Rô-ma 12

1Anưq, wơơy oh ay, bơyh varơuq biit angơuq ku Kơy Plêêk, gô ahmưk nhăk oh ay tơơk tưp ka Kơy Plêêk xăk xamơk oh ay đaji muuyq kuah lêh riirh, vah xarêh, kaxay xuum Kadraq, 'ngưq laa varơuq ayuôôt laat jơq troq ku oh ay. 2Ji te chiuq rôp khwuôôn tyauq đơơy neq, bơh dayh jah tađôôy đơơu xing varơuq tađôôy đơơu ku xuum biit, xôq oh ay kahra ik varơuq leq laa iq trôôch tolh tamaq, kaxay xuum, ji xaleep ku Kơy Plêêk.

3Vii gamưh vanong plêêk heq jah kahniq ka gô, gô xiin đnooy dii tôôy adro măn katul đom oh ay te liq biit truh xăk galơh iaq varơuq pheq biit, tađôôy muut đnư laa 'yo hlê xôq khôôt xet jư xăk, tyauq đaji Kơy Plêêk heq phon ahlook muuyq nưh tyauq xuum tuôq ka tôôy dro. 4Bơyh pheq đnooy đaji haay e 'ngưng xăk xamơk đom muuyq xăk, bơh dêq hloay kaluh xăk xamơk leh e kung muuyq varơuq dơơp, 5yôôych tyauq kach dang anưq, 'ngưng dro haay laa muuyq xăk đom Lôôk Wơơt Dêh, đơu tôôy muuyq adro laa xăk xamơk ku mamuuyq. 6Bơh haay e kaluh kadrool vanong kaxay đêh raa 'yo tyauq vanong plêêk heq jah kahniq ka haay: e be laa vanong đnooy hlit, yôôych dưk dơơp 'yo tyauq đaji xuum tuôq; 7e be laa vanong hơu varơuq, yôôych dưk dơơp đom varơuq hơu varơuq; e be laa vanong pato dayq, yôôych dưk dơơp đom varơuq pato dayq; 8e be laa vanong ahmưk nhăk, yôôych dưk dơơp đom varơuq ahmưk nhăk; vanong kahniq ăm, yôôych dưk dơơp bơơn varơuq ranưh ranơơy; vanong dưk xanok, yôôych dưk dơơp bơơn varơuq dêq xuum; vanong kahnoq xuum biit angơuq, yôôych dưk dơơp bơơn varơuq hlah hlaak.

9Xung xiaq yôôych leh dơơp bôô, vii 'yo ramêq varơuq xơk, jư xăk tagu dii varơuq kaxay; 10ji varơuq xung xiaq deng ka mamuuyq đom xuum xung xiaq oh ay; dơơp ramil ka mamuuyq đom varơuq 'yo vado; 11laa leh takôô alah đom varơuq talăng jăk; tôq jaq đom xuum klaak; hơu varơuq Lôôk; 12hlah hlaak đom takôô gamưh; atuq xuum đom pơơl dal; kajưk xuum đom varơuq xadrook apôôy; 13waak tajưp kaluh varơuq duh ku khơl vah; tavooy tyauq xuum xung tamooy. 14Dayh apôôy vanong ka khơl adro rôp toop oh ay; dayh apôôy vanong ji te karoay axaap; 15xôq hlah kung dii khơl adro hlah; xôq nhim kung dii khơl adro nhim; 16tuôôy e kung muuyq xuum biit deng ka mamuuyq, leh e xuum biit katơơk galơh, bơh laa chiuq 'yo nhonq khơl adro axit xet. Te vlôh jêêk khôôt kheoq ganưq tol kadih haay; 17tuôôy leh bla hlê varơuq xơk bơơn varơuq xơk ka paq kê kơyq, tabông 'yo kaluh varơuq kaxay tamaq kangưưr tôôy dro; 18atoh hnoq ik, ka aduq leq thuôk xuq haay, yôôych jư 'yo varơuq tagu dii tôôy dro; 19oh ay xung xiaq lơơy, te kadih haay bla thu, bơh dayh xôq aduq ka đơơt tôq jaraq ku Kơy Plêêk, vii varơuq heq jah valơk: “‘Varơuq bla thu deng ka Gô; Gô hnoq bla dook,’ Lôôk đnooy anưq.”

20“Lunư, atoh adro tachơơl oh ay e pangoot, dayh ăm ni xa.

Atoh dro nưq thaal, dayh ăm ni hôôch.

Vii tuôôy dơơp anưq, oh ay hnoq đum kheng ôôlh dôôp tol akoq ni.”

21Te xôq haay biq tameng tyauq xing varơuq xơuq, bơh dayh jah jay varơuq xơuq bơơn varơuq kaxay.