manih gah gih haay vii ka iq tamaq kaxay, wih truh varơuq rôôk tơơk dro nưq. 3Vii hloay kaah Lôôk Wơơt Dêh heq leh dơơp nhăp xuum kadih xăk. Wih hlê, đaji varơuq heq jah valơk: “Kaluh apok đnooy ra ơơh ku khơl adro đnooy ra ơơh Kadraq heq uk hlê tol koot.” 4Bơyh xet taleq 'ngưng varơuq heq jah valơk pôôt adroyq neq yôôych heq jah valơk hlê vii varơuq pato dayq ka kadih haay, xôq ka gamưh varơuq atuq xuum ji gamưh varơuq ahmưk nhăk ku Rahlăp Vah, haay e jah xuum takôô gamưh. 5Apôôy xiin Kơy Plêêk ku varơuq atuq xuum ji hmơk nhăk kahniq vanong ka oh ay xôq e kung muuyq xuum biit dii mamuuyq tyauq đaji Lôôk Wơơt Dêh Jê-xu, 6xôq ka oh ay hnoq ik kung muuyq xuum, bơyh muuyq huuy ayuôôt laat Kơy Plêêk, laa Vaq ku Lôôk haay, laa Lôôk Wơơt Dêh Jê-xu.

7Anưq, dayh tiip nhonq mamuuyq, kung đaji Lôôk Wơơt Dêh heq tiip nhonq oh ay, xôq wih truh varơuq tađnah tađnaak ku Kơy Plêêk. 8Vii gô xiin đnooy đaneq Lôôk Wơơt Dêh heq jah khienq vlôh jêêk xapok ku manih chiuq goch kađuh vii kơq varơuq dik ku Kơy Plêêk, xôq 'yo nhonq apok tavek ku khơl mo kơy, 9bơh laa xôq khơl tamooy kadrơy ayuôôt laat Kơy Plêêk vii kơq xuum biit angơuq ku Kadraq, dang đaji apok heq jah valơk:

“Bơyh nưq, koot hnoq xưng nhonq Kadraq katul khơl tamooy daak kadrơy

ji kacheeu ayuôôt yal Kadraq.”

10Laay e valơk đaneq:

“Khơl tamooy daak kadrơy, dayh hlah hlaak kung dii tamooy Kadraq.”

11Ji laay đaneq:

“Dêq hloay khơl tamooy daak kadrơy, dayh ayuôôt laat Lôôk;

dêq hloay kaluh tamooy, dayh kacheeu ayuôôt Kadraq.”

12Ji Ê-sai đnooy athêêp đnoyq:

“Rayah ku Je-sê hnoq rama vlôh, laa Kơy jah panưk tok xôq dưk xanok khơl tamooy daak kadrơy;

kaluh tamooy daak kadrơy hnoq e xuum takôô gamưh aduq Kadraq.”

13Apôôy Kơy Plêêk ku xuum takôô gamưh khienq oh ay galơh galaay tôôy varơuq hlah hlaak ji hrok hrol đom xuum tuôq, xôq dơơp ka oh ay raah jôh đom xuum takôô gamưh gamưh da uh ku Lôôk Phool Hiel.

