Khaih-hwuyên 7

1Atêq varơuq nưq, gô hloq poot yaak plêêk măn dưk poot muum vari, jư kajưk poot ngưưr khiel ku vari xôq khiel leh klôôp tol vari, long tol tahli, long tol ưk gay leq. 2Yôôch gô hloq muuyq yaak plêêk kadrơy hooy tok xing ngưưr mot hngơy vlok, đong adrơk dơuq ku Kơy Plêêk hloay riirh. Kơy kôt apok taayh poot kơy yaak plêêk, laa khơl kơy đơu qwuyen heq jah kahniq ka oot xôq dơơp pahư vari ji tahli, 3đaneq: “Te dơơp pahư vari, long tahli, long ưk ôôlh, dong truh tuôôy haay heq hnoq ik đongq dơuq khơl xapok ku Kơy Plêêk haay măn tol ngưưl ku oot.” 4Gô tameng sôôq manih jah đongq dơuq laa muuyq hreek poot kưl poot ravơu, 'ngưq laa khơl dro jah đongq dơuq xing aduq tôôy adrơơk koot xau I-sơ-ra-ên:

5xing adrơơk Ju-đa, kưl vaarq ravơu manih jah đongq dơuq;

xing adrơơk Ru-bên, kưl vaarq ravơu;

xing adrơơk Gat, kưl vaarq ravơu;

6xing adrơơk A-se, kưl vaarq ravơu;

xing adrơơk Nep-ta-li, kưl vaarq ravơu;

xing adrơơk Ma-na-se, kưl vaarq ravơu;

7xing adrơơk Si-mê-ôn, kưl vaarq ravơu;

xing adrơơk Lê-vi, kưl vaarq ravơu;

xing adrơơk I-sa-ka, kưl vaarq ravơu;

8xing adrơơk Sa-bu-lôn, kưl vaarq ravơu;

xing adrơơk Jô-sep, kưl vaarq ravơu;

xing adrơơk Bên-ja-min, kưl vaarq ravơu manih heq jah đongq dơuq.

9Atêq kaluh varơuq nưq, gô 'yo hloq, ji hơq, muuyq bing manih thier karôp đơu leh e kơyq hnoq jauq ik bing karôp nưq, truh xing tôôy daak dêh, kaluh adrơơk, kaluh tamooy ji apok athêêk, đong dưk kangưưr ngaai ji kangưưr Trưưu Koot, tuôôy jah hlưp aau yơơt ko, ji kaluh đook gay cha laa đom ti oot, 10yôôch oot đnooy kôt apok, đaneq:

“Varơuq wơơt xok thuôk axuq Kơy Plêêk haay, Kơy đong 'ngôôy tol ngaai, ji thuôk xuq Trưưu Koot!”

11Nưq laa dêq hloay yaak plêêk đong dưk rawiit ngaai kung khơl draq ji poot poop ôô raay kul xagul mot oot pôôt kangưưr ngaai đơu kuh ayuôôt Kơy Plêêk, 12đaneq:

“Amen! Varơuq ayuôôt laat, tađnah tađnaak, khôôt xet, kuh kway, jah vado, taay yaak, kung paraat kalh raay thuôk xuq Kơy Plêêk haay dong truh đơơy đơơy, miet miet! Amen!”

13Yôôch muuyq đom khơl draq đnooy dii gô, đaneq: “Khơl dro jah hlưp aau yơơt ko hơq — oot laa kơyq, ji oot xing leq truh?” 14Gô đnooy kung kơy: “Kuh lôôk gô, kadraq xet varơuq neq.” Yôôch, kơy nưq đnooy dii gô: “Neq laa khơl dro heq truh xing Đơơt Pơơl Dal Kôt, oot heq arôôh aau yơơt oot, ji dơơp oot jêêk ko đom vahaap Trưưu Koot.

15Vii kakơq neq, oot jah măn kangưưr ngaai Kơy Plêêk,

klôôy hngơy ayuôôt laat Kadraq đom hnhư hơu Kadraq.

Ji Kơy 'ngôôy tol ngaai hnoq panưk raap măn tol oot.

16Oot hnoq paq măn pangoot đnoyq, kung hnoq paq măn thaal đnoyq,

mot hngơy long dêq hloay xal tôq leq, hnoq leh e 'leq huur vuh oot,

17Vii Trưưu Koot, Kơy măn katul ngaai, hnoq xakaq 'yo oot,

Kadraq hnoq jarooy oot truh alook daak varơuq riirh,

ji Kơy Plêêk hnoq 'nhuôôt kateh dêq tôôy daak mot klơlh mot oot.”