Skip to content
BibleKenya

Cua Bible Literal Text

Khaih-hwuyên 10

Atêq nưq, gô hloq muuyq yaak plêêk paraat kalh kadrơy xing tol plêêk pôôt, jah pahlưp muut muuyq đum kluk, dii mo adreek tol akoq kơy, mamưưt yaak plêêk nưq đaji mot hngơy, jôôk ku kơy nưq yôôych đaji gok ôôlh, ji đong jư đom ti kơy muuyq rahlăp jơyq de heq luh vlôh. Yaak plêêk nưq xôq jôôk akoh kơy tol tahli, măn jôôk akeng tol vari, yôôch taayh atok muuyq apok kôt dang đaji ôô vomq ook. Tuôôy yaak plêêk nưq taayh kôt, yôôych pơh hnưm kơy kata ahna atok dii kaluh apok đnooy ku oot. Tuôôy pơh hnưm kata ahna vlôh, gô xung valơk hlê, yôôych gô tek muuyq apok đnooy xing plêêk, xanoh: “Dayh đongq dơuq kal kwat kaluh kajoq pơh apok kơy kata heq đnooy, lunưq te valơk oot hlê.” Yôôch yaak plêêk, đơu gô hloq dưk tol tahli ji tol vari, tơơk ti akoh kơy tok plêêk ji paleek bơơn yal Kơy riirh dong truh đơơy đơơy, miet miet, laa Kơy heq panưk jêêk plêêk kung tôôy thưq tol plêêk, vari kung tôôy thưq tol vari, ji tahli kung tôôy thưq đom tahli, đaneq: “Hnoq paq măn e kawat leq đnoyq. Bơh muut kaluh hngơy e hnưm ku yaak plêêk thưq pơh, tuôôy kơy nưq jeq klôôp keeng, yôôych varơuq kadook ku Kơy Plêêk hnoq jah jêêk yuôôr, dang đaji Kadraq heq đnooy vlôh hêêl hlah nưq ka xapok Kadraq laa khơl hlit.” Yôôch apok đơu gô tameng xing plêêk laay xanoh dii gô, đaneq: “Dayh hooy, xok rahlăp jơyq heq luh vlôh đom ti ku yaak plêêk đong dưk tol tahli ji tol vari.” Nưq laa gô truh dii yaak plêêk nưq, đnooy kơy nưq ăm ka gô rahlăp jơyq de. Yaak plêêk nưq dăt gô: “Dayh nhonq xok ji xa ni yơu, yôôch ni hnoq khienq klaak ay biq pahlăk, bơh đom huuy ay, ni hnoq ngưưm đaji daak hluut.” Gô nhonq xok rahlăp jơyq de xing ti ku yaak plêêk ji xa ni, ni măn đom huuy gô ngưưm đaji daak hluut, đơu tuôôy gô heq xa ni, klaak gô biq pahlăk. Yôôch 'ngưng apok đnooy dii gô: “Ay duh pheq đnooy hlit yưk tra truh 'ngưng tamooy, 'ngưng daak dêh, kaluh apok thêêk, ji vuua padrok.”

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.