Rô-ma 11

1Anưq gô xiin vôôch: Dang leq Kơy Plêêk heq chôôyq ka'lăk tamooy Kadraq? Varơuq nưq leh xalih vlôh ik. Vii kadih xăk gô kung laa muuyq adro I-sơ-ra-ên, xing adrơơk nooy Ap-ra-ham, thuôk adrơơk tamooy Bên-ja-min. 2Kơy Plêêk heq leh chôôyq ka'lăk tamooy Kadraq, laa tamooy Kadraq heq xet adroyq. Long oh ay be xet Rahlăp Vah đnooy kajoq truh Ê-li, tuôôy kơy apôôy padoh dii Kơy Plêêk tachơơl hlê tamooy I-sơ-ra-ên? 3“Kuh Lôôk, oot heq păk kaxêêt khơl hnhư hlit Kadraq, oot heq pahyaak ka'lăk para hơu Kadraq, kung vơ muuyq adro koot măn jah riirh, ji oot đong hooy axek păk kaxêêt koot.” 4Bơh apok tơơl thiêêng liêng xanoh kung kơy laa kajoq? “Gô heq xôq deng ka Gô pơh ravơu khơl kanau, laa khơl adro heq be kul takuul kangưưr Ba-anh.” 5Anưq kung tyauq kach nưq đom tuôôy kawat juneq, ka'leq nưq măn muuyq phon sook hlê tyauq varơuq rơơlh xok ku vanong plêêk. 6Bơh atoh bơyh vanong plêêk, yôôych be aalq bơyh varơuq dơơp đnoyq. Atoh leh, vanong plêêk leh măn laa vanong plêêk. 7Anưq laa đaleq? Varơuq đơu manih I-sơ-ra-ên axek akhiim, yôôych manih nưq heq leh varơyh jah ni, đơu adro leq jah rơơlh yôôych varơyh jah, bơh sôôq măn hlê heq biq găk xuum, 8đaji varơuq heq jah valơk, đaneq: “Kơy Plêêk heq kahniq ka oot danưng kooy vlô khưrq, mot be hloq, tôôr be tameng, ăm truh hloay hngơy neng.” 9Ji Đa-vik yôôych đnooy:

“Dayh xôq apoop para ku oot vlôh jêêk lươyq, xađook,

kuk phơu xatôôlh jôôk ji varơuq bla dook deng ka oot.

10Dayh xôq mot oot biq apul jaluk xôq be hloq,

ji dayh dơơp karok oot kưq gong kadônq hloay.”

11Anưq, gô xiin vôôch: “Dang aleq oot heq xatôôlh gưlh xôq yôôch gưlh riêp?” Varơuq nưq leh xalih vlôh ik. Tađôôy muut đnư, bơyh varơuq gưlh lôp ku oot, varơuq wơơt xok truh dii tamooy kadrơy, xôq dơơp ka oot 'yarơ jaraq. 12Panưh kadrơy, atoh varơuq gưlh lôp ku oot jarooy truh varơuq karoh e ku dêh araak, ji varơuq be jay ku oot jarooy truh varơuq karoh e ku khơl tamooy daak kadrơy, yôôych varơuq xaleep ku oot hnoq kang karoh e raah jôh iaq xet dong leq? 13Măn juneq, gô xiin đnooy dii oh ay laa khơl tamooy daak kadrơy. Anưq, kang bơyh vii kadih xăk gô laa khơl jah rơơlh ka khơl tamooy daak kadrơy, gô xok dơơp tađnah tađnaak truh varơuq dơơp ku gô, 14xôq long bơơn kach leq nưq, gô hnoq ik dơơp ka tamooy tyauq phon xăk ku gô 'yarơ jaraq ji hnoq ik wơơt ik muuyq sôôq dro xing aduq oot. 15Vii atoh varơuq chôôyq ka'lăk ku oot jarooy truh varơuq tagu hlê ku dêh araak, yôôych varơuq oot tiip nhonq hnoq đaleq atoh leh aalq laa varơuq riirh vlôh xing aduq kaxêêt? 16Panưh kadrơy, atoh phon bôôt droyq dik laa vah, yôôych dêq đum bôôt nưq kung đanưq. Ji atoh rayah laa vah, yôôych kaluh đook kung anưq. 17Bơh atoh muuyq sôôq đook heq biq gôh hlơơp, măn oh ay, tuôôy laa đook ô-liu gôk, heq jah tabôk muut đom aduq oot, ji heq vlôh jêêk khơl adro kung nhonq jor riirh galaay viik xing rayah ku ưk ô-liu nưq, 18yôôych te pa ưưt xăk galơh iaq kaluh đook kadrơy. Bơh long oh ay pa ưưt akhwoak, yôôych văch đaneq leh aalq kadih xăk oh ay chiuq văch rayah ưk, đơu laa rayah ưk chiuq văch oh ay. 19Anưq yôôych, oh ay hnoq đnooy: “Kaluh đook nưq heq biq gôh ka'lăk, xôq kadih gô hnoq ik jah tabôk muut.” 20Jơq anưq! Oot heq biq gôh ka'lăk bơyh varơuq leh tuôq, măn kadih oh ay yôôych dưk kajưk gamưh xuum tuôq. Te wih truh kaluh iq biit katơơk galơh, đơu dayh yôq varaal! 21Vii atoh Kơy Plêêk heq leh laay ka'lăk kaluh đook tyauq ka chăk tưq nhiên hơq, yôôych Kadraq kung hnoq be laay ka'lăk oh ay. 22Anưq, dayh 'yo xet xuum hwêêt ji varơuq ngiim khăk ku Kơy Plêêk: long varơuq ngiim khăk đôôyq dii khơl adro heq xatôôlh gưlh, bơh xuum hwêêt ku Kơy Plêêk deng ka oh ay, atoh oh ay kưq măn đom varơuq xuum hwêêt Kadraq. Bơơn leh, kadih oh ay kung hnoq biq goch ka'lăk. 23Măn khơl adro hơq kung anưq, atoh oot leh raxôôt ratuôôt đom varơuq leh tuôq, yôôych oot hnoq ik tabôk muut. Bơyh Kơy Plêêk e da uh xôq tabôk oot muut hlê. 24Vii atoh oh ay heq biq dool klơlh muuyq ưk ôôlh tyauq ka chăk laa ưk ô-liu gôk, ji heq jah tabôk đêh dii trôôk tưq nhiên muut ưk ô-liu kaxay, yôôych khơl adro nưq, 'ngưq laa khơl adro tyauq ka chăk tưq nhiên, hnoq kang jah tabôk muut ưk ô-liu ku kadih ni 'ngưng iaq xet dong leq?

