Skip to content
BibleKenya

Cua Bible Literal Text

Khaih-hwuyên 8

Tuôôy Trưưu Koot luh dơuq kal kwat thưq pơh, e varơuq hnhep tol plêêk đom kawah panoot wat. Yôôch gô hloq pơh kơy yaak plêêk, đơu oot dưk kangưưr Kơy Plêêk, ji pơh poop keeng jah ăm ka oot.

Muuyq yaak plêêk kadrơy truh, adrơk dooy kahlơu bơơn vajang, dưk aduq para hơu, ji 'ngưng kahlơu jah kahniq ka yaak plêêk nưq xôq hnoq ik tơơk tưp achung dii kaluh apok apôôy ku tôôy khơl vah tol para hơu bơơn vajang măn kangưưr ngaai. 'Nhuuy kahlơu, kung dii apok apôôy ku khơl vah, xing ti kơy yaak plêêk pơl tok kangưưr Kơy Plêêk. Yaak plêêk xok dooy kahlơu, ji galôp viik ni bơơn ôôlh ku para hơu, yôôch taweek pôôt vari, yôôych e kaluh hnưm kơy jaru kata, hnưm garung garung, kablek tađnah, kung ahrưng vari.

Yôôch pơh yaak plêêk e pơh poop keeng ralauq xôq kadih oot xôq oot hnoq ik klôôp.

Yaak plêêk thưq nhưk klôôp keeng, yôôych e jit parier ji ôôlh aluq dii vahaap kađnih pôôt vari, yôôch muuyq phon pe vari biq vuh jaq, muuyq phon pe ưk gay biq vuh jaq, ji dêq hloay rek adriilh biq vuh jaq. 1

Yaak plêêk thưq vaarq klôôp keeng, yôôych e kajoq nưq dang đaji ngok đoot kôt jaq rahưk đom ôôlh biq taweek pôôt tahli, yôôch muuyq phon pe ku tahli jêêk vlôh vahaap, muuyq phon pe kaluh kajoq e varơuq riirh đom tahli raay kaxêêt, ji muuyq phon pe tau ge biq pahyaak ka'lăk.

Yôôch yaak plêêk thưq pe klôôp keeng, yôôych muuyq xalok thier kôt, jaq rahưk đaji gooy xanorq, kađnih pôôt xing tol plêêk, ji ni kađnih pôôt tol muuyq phon pe daak tavook ji tol alook daak. Anơng ku xalok nưq jah taayh laa Vagaak Pahlăk. Muuyq phon pe kaluh alook daak jêêk vlôh vagaak pahlăk, ji 'ngưng dro kaxêêt jo aduq daak neq vii ni heq jêêk vlôh pahlăk.

Yôôch yaak plêêk thưq poot klôôp keeng, yôôych muuyq phon pe mot hngơy biq hmơt, kung dii muuyq phon pe xiêk ji muuyq phon pe kaluh xalok, xôq ka muuyq phon pe ku oot biq kamơng jaluk, lunưq dêh hngơy dii muuyq phon pe ku ni leh e xaraar tađnah, ji dêh klôôy kung anưq.

Yôôch gô 'yo, ji gô tek muuyq poop xêêp kalaak kôt 2 đong pơl tol lawah plêêk kôt apok đnooy tok: “Ra ơơh hloay, ra ơơh hloay, ra ơơh hloay ka khơl adro riirh 'laarq vari, tuôôy măn e taleq hnưm keeng ku pe kơy yaak plêêk jeq klôôp tok.”

Source notes (2)
  1. Footnote Muuyq sôôq rahlăp hnhư iaq ka'lăk apok: muuyq phon pe ưk gay biq vuh jaq.
  2. Footnote Muuyq sôôq rahlăp xok apok Yaak plêêk thêq ka Xêêp kalaak kôt.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.