Rô-ma 10

1Wơơy oh ay, xuum ưng trôôch đom xuum gô ji apok apôôy vôôch ku gô dii Kơy Plêêk thay ka oot laa xôq oot e varơuq wơơt xok. 2Bơyh gô dơơp xanưk truh oot đaneq oot e xuum talăng jăk đôôyq dii Kơy Plêêk, bơh leh tyauq varơuq hlolh xet troq jơq. 3Jo be nhonq xet varơuq hyioh jăk ku Kơy Plêêk, ji raanq paraat xôq dơơp vlôh varơuq hyioh jăk ku đêh oot, lunưq oot heq leh chiuq tameng 'laarq varơuq hyioh jăk ku Kơy Plêêk. 4Vii Lôôk Wơơt Dêh laa varơuq dơơp payôôch iq đinq ku ganuun xôq jarooy truh varơuq hyioh jăk ka tôôy dro e xuum tuôq. 5Bơyh Môi-se valơk truh varơuq hyioh jăk vlôh xing ganuun, đaneq: “Adro leq heq dơơp tyauq kaluh varơuq neq, yôôych adro nưq gamưh đnư hnoq riirh.” 6Bơh varơuq hyioh jăk bơyh xuum tuôq đnooy luneq: “Te đnooy đom xuum xăk đaneq: ‘Kơyq hnoq tok truh plêêk?’ (iq laa, xôq taway Lôôk Wơơt Dêh pôôt); 7Long: ‘Kơyq hnoq pôôt truh bơk jaruq?’” (iq laa, xôq taway Lôôk Wơơt Dêh tok xing aduq kaxêêt.) 8Wih hlê, varơuq nưq đnooy luleq? “Apok măn jeq koot, đom huuy koot ji đom xuum koot.”

Nưq laa apok xuum tuôq đơu 'wot đnooy avlôh. 9Vii atoh oh ay xưng nhonq Jê-xu laa Lôôk bơơn vel huuy oh ay, ji oh ay tuôq đom xuum oh ay đaneq Kơy Plêêk heq khienq Kadraq riirh hlê xing aduq kaxêêt, oh ay hnoq jah wơơt. 10Vii kơyq bơyh xuum tuôq gamưh yôôych jarooy truh varơuq hyioh jăk, măn kơyq bơyh huuy xưng nhonq yôôych jarooy truh varơuq wơơt xok. 11Vii Rahlăp Vah đnooy: “tôôy adro tuôq aduq Kadraq hnoq leh biq kamưưl.” 12Bơyh be e varơuq phon aklah katul manih Jo Thaiq ji manih Hi Lap; vii kung muuyq Kơy laa Lôôk ku dêq hloay, karoh ơơn đôôyq dii dêq hloay khơl leq taayh apôôy Kadraq. 13Vii “tôôy dro, 'ngưq laa paq kê kơyq heq apôôy taayh yal Lôôk, hnoq jah wơơt.” 14Anưq yôôych, bơơn kach leq oot hnoq ik taayh apôôy truh Kơy đơu oot koq tuôq? Yôôch dơơp aleq oot hnoq ik tuôq Kơy đơu oot koq tameng? Đơu dơơp đaleq oot hnoq ik tameng tuôôy leh e manih padoh taboon? 15Bơh khơl dro nưq padoh taboon đaleq atoh oot leh jah patăk dăt? Đaji apok heq jah valơk, đaneq: “Pla jôôk ku khơl adro padoh taboon hêêl kaxay tamaq kaxay xet dong leq!”

16Lunư, leh aalq dêq hloay heq tameng tyauq Hêêl Kaxay. Vii Ê-sai tơơl: “Kuh Lôôk, kơyq heq tuôq apok đnooy padoh ku 'wot?” 17Lunưq, xuum tuôq truh xing varơuq tameng, đơu varơuq tameng nưq gamưh hlê apok ku Lôôk Wơơt Dêh. 18Bơh, gô xiin vôôch: “Dang leq laa oot heq leh tameng ik?” Tol dong dik yôôych,

“Xarooy ku khơl adro nưq heq ahna vlôh truh loch vari,

ji apok ku oot truh kaluh aduq lôôch dik ku dêh araak.”

19Long anưq, gô xiin vôôch: “Dang aleq laa manih I-sơ-ra-ên heq leh nhonq vlôh?” Adroyq dik, Môi-se đnooy:

“Kadih Gô hnoq dơơp ka êêp 'yarơ jaraq bơyh khơl adro leh aalq laa muuyq tamooy.

Gô hnoq tache ka êêp tôq jaraq bơơn muuyq tamooy be e varơuq hlolh xet.”

20Yôôch Ê-sai xok dơơp kalh paraat, ji kơy đnooy:

“Gô heq jah tavơh bơyh khơl adro be axek akhiim Gô,

Gô heq duh kahnoq vlôh ka khơl adro be apôôy vôôch Gô.”

21Măn dii manih I-sơ-ra-ên, Kadraq xanoh: “Tuôôt ka hngơy, Gô tơơk ti gô vlôh wih truh muuyq tamooy leh tameng ji tachơơl hlê.”