Khaih-hwuyên 9

1Yôôch yaak plêêk thưq dăp klôôp keeng, yôôych gô hloq muuyq poop xalok xing plêêk heq klêh pôôt vari, ji gay kal raluk jaruq ku huuk leh e kalek heq jah kahniq ka ni. 2Ni luh raluk jaruq ku huuk leh e kalek vlôh, yôôych 'nhuuy xing raluk jaruq tapol tok đaji 'nhuuy ku muuyq loo ôôlh kôt, ji mot hngơy kung không khiq raay biq kamơng hlê jo aduq 'nhuuy ku raluk jaruq neq. 3Yôôch xing 'nhuuy nưq, bơy lêêp pachaay vlôh tol vari, ji qwuyen jah kahniq ka bơy lêêp dang đaji qwuyen paroh ding dip e tol vari. 4Apok jah patăk ka bơy lêêp nưq laa ni leh dơơp hư rek tol vari long kaluh ưk kaxeq long ưk ôôlh leq, đơu vơ dơơp haiq koot manih, laa khơl adro leh e dơuq ku Kơy Plêêk tol ngưưl oot. 5Varơuq jah pahnăp ka bơy lêêp nưq laa ni leh ik păk kaxêêt oot, lunư oot hnoq biq dơơp ra ơơh đom dăp xiêk, ji đơơt dơơp ra ơơh tol oot dang đaji varơuq dơơp ra ơơh xing ding dip tuôôy ni đeet oot. 6Đom kaluh hngơy nưq, oot hnoq axek trôôk kaxêêt, bơh oot kajưk dik hnoq leh axek jah ni, ji oot hnoq trôôch kajoq jah kaxêêt, đơu varơuq kaxêêt yôôych chuh xangưưy klơlh oot. 7Xăk ku bơy lêêp dang đaji ôô ahleh ralauq xôq vlôh tahmơt. Tol akoq bơy lêêp laa thưq kajoq nưq dang đoat tađnah dang đaji đôô bơơn vajang, măn mamưưt bơy lêêp yôôych dang mamưưt manih. 8Bơy lêêp e hlôôk đaji hlôôk khơl drê, ji kaneeng ni yôôych dang đaji ku ôô vomq. 9Bơy lêêp e jaap đơ tada dang đaji jaap bơơn maam, ji hnưm panưr ku bơy lêêp dang đaji hnưm ku kaluh xe ôô ahleh, ku 'ngưng poop ôô ahleh đong charuyh muut tahmơt. 10Bơy lêêp e hlooy dii nok đeet dang ding dip, ji paraat kalh ku ni đom kaluh hlooy ni xôq dơơp ra ơơh khơl drơy đom dăp xiêk. 11Bơy lêêp e vuua măn tol oot laa kamuuych ku huuk leh e kalek. Anơng ni đom apok Hi-baq-lai laa A-ba-đôn, măn đom apok Hi Lap, ni e anơng laa A-bô-li-ôn.

12Đơơt pơơl dal thưq nhưk heq dalơh yôôch. 'Yo hơq, măn e vaarq đơơt pơơl dal đnoyq đong truh atêq kaluh varơuq neq.

13Yôôch yaak plêêk thưq drơu klôôp keeng, ji gô tek muuyq apok đnooy vlôh xing kaluh akê ku para hơu bơơn vajang măn kangưưr Kơy Plêêk, 14đnooy ka yaak plêêk thưq drơu, laa kơy đong e poop keeng: “Dayh luh poot yaak plêêk 'miêh biq vek aduq daak kôt Ơ-phơ-rat.” 15Nưq laa poot yaak plêêk, laa khơl kơy heq jah ralauq xôq 'miêh muut klip wat, hngơy, xiêk, xanưm nưq, jah luh vlôh xôq ka oot hnoq ik păk kaxêêt muuyq phon pe manih araak. 16Sôôq kuun acho ôô ahleh laa vaarq hreek waan; Gô heq tameng kasôôq ku oot đanưq. 17Ji đom varơuq ăm xet adroyq, gô heq hloq bơy ôô ahleh ji khơl adro acho tol ôô ahleh đaji luneq — e jaap đơ tada dôôp rưk, ji phôôm adriilh pariaq, kung phôôm drêêk ku lưưu hwinh. Akoq kaluh ôô ahleh neq yôôych dang đaji akoq ôô vomq, xing huuy oot klôôp vlôh ôôlh, 'nhuuy ji lưưu hwinh. 18Muuyq phon pe manih araak biq păk kaxêêt jo aduq pe pơơl dal neq, bơyh ôôlh, 'nhuuy, ji lưưu hwinh phuun vlôh xing huuy oot. 19Vii paraat kalh ku bơy ôô ahleh laa măn aduq huuy oot ji aduq hlooy oot, jo hlooy oot dang đaji volh e akoq, ji bơyh nưq oot dơơp xưr xôôh khơl drơy. 20Phon măn hlê ku manih araak, laa khơl adro koq biq păk kaxêêt bơyh kaluh pơơl dal neq, heq leh wiit xuum truh kaluh varơuq dơơp ku ti oot xôq ka oot hnoq leh kuh ayuôôt kamuuych kung kaluh vangưl bơơn vajang, baak, đông, phơu, ji gay, laa kaluh thưq be hnoq ik 'yo hloq long tameng tek long hooy ik. 21Oot kung leh wiit xuum truh kaluh kadrôôp păk kaxêêt manih, đơơp đok, apuq atrăp bơyq ba, long kadrôôp xa atôk ku oot.