Skip to content
BibleKenya

Cua Bible Literal Text

Rô-ma 14

Panưh kadrơy, dayh đoonq nhonq adro ravoch đom xuum tuôq, leh wih truh varơuq atok xadrah kaluh varơuq koq xet hlolh. Long muuyq kơyq nưq e xuum tuôq xôq xa tôôy thư, bơh adro ravoch yôôych vơ xa kaxeq qwaay. Adro xa te 'yo leh ra kajoq adro leh xa, măn adro leh xa te xưh xadrah adro xa. Vii Kơy Plêêk heq đoonq nhonq dro nưq. Adro xưh xadrah xapok đom hnhư ku adro kadrơy, ay laa kơyq? Adro nưq dưk long gưlh laa đôôyq dii kôôch ku kadih dro nưq. Bơh adro nưq hnoq jah khienq ăm dưk kajưk, vii Lôôk e da uh qwuyen khienq ay nưq dưk kajưk. Long dro neq phon đinq hngơy hơq dii hngơy kadrơy, bơh dro kadrơy yôôych biit tôôy hngơy laa tolh kaxay. Tôôy dro dayh tuôq kajưk đom akoq haay. Adro jư hngơy laa jư vii Lôôk, adro xa laa xa vii Lôôk, vii dro nưq kuh kway Kơy Plêêk, adro leh xa laa leh xa vii Lôôk, dro nưq kung kuh kway Kơy Plêêk. Kơq leh ekơyq đom haay riirh vii kadih haay, ji leh ekơyq kaxêêt vii kadih haay. Bơyh kaah tuôôy haay riirh, laa riirh vii Lôôk, hloay tuôôy haay kaxêêt, laa kaxêêt vii Lôôk. Anưq, kaah tuôôy haay riirh hloay tuôôy haay kaxêêt, yôôych haay raay thuôk xuq Lôôk. Vii xôq jarooy truh varơuq neq, Lôôk Wơơt Dêh heq kaxêêt ji heq laay riirh, xôq Kadraq dơơp Lôôk vơơ ku adro kaxêêt, vơơ ku adro riirh. Bơh ay neq, aleq ay xưh xadrah oh ay haay? Long ay hơq, aleq ay 'yo leh ra kajoq oh ay haay? Vii dêq hloay haay hnoq avlôh xăk kangưưr ngôôy xưh xadrah ku Kơy Plêêk. Bơyh apok heq jah valơk:

“Lôôk xanoh đaneq: ‘Đaji Gô hloay riirh, tôôy takuul hnoq kul kangưưr Gô,

ji tôôy kapiet hnoq xưng nhonq kangưưr Kơy Plêêk.’”

Lunưq, tôôy dro đom haay hnoq tauq vlôh apok đnooy vlôh truh kadih xăk dii Kơy Plêêk.

Jo nưq, haay te liq đnooy xadrah mamuuyq đnoyq, wih hlê, dayh 'yo đinq luneq yơu iaq; leh xôq kuk phơu klơl đơ long kakơq xatôôlh gưlh ka oh ay haay. Gô xet ji jah tuôq kajưk đom Lôôk Jê-xu, đaneq be vâk kajoq bơyh kadih xăk ni laa klơơr 'yêq, đêh vlôh adro leq 'yo hlê thư kajoq nưq laa klơơr 'yêq, yôôych ni laa klơơr 'yêq đôôyq dii dro nưq. Bơyh atoh adro oh ay haay biq dơơp ăm jiq xuum vii kơq tuôông xa, yôôych oh ay leh măn tawaak hooy tyauq xuum xung xiaq đnoyq. Te bơyh tuôông xa ku haay dơơp hư hlơơp adro oh ay nưq, 'ngưq laa dro đơu Lôôk Wơơt Dêh heq kaxêêt thay. Anưq, te xôq varơuq kaxay tamaq ku oh ay biq đnooy ra ơơh. Vii daak dêh ku Kơy Plêêk leh aalq măn tuôông xa ji tuôông hôôch, bơh laa varơuq hyioh jăk ji hrok hrol kung varơuq hlah hlaak đom Lôôk Phool Hiel. Vii kơyq hơu varơuq Lôôk Wơơt Dêh bơơn kach neq yôôych kaxay xuum Kơy Plêêk ji jah 'yo nhonq bơyh koot manih. Lunưq, haay duh charơơk tyauq kaluh varơuq tagu hlê ji kaluh varơuq waak tajưp deng ka mamuuyq. Te phaq pahrưp varơuq dơơp ku Kơy Plêêk vii dong varơuq tuôông xa. Tabơh tôôy vâk laa vah xarêh, bơh laa kadrôôp maroh đôôyq dii adro xa tyauq kach dơơp kơq xatôôlh lôp. Varơuq tolh kaxay laa leh xa ôq kung leh hôôch lok long paq kê varơuq kajoq đơu hlê đnư khienq adro oh ay ku haay xatôôlh gưlh, long biq gưlh lôp, long laa vlôh jêêk ravoch. Kadih xăk oh ay e xuum tuôq luleq, dayh jư xok 'yo muut kadih xăk kangưưr Kơy Plêêk. Vanong hloay laa adro leh kadih atok xadrah xăk đom varơuq xăk 'yo xanưk laa jơq. Bơh muuyq dro heq biq đinq kadrôôp atoh dro nưq heq xa đong tuôôy biit ravơq, vii leh vlôh xing xuum tuôq. Panưh kadrơy, tôôy varơuq đơu leh vlôh xing xuum tuôq yôôych laa kadrôôp.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.