Rô-ma 13

1Tôôy adro muuyq pheq tameng tyauq khơl dro e kaluh qwuyen măn tol haay, vii be kaluh qwuyen leq măn hlê atoh leh bơyh Kơy Plêêk, măn kaluh qwuyen đong e yôôych jah 'yo đinq xing Kơy Plêêk. 2Lunưq, kơyq xôq xăk tachơơl hlê kaluh qwuyen nưq laa tachơơl hlê apok tanưưl ku Kơy Plêêk, đơu khơl adro tachơơl hlê nưq hnoq kadih varơyh xok varơuq xadrah dook ka ni. 3Vii khơl hnhư adrơk qwuyen leh aalq laa varơuq yôq varaal đôôyq dii varơuq kaxay, bơh laa ka varơuq xơuq. Măn oh ay trôôch klơlh pheq yôq khơl adrơk qwuyen nưq be? Dayh dơơp varơuq kaxay, yôôych oh ay hnoq nhonq varơuq vado xing dro adrơk qwuyen, 4Bơyh vii dro nưq laa xapok ku Kơy Plêêk wih truh varơuq kaxay tamaq ka oh ay. Bơh atoh oh ay dơơp varơuq xơk, yôôych dayh yôq varaal, vii oot be adrơk xieh muuyq kach leh e kơq, bơyh oot laa xapok ku Kơy Plêêk, 'ngưq laa manih bla thu xôq đơơt tôq jaraq deng ka adro dưk dơơp varơuq xơuq. 5Kơq nưq, varơuq duh dik laa chiuq tameng tyauq, leh vơ vii đơơt tôq dayh, đơu măn vii kơq xuum klaak. 6Bơyh kung vii varơuq nưq lunưq oh ay noop xơu; kơq oot laa xapok ku Kơy Plêêk, raanq paraat ratuut hloay đôôyq dii ka varơuq dơơp neq. 7Dayh bla ka tôôy adro varơuq haay e lôôkq oot; xơu ka adro xok xơu; phiq ka adro xok phiq; yôq adro đangq pheq yôq; vado adro đangq pheq vado.

8Te elôôkq kơyq paq kê varơuq kajoq, đêh vlôh xung xiaq ka mamuuyq, vii kơyq xiaq manih gah gih yôôych dơơp xaleep ganuun. 9Vii varơuq neq: “Koot te lôp kadrôôp apuq atrăp, koot te păk kaxêêt manih, koot te atôk, koot te hmưch trôôch,” ji atoh măn paq kê apok tanưưl leq kadrơy, yôôych tôôy varơuq nưq jah ruut hlê đom apok neq: “Koot pheq xiaq manih gah gih ku koot đaji kadih koot.” 10Xuum xung xiaq leh dơơp haiq manih gah gih. Anưq, xung xiaq laa varơuq dơơp xaleep ganuun.

11Ji lu nưq, vii xet katuôôy kawat, đaneq heq truh tuôôy ka oh ay pheq kadrăch kah xing vik tawol. Bơyh juneq varơuq wơơt xok ku haay heq jeq iaq taso dii tuôôy haay đơơu tuôq. 12Klôôy heq katul mưng, măn hngơy jeq truh. Anưq, haay duh qwel ka'lăk kaluh varơuq dơơp ku varơuq kamơng jaluk, yôôch hlưp xok aau jaap ku varơuq tađnah. 13Haay duh tawaak hooy kach xưngq dik đaji katul kahngơy, leh xa hôôch ji vuul weel, leh apuq atrăp ji bơyq ba, leh tayaat takaay ji geen 'yarơ. 14Wiit hlê, dayh hlưp xok Lôôk, laa Lôôk Wơơt Dêh Jê-xu, ji te dưk dơơp tyauq xôq vih adroyq ku xăk xamơk wih truh kaluh hmưch trôôch.