25Vii oh ay lơơy, gô leh trôôch oh ay be xet truh varơuq kadook neq, xôq oh ay leh e varơuq khôôt xet tyauq kadih xăk oh ay, bơyh varơuq găk xuum vlôh xing muuyq phon tamooy I-sơ-ra-ên heq xalih vlôh, dong truh tuôôy đu sôôq kaluh manih daak kadrơy anguk muut; 26ji đanưq, dêq I-sơ-ra-ên hnoq jah wơơt, đaji heq jah valơk đaneq:

“Kơy wơơt xok hnoq truh xing Si-ôn;

Kadraq hnoq ka'lăk vlôh kaluh varơuq xơk aak vlôh klơlh Ja-kôp.

27Ji nưq laa apok tavek xing aduq Gô deng ka oot,

tuôôy Gô hnoq taway ka'lăk kadrôôp maroh ku oot.”

28'Yo tyauq Hêêl Kaxay, oot laa adro tachơơl vii kơq ka ich ku oh ay, bơh tyauq varơuq rơơlh xok, yôôych oot laa manih jah xung xiaq vii kơq khơl mo kơy ku oot. 29Jo kaluh vanong kaxay ji varơuq taayh tawooyh ku Kơy Plêêk laa kaluh varơuq leh ik tađôôy. 30Vii pheq đnooy đaji kadih oh ay tuôôy adroyq heq leh tameng Kơy Plêêk, đơu neq heq jah biit angơuq aduq varơuq leh tameng ku khơl adro neq, 31yôôych kung đanưq, khơl adro neq juneq heq leh tameng aduq varơuq biit angơuq oh ay, xôq juneq oot kung hnoq ik jah biit angơuq. 32Vii Kơy Plêêk heq karuk tôôy adro đom varơuq leh tameng, xôq Kadraq hnoq ik kahnoq xuum biit angơuq tôôy dro. 33Ôôy, tolh dik pi jaruq truh varơuq karoh e ji varơuq khôôt kheoq kung varơuq hlolh xet ku Kơy Plêêk! Luleq kaluh xưh xadrah ku Kadraq leh hnoq 'yo xadrah, ji trôôk daak Kadraq leh hlolh xet ik!

34Vii, “Kơyq heq xet xuum biit ku Lôôk?

Long kơyq heh vlôh jêêk adro đnooy pato ku Kadraq?

35Long kơyq heq ăm Kadraq adroyq,

yôôch hnoq jah Kadraq bla hlê?”

36Vii tôôy paroh vlôh xing Kadraq, gamưh muut Kadraq, ji wih xuq Kadraq. Tađnah tađnaak thuôk xuq Kadraq dong truh đơơy đơơy. Amen.