Khaih-hwuyên 3

1Dayh valơk ka yaak plêêk ku tayuup vah aduq Sat-đe, đaneq:

‘Kơy e pơh yaak ku Kơy Plêêk ji pơh poop xalok xanoh luneq: “Gô xet kaluh varơuq dơơp ku koot. Koot e ahlôôk laa riirh, đơu koot yôôych kaxêêt. 2Dayh parol 'yo ji dơơp ka kajưk kalh kaluh kajoq măn hlê, 'ngưq laa kaluh varơuq jeq kaxêêt, vii Gô koq hloq kaluh varơuq dơơp ku koot jah payôôch kangưưr Kơy Plêêk ku Gô. 3Vii anưq, dayh văch hlê kaluh varơuq koot heq nhonq ji heq tameng. Dayh tameng tyauq đnư đơu wiit xuum yơu. Măn atoh koot leh parol 'yo, Gô hnoq truh đaji adro atôk, ji koot kajưk dik hnoq leh xet wat leq Gô truh tachơơl hlê koot. 4Lunư, koot e taleq dro aduq Sat-đe, laa khơl dro heq leh dơơp a'moh qwuân aau oot, ji oot hnoq hooy kung dii Gô đom qwuân aau ko, vii oot taxưngq. 5Manih jah jay hnoq jah hlưp muut aau yơơt ko dang đanưq, Gô hnoq leh e 'leq 'nhuôôt anơng dro nưq klơlh Rahlăp Varơuq Riirh, ji Gô hnoq xưng anơng ku dro nưq kangưưr Vaq Gô ji kangưưr khơl yaak plêêk Kadraq. 6Kơyq e tôôr, dayh tameng apok Kơy Phool Hiel xanoh kung kaluh tayuup vah.”’

7Dayh valơk ka yaak plêêk ku tayuup vah aduq Phi-la-đen-phi-a đaneq:

‘Kơy Vah, Kơy Dong Dik,

Kơy adrơk jư gay kal ku Đa-vik,

Kơy luh yôôych leh kơyq hnoq kađnoch,

ji kađnoch yôôych leh kơyq luh,

xanoh luneq:

8“Gô xet kaluh varơuq dơơp ku koot ('Yo hơq, Gô heq xôq kangưưr koot muuyq 'mok ranưh luh đơu leh kơyq e paraat kađnoch ni), vii koot e axit paraat, đơu koot heq tameng jư apok Gô, ji leh chôôyq ka'lăk yal Gô. 9'Yo nee, Gô hnoq khienq khơl adro thuôk hnhư tayuup ku Sa-tan, laa khơl adro kadih nhonq oot laa manih Jo Thaiq đơu leh aalq đanưq, wih hlê, oot vơơ laa đong đnooy pa ôôh — 'Yo hơq, Gô hnoq khienq oot dơơp aleq ka oot hnoq truh ji kul pôôt aduq kangưưr jôôk koot, ji oot hnoq ik xet đaneq Gô xiaq koot. 10Vii koot heq jư apok atuq xuum ku Gô, lunưq Gô kung hnoq jư koot klơlh wat varơuq thư jeq truh tol loch dêh araak, xôq thưh khơl adro đong riirh tol vari. 11Gô đong truh kach talăng dayh. Dayh jư kajưk varơuq koot e xôq be kơyq hnoq ik xok hlơơp đoat tađnah ku koot. 12Dro leq jah jay, Gô hnoq khienq dro nưq jêêk vlôh gok đom hnhư hơu ku Kơy Plêêk Gô. Dro nưq hnoq be dong leq vlôh klơlh đnư đnoyq, ji Gô hnoq valơk tol ni yal ku Kơy Plêêk Gô, anơng theng ku Kơy Plêêk Gô (Jê-ru-sa-lem đơơu kahri pôôt xing plêêk, xing aduq Kơy Plêêk ku Gô), ji yal đơơu ku Gô. 13Kơyq e tôôr, dayh tameng apok Kơy Phool Hiel xanoh kung kaluh tayuup vah.”’

14Dayh valơk ka yaak plêêk ku tayuup vah aduq Lao-đi-xê, đaneq:

‘Kơy Amen, Manih Xanưk đangq tuôq ji dong dik, Xarôp Dơơp varơuq panưk pajêêk ku Kơy Plêêk xanoh luneq: 15“Gô xet kaluh varơuq dơơp ku koot, đaneq koot leh jaleek, kung leh tôq. Ưng kajoq koot jaleek raa jaleek long tôq raa tôq! 16Anưq yôôych, vii koot hôôm hôôm, leh tôq kung leh jaleek, lunưq Gô jeq hăk koot vlôh klơlh huuy Gô. 17Vii koot đnooy đaneq: "Gô karoh, gô heq vlôh jêêk raah jôh, ji gô be e duh kajoq dêq," anưq đơu koot leh xet đaneq koot dik pơơl hwơơl, tarôôy dik, adrah, apul ji lalôk. 18Gô ahmưk koot root xing aduq Gô vajang heq jah arieq đom ôôlh xôq koot vlôh jêêk karoh e, root aau yơơt ko ploak xôq koot hlưp muut đơu leh măn kahnoq vlôh varơuq kamưưl vii varơuq lalôk ku koot, ji root jarơơu katoh mot xôq katoh mot ku koot xôq ka koot 'yo hloq ik. 19Long Khơl leq đơu Gô xung xiaq, yôôych Gô toah pato ji 'meq dook. Lunưq, dayh kalh paraat ji wiit xuum yơu. 20'Yo hơq, Gô dưk ka 'mok ji pah. Atoh kơyq tameng xarooy Gô ji luh 'mok, yôôych Gô hnoq muut kung dro nưq, xa waal dii ni, ji ni dii Gô. 21Dro leq jah jay, Gô hnoq ăm dro nưq 'ngôôy dii Gô tol ngaai Gô, đaji Gô kung heq jah jay ji 'ngôôy dii Vaq Gô tol ngaai Kadraq. 22Kơyq e tôôr, dayh tameng apok Kơy Phool Hiel xanoh kung kaluh tayuup vah.”’”