Skip to content
BibleKenya

Cua Bible Literal Text

Khaih-hwuyên 4

Atêq kaluh varơuq nưq, gô 'yo hloq ji hơq, muuyq poop 'mok jah luh vlôh tol plêêk, yôôch xarooy thưq nhưk đơu gô heq tameng xanoh dii gô đaji hnưm keeng, đnooy đaneq: “Dayh tok đnen, yôôch Gô hnoq pato ka koot hloq kaluh varơuq pheq xalih truh atêq kaluh varơuq neq.” Hloay jơnưq, gô măn đom Kơy Phool Hiel, ji 'yo hơq, muuyq ngaai jah xôq tol plêêk! Ji e muuyq Kơy đong 'ngôôy tol ngaai. Kơy 'ngôôy tol ngaai dii 'yo tamaq dang đaji ngok thach anh ji ngok mah naoh, ji e muuyq mo adreek măn rawiit ngaai dii 'yo tamaq dang đaji ngok luk bưuh. Rawiit gah ngaai e vaarq kưl poot poop ngaai, ji 'ngôôy tol ngaai laa vaarq kưl poot khơl draq jah hlưp muut aau yơơt ko, dii đoat tađnah bơơn vajang tol akoq oot. Xing ngaai xađnek vlôh kaluh kablek tađnah, hnưm garung garung, kung hnưm kơy kata. Pơh gay đeen ôôlh đong jaq kangưưr ngaai, 'ngưq laa pơh yaak ku Kơy Plêêk. Kangưưr ngaai dang đaji muuyq tahli ramil, dang đaji pha lê, măn aduq katul ngaai ji rawiit gah ngaai laa poot poop ôô, viik kaluh kalong mot, pi ngưưr hloay pi katoor. Ôô thưq nhưk dang ôô vomq, ôô thưq vaarq dang bo koot, ôô thưq pe e mamưưt đaji ku manih, ji ôô thưq poot dang xêêp kalaak kôt đong pơl. Poot poop ôô, tôôy muuyq poop đom sôôq nưq ji e drơu panưr rawiit, pi'lăp viik kaluh kalong mot, ji hngơy hloay klôôy, oot be e varơuq padơy ơơr tuôôy đnooy đaneq:

“Vah hloay, vah hloay, vah hloay laa Lôôk, Kơy Plêêk Taay Yaak,

Kơy heq e, đong e ji đong truh.”

Long tuôôy leq kaluh ôô tơơk tưp tađnah tađnaak, varơuq 'yo vado, ji apok kuh kway ka Kơy 'ngôôy tol ngaai, 'ngưq laa Kơy riirh dong truh đơơy đơơy, miet miet, yôôych vaarq kưl poot khơl draq hnoq kul xăk pôôt kangưưr Kơy 'ngôôy tol ngaai, ji kuh kul Kơy riirh dong truh đơơy đơơy, miet miet, ji oot xôq đoat tađnah oot pôôt kangưưr ngaai, tơơl đaneq:

“Kuh Lôôk ji Kơy Plêêk 'wot,

Kadraq dik xưngq đangq nhonq xok tađnah tađnaak, varơuq 'yo vado, ji taay yaak,

vii Kadraq heq panưk jêêk tôôy paroh;

kung bơyh iq trôôch Kadraq đơu kaluh paroh măn hlê ji jah panưk jêêk.”

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.