14Panưh kadrơy, wơơy oh ay ku gô, kadih xăk gô kung jah tameng tyauq truh oh ay đaneq kadih oh ay kung jah galơh galaay varơuq tolh kaxay, vii heq jah galôp viik tôôy hok xet ji e ka paraat xôq ahmưk nhăk mamuuyq. 15Bơh gô heq valơk kach kalh paraat ka oh ay 'ngưng iaq đom aduq neq aduq hơq đaji xôq hmơk nhăk oh ay, bơyh vanong plêêk heq jah Kơy Plêêk kahniq ka gô, 16xôq khienq gô laa muuyq xapok ku Lôôk Wơơt Dêh Jê-xu ka khơl tamooy daak kadrơy, tuôôy dưk dơơp varơuq tơơk tưp ka Hêêl Kaxay ku Kơy Plêêk, xôq ka kuah lêh ku khơl tamooy daak kadrơy hnoq ik jah hlah xuum đoonq nhonq, xing tuôôy jah paxa rêh bơyh Kơy Phool Hiel. 17Kơq nưq, đom Lôôk Wơơt Dêh Jê-xu, gô e varơuq pa ưưt xăk đôôyq dii kaluh varơuq dơơp thuôk xuq Kơy Plêêk. 18Vii gô hnoq be hôôk đnooy paq kê varơuq kajoq đơu varơuq nưq leh aalq Lôôk Wơơt Dêh heq dưk dơơp hlê gô, xôq jarooy truh varơuq tameng tyauq ku khơl tamooy daak kadrơy — bơyh apok đnooy hloay varơuq dơơp, 19bơơn paraat kalh ku kaluh hlêêl akêh ji pheep akêh, bơơn da uh Kơy Phool Hiel ku Kơy Plêêk — pheq đnooy gô heq padoh taboon Hêêl Kaxay ku Lôôk Wơơt Dêh kach đu tol xing Jê-ru-sa-lem ji rawiit dêq dong truh hloay I-li-ri; 20đơu tyauq kach nưq, kưq raanq đnoyq dii hmưch trôôch padoh taboon Hêêl Kaxay be aalq ka aduq Lôôk Wơơt Dêh heq jah taayh apôôy, xôq ka gô be xơy panưk gamưh tol kahnier ku adro kadrơy. 21Lunư, dang đaji varơuq heq jah valơk:

“Khơl adro koq jah padoh taboon truh Kadraq yôôych hnoq hloq,

ji khơl adro koq hmưq tameng yôôych hnoq hlolh.”

22Anưq, 'ngưng yưk gô kung heq biq klơl hlê xôq truh dii oh ay. 23Bơh juneq, vii leh măn e aduq đom kaluh dêh neq, đơu vii văch xôq xuum trôôch kajoq truh hlơq oh ay xing 'ngưng xanưm, 24lunưq long tuôôy leq gô dưk hooy truh Tay-ban-nha, gô dik trôôch kajoq, tuôôy hooy dalơh hlê, tavơh oh ay, ji jah oh ay waak rơy truh đnư, atoh droyq dik gô jah hlah xuum dii oh ay đom axit kawah. 25Măn juneq gô đong hooy tol trôôk truh Jê-ru-sa-lem waak ka khơl vah. 26Vii manih Ma-xê-đoan ji A-chai heq hlah xuum dưk dơơp muuyq đơơt tagoop agoop nưq ka khơl adro adrah pangoot katul đom khơl vah aduq theng Jê-ru-sa-lem. 27Bơyh oot heq hlah xuum ji oot laa khơl adro pơq lôôkq khơl adro nưq. Vii atoh kaluh tamooy daak kadrơy jah kung nhonq kaluh vanong danưng kooy ku khơl adro nưq, yôôych oot kung e trek nhiimq hơu varơuq khơl adro nưq truh panưh kông kuah. 28Anưq, tuôôy heq payôôch varơuq neq ji hôôk kajưk kadrool tagoop agoop neq truh dii oot, yôôych gô hnoq dưk hooy dalơh hlê oh ay xôq truh Tay-ban-nha. 29Đơu gô xet đaneq tuôôy truh dii oh ay, gô hnoq truh dii varơuq đu tol vanong ku Lôôk Wơơt Dêh.

30Panưh kadrơy, wơơy oh ay, bơyh Lôôk haay, laa Lôôk Wơơt Dêh Jê-xu, ji bơyh xuum xung xiaq ku Kơy Phool Hiel, gô apôôy xiin oh ay kung damưq dii gô bơơn kaluh apok xadrook apôôy thaay ka gô wih tok Kơy Plêêk, 31xôq gô hnoq ik jah wơơt xok klơlh khơl adro leh tameng tyauq aduq Ju-đê, ji xôq varơuq dơơp ku gô deng ka Jê-ru-sa-lem hnoq ik jah hlah xuum đoonq nhonq xing khơl vah; 32xôq ka bơyh iq trôôch ku Kơy Plêêk, gô hnoq ik truh dii oh ay đom varơuq hlah hlaak, vii jah padơy pado kung dii oh ay. 33Apôôy xiin Kơy Plêêk hrok hrol măn kung dêq hloay oh ay. Amen.