Khaih-hwuyên 6

1Yôôch gô 'yo hloq tuôôy Trưưu Koot luh muuyq đom pơh dơuq kal kwat, ji gô tek muuyq đom poot poop ôô đnooy đaji hnưm kơy jaru, đaneq: “Dayh truh!” 2Nưq laa gô 'yo hloq ji hơq, muuyq poop ôô ahleh ko! Manih acho tol ôô ahleh nưq e muuyq poop nook, ji muuyq đoat tađnah jah kahniq ka ni, yôôch dro nưq hooy vlôh đaji dro heq jay xôq jah jay.

3Tuôôy Trưưu Koot luh dơuq kal kwat thưq vaarq, gô tameng poop ôô thưq vaarq dăt: “Dayh truh!” 4Nưq laa muuyq poop ôô ahleh kadrơy rama vlôh, phôôm dôôp đaji ôôlh. Đôôyq dii manih acho tol ôô ahleh neq yôôych heq jah kahniq ka ni qwuyen xok hlơơp varơuq tagu klơlh vari, xôq khơl drơy hnoq păk kaxêêt mamuuyq, ji muuyq poop xieh thier kôt heq jah kahniq ka dro nưq.

5Tuôôy Trưưu Koot luh dơuq kal kwat thưq pe, gô tameng poop ôô thưq pe đnooy: “Dayh truh!” Nưq laa gô 'yo hloq ji hơq, muuyq ôô ahleh ju, ji dro acho tol ôô ahleh neq e muuyq poop kon tol ti ni. 6Yôôch gô tameng đaji e xarooy măn katul poot poop ôô, đaneq: “Muuyq hlơk va away dii muuyq đơ-ni-ê; pe hlơk va away dii muuyq đơ-ni-ê. Ji te đungq truh jơu ji lok.”

7Tuôôy Trưưu Koot luh dơuq kal kwat thưq poot, gô tameng apok ku poop ôô thưq poot đnooy: “Dayh truh!” 8Nưq laa gô 'yo hloq ji hơq, muuyq ôô ahleh adriilh paal. Adro acho tol ôô ahleh neq, anơng ni laa Varơuq Kaxêêt, ji âm phuh kung hooy tyauq atêq ni. E qwuyen măn tol muuyq phon poot raak vari heq jah kahniq ka oot, xôq păk kaxêêt bơơn xieh jaauq, pangoot hrah, jich bingq, ji bơyh kaluh ôô kadumq tol vari.

9Tuôôy Trưưu Koot luh dơuq kal kwat thưq dăp, gô hloq 'laarq para hơu phool hiel ku khơl dro heq biq păk kaxêêt vii apok ku Kơy Plêêk ji vii apok xanưk đơu oot heq jư. 10Oot kung xarooy taayh kôt đaneq: “Kuh Kơy Chuh Têêh, Kơy hlăng vah ji dong dik, dong truh tuôôy leq đơu Kadraq măn koq xưh xadrah ji bla kadrôôp ka vahaap ku 'wot koot xing khơl adro măn riirh tol vari?” 11Yôôch tôôy dro đom oot jah kahniq ăm muuyq aau yơơt ko, ji oot jah dăt đaneq oot măn duh takôô axit tra đnoyq dong truh tuôôy jah đu sôôq khơl 'wơyq achung varơuq dơơp ku oot hloay khơl oh ay ku oot, laa khơl dro jeq biq păk kaxêêt kung dang đaji oot.

12Tuôôy Trưưu Koot luh dơuq kal kwat thưq drơu, gô 'yo, ji e muuyq đơơt ahrưng vari kôt, yôôch mot hngơy jêêk vlôh kamơng jaluk đaji aau vaayh vlêêt bơơn hlôôk, măn dêq hloay xiêk yôôych jêêk vlôh dang đaji vahaap, 13ji kaluh xalok tol plêêk kađnih pôôt vari, dang đaji ưk pok puut rôh play patah ku ni tuôôy biq khiel kôt klôôp anhưh. 14Lawah plêêk phuch hlơơp đaji muuyq ahnom jơyq biq ahnom hlê, ji kaluh ngok đoot kung ngok tahli raay biq katơơk klơlh aduq ku ni. 15Yôôch khơl vuua tol vari kung khơl padrok, khơl dưk xanok kuun, khơl karoh e, khơl e qwuyen lưk, ji tôôy adro xapok kung khơl rayơh rayơơy, raay du xăk klôônq đom kaluh troop kôôp ji măn katul kaluh talaat phơu tol kaluh ngok đoot; 16Oot đnooy dii kaluh ngok đoot ji kaluh kuk phơu: “Dayh hrưp pôôt tol 'wot ji galôp đơ 'wot klơlh mot ku Kơy 'ngôôy tol ngaai ji klơlh đơơt tôq jaraq ku Trưưu Koot, 17Vii hngơy tôq jaraq kôt ku khơl Kơy nưq heq truh, yôôych kơyq hnoq ik chiuq nôôy?”