Khaih-hwuyên 5

1Yôôch gô hloq đom ti akoh ku Kơy 'ngôôy tol ngaai muuyq rahlăp jơyq heq jah valơk pi'lăp hloay pi gôk, jah kal kwat bơyh pơh hlêêl dơuq. 2Gô kung hloq muuyq yaak plêêk kalh paraat kôt apok đnooy: “Kơyq xưngq đangq luh rahlăp jơyq ji tơq kaluh dơuq kal kwat ku ni?” 3Be kơyq tol plêêk long 'laarq vari long pi 'laarq vari hnoq ik luh rahlăp jơyq long 'yo muut ni. 4Nưq laa gô nhim ook vii leh kơyq jah axek hloq laa xưngq đangq xôq luh rahlăp jơyq long đok ni. 5Yôôch muuyq đom khơl draq đnooy dii gô: “Te nhim. 'Yo hơq! Ôô Vomq, Kơy vlôh xing adrơơk Ju-đa, Xamok ku Đa-vik, Kadraq heq jah jay xôq luh rahlăp jơyq kung pơh dơuq kal kwat ku ni.” 6Ji măn katul ngaai kung poot poop ôô, ji măn katul khơl draq, gô hloq Trưưu Koot đong dưk, đaji heq biq păk kaxêêt, e pơh akê ji pơh kalong mot, 'ngưq laa pơh yaak ku Kơy Plêêk jah patăk truh loch vari. 7Kadraq truh ji nhonq xok rahlăp jơyq xing ti akoh ku Kơy 'ngôôy tol ngaai. 8Tuôôy Kadraq heq nhonq xok rahlăp jơyq, poot poop ôô ji vaarq kưl poot khơl draq kul xăk pôôt kangưưr Trưưu Koot, tôôy dro e muuyq poop varo haak ji muuyq poop dooy bơơn vajang xôq viik kahlơu, 'ngưq laa kaluh apok apôôy ku khơl vah. 9Oot kacheeu muuyq baai kacheeu đơơu, đaneq:

“Kadraq xưngq đangq nhonq xok rahlăp jơyq

ji luh kaluh dơuq kal kwat ku ni,

vii Kadraq heq biq păk kaxêêt ji bơyh vahaap kadraq, Kadraq root xuq ka Kơy Plêêk

khơl manih thuôk tôôy adrơơk, apok athêêk, tôôy tamooy ji daak dêh.

10Kadraq heq khienq oot jêêk vlôh muuyq daak dêh ji khơl thơy tơơk tưp ka Kơy Plêêk haay,

ji oot hnoq dưk xakaq tol vari.”

11Yôôch gô 'yo hloq ji tameng xarooy ku 'ngưng yaak plêêk rawiit gah ngaai kung dii poot poop ôô ji khơl draq, đơu dêq hloay sôôq ku oot laa karavơu ku karavơu kawaan ku kawaan, 12kung xarooy đnooy kôt:

“Trưưu Koot heq biq păk kaxêêt, dik laa xưngq đangq xôq nhonq xok taay yaak,

karoh e, khôôt xet, kalh paraat, jah vado, tađnah tađnaak, ji ayuôôt laat.”

13Yôôch gô tameng tôôy paroh jah panưk jêêk tol plêêk, 'laarq vari, pi 'laarq vari, tol tahli, ji tôôy paroh đom oot, đnooy đaneq:

“Apôôy ka Kơy 'ngôôy tol ngôôy kung Trưưu Koot jah ayuôôt laat, jah vado, tađnah tađnaak, ji taay yaak dong truh đơơy đơơy, miet miet.”

14Poot poop ôô đnooy: “Amen!” măn khơl draq kul xăk pôôt ji kuh ayuôôt. 1